پلاتفۆرموو 'ڕا جە کوشتەی ژەنا گېرمۍ' (کەجەدەپە) گوزارشتەو مانگەو تشرینوو دووەمیش ئاشکرا کەرڎە. بە پاو گوزارشتەکۍ جە مانگەو تشرینوو دووەمیەنە ٢٤ ژەنۍ بە شێوېوە گوماناوی گیانشا جە دەسدان و ٣٣ ژەنیچ کوشیېنۍ.

بەپاو ئامارەکۍ جە ١١ مانگی ۋیەرڎەنە سەڎەنە ٩ و ئا ژەنا کە کوشیېنۍ، وەڵتەر پۆلیس و لایەنە پەیوەندیدارەکېشا جە هەڕەشەکاو سەروو ژیۋایشا ئاگاڎار کەرڎېنۍ.

چا ٣٣ ژەنەی کە مانگەی ۋیەردۍ کوشیېنۍ ٩ ژەنیشا ۋەروو ئانەی گەرەکشابیەن جیۍ باوە، ڕېکۊتەیشا ڕەڎکەرڎەبێوە، هامسەرگیریشا ڕەڎکەرڎەبېوە، نەلۍ بێنۍ چێروو باروو قبوڵکەرڎەی پەیوەنڎی، ٢ ژەنیچ بە بەهانۍ ئابوری، ژەنېوەیچ بە مەڵامەتوو ئانەی حۊڵوو پارېزناو ئەڎێش دابێش، چنی ئەڎێش کوشیۍ بېنۍ. مەڵامەتوو کوشتەی ٢١ ژەنەکەی تەری نەزانیان.

چا ٣٣ ژەنەیە ١٤شا جە تەرەفوو هامسەرەکاشاوە، ٤ ژەنېشا جە تەرەفوو هامسەری وەڵینیشاوە، دووێشا جە تەرەفوو ئا پیایاوە کە چنیشا ژیۋېنۍ، ٢ ېشا جە تەرەفوو ئا پیایاوە وەڵتەر پېوەرەبیېنۍ، دووېشا چنی ئا پیایا کە پەیوەندیېنەبیېنۍ، یوەشا جە تەرەفوو براو ۋېشۆ، دووېشا جە تەرەفوو کوڕەکاشاوە. ژەنێوەیچشا نەزانیان کە جە تەرەفوو کېوە کوشیېنە.