دەزگاو بنەیانەو گەشمەرڏا کەمپو گەشمەرڏە رۆستەم جودی مەخموری مەراسیمێوە یاڏکەردەیۆیش پەی رۆسیدا مێردینی، ئامەد عەفرین، دلژین ئامەد، مەزڵوم کۆچەر، سینان گەڤەر و ئارارات تۆڵهەڵدانی بەرد ڕاوە، کە کاتو هرووژمەکا داعشینە پەی سەرو مەخموری دژو چەتەکا جەنگشا کەردەن و دماتەر کات و یاگێ جیاجیانە جە هەرێمەکا پارێزناو مەدیاینە گەشمەرڏێ بیێنێ.

یاڏکەردەیۆکەی بە دەیەقێوە بێدەنگی پەی قەڏرنییای جە یاڏو گەشمەرڏا کوردەسانی دەسشپنەکەرد و دماتەر هامسەرۆکو دەزگاو بنەیانەو گەشمەرڏا موراد ئەنجوم قسێش کەردێ.

موراد ئەنجوم سەرەتاو قسەکاشەنە یاڏو شش گەشمەرڏەکاش بەرزڕاگێرت و واتش، "ئەر ئارۆ ئێمە چێگە جەمێ بیمێ جە سەیەو ئا قارەمانانە. مشۆم ئێمە پێسەو خەڵکو کەمپەکەی تا دما دمای سەرو رێبازو هەڤاڵا گەشمەرڏاما هەنگامە بنییەیمێ و پەرە بە ئەرەکۆشاو ئاڎیشا بڎەیمێ. پێسە شمەیچ مزاندێ ئارۆ جە مەتینا، ئاڤاشین، جە زاپ، جە وەرنیشتوو کوردەسانی ئەر مڏرامانۍ بێوێنەی پا جۆرە ملۆڕاوە، ئانە جەسەیەو ئا هەڤاڵە قارەمانانە. پێسەو خەڵکو کەمپەکەی ئێمە تا دما نەفەس سەرو هێڵەو ئاڎیشا هەنگامو منیەیمۍ، قەولمڎەیمێ کە تا ئازادی ڕابەرایەتی و کوردەسانی مڏرامانما فراوانتەر کەرمێ".

دماو وتارەکێ بەڵگەفیلمێ کە سەرو ژیوای و ئەرەکۆشای هەر شش گەشمەرڏەکا ئاماڎەکریابێ، نمایش کریا.

یاڏەکە بە دروشمەکا 'بژیوۆ سەرۆک ئاپۆ'، 'گەشمەرڏە نمەمرۆ' دمایش ئاما.