زینڎانیا سیاسی کە جە ٢٧و تشرینوو دووەمیۆ دەسشا بە مانگرتەی جە وارڎەی کەرڎەن، ئی پەیامەشا ئەرەیاۋنا:"پېسە چنی جە ئەفریقانە خۊتانکەرڎەی جە ماندێلای کریا، مشۊم بەهەمان شێوەیچ خۊتانکەرڎەی جە عەبدوڵا ئۆجالانی و فکرەکاش جە گرڎوو جەهانینە کریۆ."
زینڎانیا سیاسی جە زینڎانەکاو تورکیای و سەرنیشتوو کوردسانی جە ٢٧و تشرینوو دووەمیۆ بە داواکاری"ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کوردی" دەسشا بە مانگرتەی جە ۋارڎەی کەرڎەن. چالاکی مانگرتەی زینڎانیە سیاسیەکا حەتا ١٥و شوباتی بەردەوام بۆ.
پارێزنەرە ئەدا ئۆناڵ-ە جە( ئۆهەدە) قسېش پۍ ئاژانسوو فوراتی کەرڎۍ و ئەرەیاۋناش، کە ئا زینڎانیۍ دەسشا بە مانگرتەی جە وارڎەی کەرڎەن بەمەڵامەتوو ئامانج و پاڵنەرەکاو چالاکییەکەیوە فرە بە جۆش و خرۆشێنۍ. ئەدا ئۆناڵ-ە واتش:"داواکاری زینڎانیا هۊرگېرتەی گۆشەگیریی سەروو عەبدوڵا ئۆجالانی و زینڎانیا تەروو دوورگەو ئیمراڵین."
'تەنیا ئۆجالان متاوۆ سەرمەشقایەتی کەرۆ'
پارێزنەرە ئەدا ئۆناڵ-ە جە ئەنجاموو سەرداکایش پۍ لاو زینڎانیا، پەیاموو زینڎانییەکاش پی جۊرە ئەرەیاۋنا:"بە چالاکییەکاشا گەرەکشانە پەیامێوە پۍ گەلە وڵاتپارێزەکا و ڕێکوزیاکا گلېرگەی مەدەنی و گلېرگەی دیموکراتیکی کیانا، داوا جە گرڎوو ناوەندەکا دیموکراتیکی کەرا کە گۆشەگیری سەروو عەبدوڵا ئۆجالانی هۊرگېرا و پۍ چارەسەری دیموکراتیکی پرسوو کوردی هەنگامە بنیا. ماچا سەروو ئی خاکیۆ تەنیا عەبدوڵا ئۆجەلان متاوۆ سەرمەشقی دیموکراسی و ئاشتیێوە شکۆمەندانەی کەرۆ".
حەرپاسە واتشا جە ماوەی ۋیەرڎەنە حۊڵی فرە پۍ ئی داواکارییا دریان و ئامانجشا لابەرڎەی گۆشەگیریی سەروو عەبدوڵا ئۆجالانی و پنەدای مافە ڕەواکاو گەلوو کوردین. ئاڎۍ ئەرەیاۋناش کە پێویسا جە گرڎوو جەهانینە چالاکییەکۍ زیاتەرۍ کریا و کۊشیای تا دمایی ئارڎەی بە گۆشەگیری بەردەوامۍ با. ماچا، پێویسا جە گرڎوو جەهانینە بە چالاکیی ۋەرفراوان پېسە ئێشکگیریی، گلېرۆبیەی و ڕاپیمای داواکارییە ڕەواکاشا جابەجێ کریا، حەرپېسە چنی جە ئەفریقانە خۊتانکەرڎەی جە ماندێلای کریا، بە هەمان شێوە خۊتانکەرڎەی جە عەبدوڵا ئۆجالانی و فکرەکاش جە سەرانسەروو جەهانینە کریۆ، چونکی ۋیر و ئەندێشەکۍ عەبدوڵا ئۆجەلانی هیواو گەلاو جەهانینۍ."
"ڕاوەبەرا فشارشا دەس پنەکەرڎەن"
سەبارەڎ بە هەڵوێسوو ڕاوەبەرا زینڎانی ۋەران ۋەر بە مانگرتەی جە ۋارڎەی پەرساما جە ئەدا ئۆناڵۍ. ئۆناڵە رووەدایەکۍ چن ساڵۍ چېوەڵتەریش ۋیرئارڎېوە و واتش:"ڕاوەبەرا زینڎانەکا جە مانگرتەکا ۋیەرڎەینە سزاو دیسپلینیی جۆربەجۊریشا، بەمەبەسوو ماڕای چالاکیی زینڎانیا بەکار ئارڎ، به شێوەی جیاجیا حۊڵشادا زینڎانیا تەرسنانە حەتا واز جە چالاکییەکاشا بارا. پۍ نموونەی زینڎانیێوە کە دەسش بە مانگرتەی جە ۋارڎەی کەرڎەبۍ، سزاو زینڎانی تاکەکەسیش سەرەرە سەپیابۍ، پی جۊرە حۊڵوو ڕاگېرتەی جە مافوو پارێزبەندییەکەیش دریا. پا جۊرە گەرەکشابۍ چالاکی مانگېرتا مردنانە".
ئا زینڎانییەی ٣ جارۍ سزاو ژووری تاکەکەسییش هۊرگېرتەن، بەمەڵامەتوو یاساو سزادایۆ ناچارا تەماموو سزاکۍ ماڕۆ. ڕاوەبەرا زینڎانی ئیسفادە چی ئاژەیە کەرا و سزای جۆر بە جۊر جە دیسپلینی مسەپنا. جە زینڎانەکانە ڕاوەبەرا فشاروو سەروو ئا زینڎانیا کە دەسشا بە مانگرتەی کەرڎەن زیاتەر کەرا، چنی ئانەیچ وشکنایشا پۍ کریۆ، گیریانە. ئێمە پاسەش بەخاس مزانمۍ کە ڕاوەبەرا زینڎانەکا واز چی هەڵوێساشا بارا و پۍ جابەجێکەرڎەی داواکاریی زینڎانیا ۋەرپرسیاری ۋېشا پێک بارا."
