"مەلا یۊسف ئاندان" ئەنداموو کۊنگرەی ئیسلامی دیموکراتیک (دیک)ەی، ڕەخنەش جە ئەرڎۊغانی و ئاکەپەییەکا گێرت، کە هەستیارییەکاو ئایینی بەکار مارا و پانەیە سیاسەت کەرا.

"مەلا یۊسف ئاندان" بە ئاژانسوو هەواڵوو فورات (ANF)یش ئەرەیاونا، هەزار ساڵێن ئاینوو ئیسلامی لاو دەسەڵاتدارا و فەرمانڕەواکاو وەرکەوتوو دلێڕاسەی و تورکیایۊ بەکار مۍ، پێسە ماددۍ و کەرەسێوە سیاسەتی و واتیچش، "ئا بازرگانە  ئایینیۍ، موسڵمانۍ بێئیسلامێنۍ، دەوڵەت و بازرگانە ئاینییەکۍ وەرکەوتی دلێڕاسیننە قورعانشا کەرڎەن بە قەڵغان پەی وێشا، وەلۍ ئی کتێبە مەبارەکە پەی ڕژێمەکاشا مەکەرا بە ڕفرێنس. چەنی پەیشانە بەکارش مارا، جەنگۍ ور گیسنا و خەڵکی کوشا، بازرگانی کەرا و گرڎیچش چێروو نامۍ ئاینینە کەراش، تەمادارێنۍ پاسەیچە خەڵکی و گلێرگەی خەڵەتنا."

ئاندان ئاماژەش بە قۊمیایۍ دا، کە "کەمال کلیچدارئۊغڵو" کاندیدوو هامپەیمانیی میللەتی پەی سەرۊکایەتی جە سەرڎاێشنە پەی یاگێوە بۍ مەبەس پاش وەروو بەرماڵێوە کەوت و ماچۊ: "پەی موسڵمانا گرڎ یاگێوە بەرماڵا، پاکتەرین بەرماڵیچ خاکا. وێش حەرکەسێوە ئا بەرماڵی وینۊ، پاش مەنیۊ پۊرە. بۊنەو ئیحتراموو وێچشۊ بۊ، باوڕ مەکەروو کەس پاش بنیۊ پۊرە تەنانەت مولحیدێچ. بەرماڵ ئەرکش نییا. بازرگاناو ئایینی ئینەشا پەی وێشا کەرڎەن بە ئامڕاز. بەداخۊ خەڵکیچ زانیاریی تەمامشا چا بارۊ نییا. ئینەیچ کەموکوڵیی ئێمەن. هەگەرەکوم ئێمە چا مەجالانە خەڵکما هۊشیار کەرڎەبێیوە، ئارۊنە مشتومڕ سەروو ئانەی نەکریێ".

س.ز