کەژەکە: پەنەوازەن ڕێکوستەی و ۋێپارېزنای گۊرەتەر کەرمۍ
کەژەکە پەیامێوەش پۍ گلېرۊبیەکەو پاریسی کیاست و ئەرەیاۋناش، بکوژ دەوڵەتوو تورکین و داواو خۊتانکەردەیش جە گەشمەرڎا و گۊرەکەرڎەی ڕێکوستەی و ۋێپارېزنایش کەردە.
جەمەو ژەناو کوردسانی (کەژەکە) پەیامێوەش پۍ گلېرۊبیەکەو پاریسی کیاست کە پەیوەس بە دووە کۊکوشیەکەو دەوڵەتوو تورکی جە پاریسنە ڕێکوزییا.
پەیامەکەو کۆردیناسیۆنوو کەژەکەی پی جۆرەنە:
"بە جۆشوو ئاخېزەکەیما کە بە ساکینەکا دەسش پنە کەرڎ و بە ئەڤینەکا بی بە سوپا و فاڕیا پۍ ئاخېزوو ژەنۍ میان نەتەوەییۍ و ئارۊیچ جە بۆتانۆ بەرەو زاپ بەرز بۊوە، سڵام جە گرڎوو ژەنا و گەلی وڵاتپارێزیما و گەلی ئازاڎیوازیما کەرمۍ.
سەرەتا، جە ١١ ەمین ساڵیاڎوو کۊکوشیەکەو پاریسوو ٩ و کانوونوو دووەموو ٢٠١٣، بە ڕێز و وەشەسیای و سوپاسۆ هامڕایاما سارا (ساکینە جانسیز)ۍ و ڕۆژبین (فیدان دۆگان)ۍ و ڕوناهی (لەیلا شایلەمەز)ۍ ویر مارمېوە. ئا وەختەی کۊکوشی یووەم پەردەپۆش کریا و ڕۊشن نەکریاوە، هەڤاڵەما ئەڤین گۆییە یۆ جە سەرمەشقەکا تەڤگەروو ژەنا کوردی، سەرمەشقەو ئاماڎەکەردەی چالاکی شەرمەزارکەردەی ١٠ ەمین ساڵیاڎوو کۊکوشی، چنی میر پەروەری و وڵاتپارێزی قارەمانما عەبدولرەحمان کیزیل ۋەروودەم و ناوەندوو چاندوو ئەحمەد کایاینە، نامەردانە تیرۆرکریۍ.
پێویسا دەوڵەتوو فەرەنسای پۍ جاری دووەمی ئی کۊکوشیەیە نەشارۊوە، پەیوەندییە سیاسییە دلېینەییەکا و بەری ڕۊشن کەرۊوە. چونکی ئی کۊکوشیە دۆزێوە دادوەری نییا و کۊکوشیېوە سیاسییا، پێویسا دادگېوە دادپەروەرانە بۊنە. پۍ ئێمە بکەر و هاندەرا هەردووە کۊکوشیەکەی ئاشکران.
"ئەمرەو هەردووە کۊکوشیەکەی جە ئەردۆگانیوە بۍ"
ئەمرەو هەردووە کۊکوشیەکەی جەلایەنوو دیکتاتۆری فاشیستی ئەردۆگانیوە دریان، جە لایەنوو میتی و هاکان فیدانیوە ئەنجامدریان و ئەندامێوە میتی بەنامۍ عومەر گونای و فاشیستێوە بەنامۍ ویلیامی ئەرکوو ئی هەرمانېشا پنە ئەسپارېنۍ. تاریخ جارێوەتەر بەرش وست گرڎوو ئا وڵاتا ئەوروپای کە بانگەشەو مافوو مرۆڤی و داڎپەروەری و یەکسانی کەرا، وەختۍ باسەکە مېنە سەروو گەلوو کوردی بێکاریگەر بۆ. وەختۍ مەسەلەکۍ مېنە سەروو مەسڵەهەتە سیاسییەکاشا، دەوڵەتوو فەرەنسایچ پەشتی چا یاسایا کەرۆ کە تاریخشا جە دووە سەڎ ساڵا زیاتەرا. حەرچنە ١٠ ساڵۍ سەروو کۊکوشیەکەو پاریسوو ٩ و کانوونوو دووەموو ٢٠١٣ یرە ۋیەرڎ بەڵام ڕۊشنش نەکەردۆ و بی بە هامکاروو کۊکوشی دووەموو پاریسی. تا دەوڵەتوو فەرەنسای ئی کۊکوشیا ڕۊشن نەکەرۆوە، پېسە هامکاروو کۊکوشیەکا حسێب کریۆ و پېسە نوقتێوە سیاوۍ جە تاریخشەنە منویسیۆوە.
