سیمپۆزیۆمی میان نەتەوەیی پەی پەشتیوانی جە زیندانیا سیاسی بە سەرپەرشتی پلاتفۆرموو دەنگ و زیندانیا و کۆمیتەو پەشتیوانی جە زیندانیا سیاسی میان نەتەوەیی و مەجلیسوو گەلو کوردی، جە زانشتگەو ۋەننگەو توێژینەوەو وەرکەوتی و ئەفریقی دەسش پنە کەرد، چندین ئەکادیمیێ و کەسایەتی و نوێنەرێ ڕێکوزیاکا بەشداربێنێ.

بەنامێ ڕێکوزاو سیمپۆزیۆمەکەی ئیبراهیم ئاڤجل قسێش کەردێ و سەرنجش وست سەروو دۆزوو کۆبانێ، واتش: "ئەردۆگان بە واتەی "کۆبانێ کەوت و گنۆ" پەشتیوانی وێش پەی داعشی ئەرەیاونا، ئا کەسێشە سزادێ کە شکۆو مرۆڤایەتیشا پارێزنا و دژوو زیهنیەتوو داعشی ئەرەکۆشێ. بەڵام کۆشیای ئازادیی کوردی، سیاسەتوو نکۆڵی و دلێنەبەردەی ئەردۆگانی و دەوڵەتوو فاشیستوو تورکیش دلێنەبەرد و نیازەکێشا بێهودەش کەردێ. ئەنجاموو دۆزوو کۆبانێ حەقەو ئی شکسەینە".

ناڕەزایەتی دژوو گۆشەگیری ئیمراڵی

ئیبراهیم سەرنجش وست سەروو گۆشەگیری ڕابەروو گەلو کوردی عەبدوڵا ئۆجالانی و بێدەنگی کۆمیتەو ڕاگێرتەی جە ئەشکەنجەی (سی پی تی)و شەرمەزارش کەرد، واتش: "سی پی تی پی بێدەنگییە هامبەشی ۋێش جە تاوانەو گۆشەگیری بەروزۆ. تاکە هێز بتاوۆ گۆشەگیری هۆرگێرۆ، کۆشیای هامبەشوو گەلان سەروو ئاستی میان نەتەوەیی".

"پیرۆ دەوڵەتوو پۆلیسەکان"

جە بەشی یووەم و سیمپۆزیۆمەکەینە، نوێنەروو ڕێکوزیاو پەشتیوانی جە زیندانیا سیاسی پیرۆی، دیانا دیاز قسێش کەردێ و ئیبراهیم کایپاکایاش یاد ئاردۆ.

دیاز ئەرەیاوناش پیرۆ دەوڵەتوو پۆلیسەکان، ڕێکوزیاو پۆلیسی کۆنترای بە نامێ پیکۆتی جە هەشتاکاوە جە لایەن و دەوڵەتیوە ئەرەمەرزیان و گرد جۆرە ڕێبازێوە ئەشکەنجەی بەکارمارۆ. داواش کەردە گرد لێوە پەشتگیری چا کەسا بکەرا کە بەمەڵامەتوو کۆشیای ئازادیی گەلاوە ئینێ زیندانەنە.

"کۆشیای هامبەش پێویسا"

نوێنەرو پارتوو سۆسیالیستی بەرەو سریلانکای، چاتورا گوناتیلاکا ئەرەیاوناش زیندانیا سیاسی جە سریلانکا هامشێوەو ڕەوشوو زیندانیا سیاسی تەرین جە جیهانەنە.

ئاماژەش پانەی کەرد، کۆشیای ئازادیی نەتەوەیی و کۆشیای سۆسیالیزم جەلایەنوو دەوڵەتاوە بە تۆمەتوو "تیرۆر"ی تاوانبار مکریا، واتش: " دژوو ئینیشا گردی، کۆشیای هامبەش پێویسا".

" زیندانەکا ئێرانینە ئەشکەنجە و دەسدرێژی هەن"

پارێزنەری ئێرانی محەمەد هۆشی ئەرەیاوناش دەوڵەتوو ئێرانی بێ دادگاییکەردەی کۆمکوشی مکەرۆ و ئەشکەنجە و دەسدرێژی مکەرۆ سەروو زیندانیا، واتش: "جە ئێرانەنە هەم کورد و هەم نەیاراو دەوڵەتی گیریانە و ئەشکەنجە دریا و بە ساڵان زیندانی مکریا. پەی ماڕای ئیرادەو زیندانیا گۆشەگیری وەرفراوان سەپیۆ".

پارێزنەرەکە ئەرەیاوناش چنی کۆمکوشی کوردا جە ساڵەکا هەشتاکاوە، سیستەموو ئێرانی سەروو چێردەسا ئەرەمەرزیا، باسوو ئەزموون و وێش جە زیندانوو تارانینە کەرد و چنی ستەم و ئەشکەنجەش بە چەما وێش دیەن، حەرپاسە چنی جە شەوێنە ٧٥ کەسێ گولەواران کریێنێ.

حەرپاسە ئاماژەش پانەی کەرد جە مدرامانی دماینەنە دماو کوشتەی ژینا ئەمینیێ، ٧٠٠ کەسێ کوشیێنێ و ژەنی ڕووبەڕوو دەسدرێژی و ئەشکەنجەی بیێنێوە.

سڵام جە کەمپینوو ئازادیی پەی عەبدوڵا ئۆجالانی کریا

سکرتێرو کەمپینوو پەشتیوانی کۆڵۆمبیای، ئاندی هیگین بۆتۆم بە سڵامکەردەی جە کەمپینوو ئازادیی پەی ڕابەروو گەلو کوردی عەبدوڵا ئۆجالانی دەسش بە قسەکاش کەرد، دماتەر سەرنجش وست سەروو ڕەوشوو زیندانیا جە چیلی و کۆڵۆمبیانە و ئەرەیاوناش کۆشیایشا دژوو گۆشەگیری و ئەشکەنجەی بەردەواما. داواش جە گلێرگەی میان نەتەوەیی کەرد پەشتیوانی جە زیندانیا سیاسی بکەرۆ.

حەرپاسە جە واتێوەنە سەروو نامێ تامیلەکا، سەرنج وزیا سەروو کۆمکوشی دەوڵەتوو سریلانکای وەرا وەر بە گەلوو تامیلی و جەختکریاوە جە گرنگی کۆشیای یۆگێرتەی.

دماتەر پرسیار و جواب دەسش پنە کەرد و جە ئەرەنیشتەی دووەمەنە باس جە زیندانیا سیاسی تورکیای مکریۆ.