ئەنجوومەنی فیدراڵی سویسرای جوابوو سیاونویسو پرسیارێوەش دەربارەو گۆشەگیریی ئیمراڵی داوە و ماچۆ: "گۆشەگیری مامەڵێوی نائینسانانەن و گولانەکەردەیوەن، مکریۆ پێسەو ئەشکەنجێوی بوینیۆ. سویسرا وەرپەرسبییەیەکاو تورکیای ویر موزۆوە".
١٥ ئادارو ٢٠٢٤ بە سەرمەشقایەتیی ئەندامو پەرلەمانی فیدراڵو سویسرای لۆرێنس فالمان ڕیلە و بە ئیمزای هامبەشەو ١٢ پەرلەمانتارا، دەربارەو گۆشەگیریی ڕابەرو گەلو کوردی عەبدوڵا ئۆجالانی و وەرپەرسبییەی سویسرای، سیاونویسێوە پرسیارا وزیا وەردەمو ئەنجوومەنی فیدراڵیی سویسرای. ئەنجوومەنی فیدراڵی سویسرایچ جوابش داوە.
سیاونویسو پرسیارەکێنە، کە لاو وەزارەتو دلێ سویسرایوە جواب دریانۆ، ماچۆ سویسرا پێسەو بەشێوە جە وەرپەرسیی وێش پەی ڕاگێری جە ئەشکەنجەی، سەرانسەرو جیهانینە هەوڵێ پەی خاسکەردەی هەلومەرجو زیندانەکان مدۆنێ.
وەزارەتەکە ماچۆ، بەپاو ڕێکوزیایەکاو مافو مرۆڤی میاننەتەوەیی، گۆشەگیری نائینسانانەن و شکۆو ئینسانی گولانە مکەرۆوە، تەنانەت مکریۆ پێسەو ئەشکەنجەی بوینیۆ و وچیانیچ :
"سویسرا پەشتگیریی وەنەو هەرمانەو کۆمیتەو ڕاگێری جە ئەشکەنجەو ئەوروپای مکەرۆ، تورکیای هانی مدۆ پەی وەڵاکەردەیوەی ڕاپۆرتەکاو کۆمیتەکەی و بەیاگەیاونای ئەرەسپارایەکاش.
سویسرا دیالۆگنە چنی تورکیای، پەرسەکاو مافو ئینسانی و یاساکا تاوتۆ مکەرۆ. بە سەرپەرشتیی ئەرەمەرزیاو ئاسایشو ئەوروپای و کۆنسەو ئەوروپای، سویسرا بە شێوێوی ڕێکوپێک وەرپەرسیییەکاو تورکیای پێوەس بە مافەکاو ئینسانی و سەروەریی یاسێ ویر موزۆوە.
هاموەخت سویسرا وەرپەرسبییەی تورکیای پەی بەیاگەیاونای قەرارەکاو دادگاو مافەکاو ئینسانو ئەورووپای ویر موزۆوە".
