هەرمانو کارو ئیفادەو هامسەرۆکا شارەوانی ئاکدەنیز و مێرسینی هۆشیار ساری یەلدز و نورییە ئاسڵانە و ئەندامەو ئەنجوومەنو شارەوانی ئۆزگورتی، نازڵیهان ئۆچارە، یەعقوب دانش و حیکمەت باقر خان جە دادگاو مێرسینی کە جە ١٠ی کانوونو دووەمی جە کاتو هۊرکوای سەرو یانانە باڵبەسۍ کریۍ، بەردەواما. هامسەرۆکاو شارەوانی چنی پەرلەمانتارا دیدارشا ئەنجامدا، پەی ئەڎایا ئاشتیی و جوانا پەیامشا کیاست.

پەرلەمانتارا پەیامو هامسەرۆکاو شارەوانیشا پەی جەماوەری ۋەردەمو دادگاینە وەڵا کەردۆ. پەرلەمانتارەو مێرسینی پەریهان کۆجایە واتش: "هەڤاڵەکێما بەهێزێنۍ و بە تایبەت پەی ئەڎایا ئاشتیی و جوانا سڵامشا کیاست ".

پەریهان کۆجا سەرنجش وست سەرو ئانەی مڎرامانو خەڵکو ئاکدەنیزی دژو نیایرەو قەیومی ٣ ڕوێن بەردەواما، واتش: "درووشم و هەلهەکا ئێمە مژنەوا. ئینەیچ مۆراڵشا پنە بەخشۆ. تا ئی پیلانگێڵنیی و دەسسەرەرەگێرتەیە دمایش مۍ مڎرامان مکەرمۍ، ڕا بە فاشیزمی نمەڎەیمۍ".

پەرلەمانتارو دەم پارتی مێرسین عەلی بۆزان واتش: "جە دۆسێەکەنە شایەتیدەری پەنهان نریانەرە. شارەوانی کرێکارش نەگرتەن بەڵام ماچا 'شمە کرێکارێتا گرتێنۍ'. ئەر تەنیا یەک کرێکارما گێرتەبۆ پەی شارەوانی ئانە من دەس جە کاری کێشووە. نمەتاوا پی تۆمەتا هامسەرۆکا شارەوانیما تاوانبار بکەرا. نمەتاوا بە شایەتی دەری پەنهانی مەرامی پیسیشا بارانە دی".

چالاکی شەرمەزارکەردەی جەماوەری ۋەردەمو دادگاینە بە دروشم و گۆرانیۍ بەردەواما.