ناوەندو گلېرگەو کوردی جە چوارچێوەو هەڵمەتەو جەهانیی "ئازادی پەی عەبدوڵا ئۆجالانی، چارەسەری سیاسی پەی پەرسو کوردی"نە جە ناوەندو شارو لیڤەرپوول و بەریتانیاینە مېزەش نیارە.

مېزەکۍ پێشوازیێوە گەرمش ۋنە کریا، گۆرانییەکۍ دەربارەو ڕابەرو گەلوو کوردی عەبدوڵا ئۆجالانی دریۍ ۋنە، جە مېزەکێنە کتێبەکۍ  ڕابەرو گەلوو کوردی عەبدوڵا ئۆجالانی دەربارەو ۋەرکۆتوو مېیامینی و سیستەمو ئازادیی ژەنا چنی مێمانا تاوتوێ کریا.

کوردەسانیا درووشمەکا "بژیۋۆ سەرۆک ئاپۆ" و "هێزی ماندێلا، ئارۆ ئۆجالان"یشا بەرزۍ کەردێوە و هۆرپڕایشا کەرد.

ڕاوەبەرا ناوەندو گلېرگەو کوردی ئاماژەشا پانەی کەرد نەک تەنیا گەلوو کوردی پەنەوازا گرڎو گەلا جەهانی گێرتەو ڕابەرو گەلوو کوردی عەبدوڵا ئۆجالانی قبووڵ نەکەرا، واتشا: " ڕابەر ئاپۆ بە پارادایمو ۋێش سیستەمێوە دیموکراتیکی ڕادیکاڵ و یەکسانیواز و ئازادیواز نەک تەنیا پەی گەلوو کوردی، بەڵکم پەی گەلا ۋەرکۆتوو مېیامینی و جەهانیچ بنیاڎ منیۆ. ملیۆنان کەسۍ بە فکرو ڕابەر ئاپۆی جە دژوو دڕندەیی داعشی جەنگ مکەرا. وە ئی ملیۆنان کەسە پەی بنیاڎنیای ژیۋایۍ ئاشتییانەی کۆتۍ ڕا. هەر پۊکەی ئا گەلۍ کە فکرو ڕابەر ئاپۆی مشناسا، هەڵوێسو ۋێشا جە دژو گێرتەی ئاڎی نیشانە مڎا و گرنگی یۆگێرتەی جە دژو فاشیزمو دەوڵەتو تورکی بەربڕا. تا ئازادی جەسەیی ڕابەر ئاپۆی مسۆگەر نەکریۆ، جە جاڎە و مېڎانەکانە بیمۍ".

چالاکییەکە بە گۆرانیۍ و چالاکی هونەری بەردەوام بۍ، داواکریا پەی خاوەنداری جە هەڵمەتەو ئازادی.