"ژەناو کوردی خۊتانکەردەی جە گەشمەرڎەکاشا کەرا"
بەڵام جە ماوەو ١١ ساڵی ۋیەردەینە گەلوو کوردی و دۆسەکېشا به تایبەت ژەنەو کوردی، حەجگیز نەمردېنۍ و خۊتانکەردەیشا جە گەشمەرڎەکاشا کەرڎەن. ئاڎۍ بە گرڎوو هێزیشاوە هەرمانەشا کەردە پۍ ئانەی ڕۆشنایی وزا سەروو کۊکوشیەکەی و بکوژەکا دادگایی کریا! هامڕا سارا، ڕۆژبینە، ڕۆناهیە و دماتەر ئەڤینە، میر، عەبدولڕەحمانی حۊڵېوە فرەشا دا پۍ وەڵاکەردەیۆ کۊشیای ئازاڎیی کوردسانی و ئاخېزوو ئازاڎیی ژەنا جە گرڎوو جەهانینە. ئیسە جە ١١ ەمین ساڵیاڎوو کۊکوشیەکەینە، دەرئەنجاموو ئی حۊڵە تاریخیە خجڵا ڕۊشن بۊوە. جە ڕاو کۊشیای دژوو کۊکوشی، هوشیاری و ڕێکوستەی ئازاڎیی کوردی و ژەنا پەرەش سانا و بەقووەتتەر بی. دروشمەو 'ژەنی، ژیۋای، ئازاڎیی" کە جە تەرەفوو ڕابەر عەبدوڵا ئۆجالانیۆ پەرەش پنەدریان، بیەن بە دروشمەو سەرەکی ئاخېزەکا سەڎەو ٢١ی. ژەنی و گەل داواو شۊنکۊتەو سارا و ئەڤینەکا کەرا و ئی هێزە کۊششکەرەشا خوڵقنا.
تەڤگەروو ئازاڎیی ژەنا کوردسانی بە بەشداری و ئازایی و ڕەنج و کەسایەتی فیداکاری هەڤاڵ سارۍ ئەرەمەرزیا و سەروو ئا بناغەیە بەقووەتتەر بی. هامڕێما سارا خوڵقنەرەو فرېوە جە یووەمەکانە و جە گرڎ مېڎانېوەنە کۊشیېنە. حەر پۊکەی ڕابەر ئاپۆ واتش "ئەرەکۊشای سارۍ، ئەرەکۊشای تەڤگەروو ئازاڎیی ژەنان". جە ڕاسینە ڕاپیماو پاگیرانەو هامڕا سارۍ کە خوڵقنەرەی یووەمەنە، بیە بە مەڵامەتوو سەرهۊردای و هوشیاری و ڕێکوستەی و بەسوپابیەی هەزاران ژەنا کە گەرەکشابۍ ئازاڎۍ با. هامڕېما ئەڤین گۆییە یووە بۍ چا هەڤاڵاما کە سەرمەشقایەتی هوشیاری و ڕێکوستەی و فەرماندەیی ژەنۍ ئازاڎېش کەرڎ. جە تاریخوو ٣٤ ساڵەو کۊشیای ۋېشەنە بەهۍ گۊرېش خوڵقنۍ و ئا بەهێشا چنی هەڤاڵاش و گەلەکەیما و ژەنانە هامبەش کەرڎ. حەرپۊکەی چنی هجوموو دووەمی جە پاریس، جە هامڕا ئەڤینېوە، دلېنەبەردەو ئاخېزوو ژەنا، ڕاسی کوردی و ڕاسی ژەنەی ئازاڎۍ، کۊشیای ئازاڎیی ژەناو جەهانی جە دەوروو فەلسەفەو ژەنۍ ژیۋای ئازاڎیی کریا ئامانج. حەرپاسە گرڎوو ئی هجوما تەڤگەری ئازاڎیما و ڕابەرایەتیما و ئامانجەکا ئازاڎیما کەرانە ئامانج.
"چارەسەر لابەردەی گۆشەگیری ئیمراڵییا"
تیرۆرکەردەی هامڕایاما کە دژوو پیلانەو قڕکەردەی گەلوو کوردی سەروو ڕاو ژەنا ئازاڎیی و گەلاو ئازاڎیی سەرمەشقی بەئیراڎە و بەقووەتۍ بیۍ. ئی کۊکوشیە جە سیاسەتەکاو قڕکەردەی کوردی و سیستموو ئیمراڵی و پیلانگێڕی میان نەتەوەیی جیا مەکریۆوە.
چارەسەرکەردەی پرسوو کوردی جە دژوو سیاسەتەکاو قڕکەردەی و دادگاییکەردەی بکوژاو کۊکوشی پاریسی بە لابەردەی گۆشەگیریی ڕابەر ئاپۆی جە سیستموو ئەشکەنجەو ئیمراڵی و ئازاڎیی جەستەیی ڕابەر ئاپۆی مۍ دی.
"ئێمە جە گرڎ یاگېنە پارېزنای ۋېما ڕێکوزیا کەرمۍ"
پېسە ڕاو هەڤاڵاما کۊشیای، وەعدوو ۋېما واوەی کەرمېوە کە هەردەم هۊرگیروو شۊڵەچراوەو ژیۋای ئازاڎیی بیمۍ کە جە سارا و ئەڤینەکاوە هۊرما گېرتەن، داوایچ جە گرڎوو ژەنا کەرمۍ یاڎوو ئا گەشمەرڎە قارەمانا پارێزنا. پابەندبیەی ڕاستەقینە تەنیا بە بەدیئاردەی وەرم و ئامانجەکاشا بۆ. گرڎوو کوردی بەتایبەت ژەنا جە حەر یاگېوە با، چ جە کوردسان یا ئەوروپا، متاوا جە گرڎ یاگێنە ۋېپارێزنای جەوهەری ۋېشا ڕێکوزا، پۍ بنیاڎنیاو پارادایمێوە دیموکراتیکی و ئیکۆلۆژیکی و ئازاڎیی ژەنۍ سەروو بناغەو ئازاڎیی ژەنۍ، خەباتێوە بەقووەت کەرا و پۍ ڕاگێرتەی جە کۊکوشی و پیلانگێڵییەکا ڕێکوستەی ۋېتا بەقووەت کەردۍ. ژەنا و گەنجا و گرڎوو گەلەکەیما جە ئەوروپا و سەرنیشت و پانیشت و ۋەرنیشت و ۋەرکەوت جە دژوو پیلانگێڵی ٩و کانوونوو دووەم و ٢٣ۍ کانوونوو یووەمی و تا ڕۊشنکەردەیۆ هەر دووە کۊکوشیەکەی و دادگاییکەردەی بکوژا و هاندەراو تاوانەکۍ سەرهۆربڎا و کۊشیای فراوانتەر کەرا.
ئارۆ، ڕۊو ۋنەپەرسایۊین جە کۊکوشیەکا!
ئارۆ، ڕۊو کۊشیاین سەروو ڕاو سارۍ و ئەڤینەکا!
کۊبیەیۆ چنی ڕابەرایەتی ئازاڎیی جە وڵاتێوە ئازاڎەنە جە هەر وەختۍ نزیکتەرا!
تۆڵەما جە ڕاو ئاخېزوو ژەنانە بۆ!".
