دەوڵەتوو تورکی هجوومەکاشنە پەی سەروو جمیەروو ئازاڎیی گەلوو کوردی گرڎوو پیمانەکاو جەنگی پاشێل کەرۊ و تازەتەرین کرڎەوەشنە دوور جە گرڎوو بەها و پیمەرەکا ئامێروو جی پی ئێسیش وستەن دلۍ جلوبەرگوو وەڵاتپارێزناوە پانیشتوو کورڎسانینە.
ئاژانسوو رۊژنیوزی زوانوو وڵاتپارێزن و پەنابەرێوە سیاسیی کوردیوە باشوورنە، کە وێش باکووریین و گەرەکشنەبۍ نامێش ئاشکرا بۊ، وەڵاش کەرڎۊ، ئا پەنابەرە داواو جلوبەرگییش جە خێزانەکەیش کەرڎێنە، کە جە تورکیاوە پەیش کیانا، ئادێچ بە پۊستە جە ڕاو ماڵپەڕێوە تورکیوە پەی بازاڕکەرڎەی ئۊنلاینی جلەکێشا سانێنۍ و پەیشا کیانان، وەختۍ یاوێنۍ دەسش ئامێروو (جی پی ئێس)ـیشا دلێنە بییەن.
ئا وەڵاتپارێزنە باسوو ئانەیچش کەرڎەن: خێزانەکەم بازاڕی ئۊنلاینوو “trendyol” کە نامییەتەرین پەڕەیانەو بازاڕی ئۊنلاینین تورکیانە و ئینا چێروو چەمداریی دەوڵەتینە، جلەکێشا پەی سانان، وەلێم وەختۍ یاوێنۍ دەسش، جلەکا وشکنا و پەشتەو لۊگۊو یۊ جە پانتۊڵەکانە هەست بە چێوێوە ڕەقی کەرۊ، وەختۍ دڕۊش میۊ چێرشنە ئامێرێوە GPS نریانرە.
ئامێروو GPSـەکەی جە جۊروو (AirTag)ـین، کە متاوۊ سەرانسەروو دنیێنە بەبۍ مرڎای هەرمانە کەرۊ و یاگۍ ئا کەسەیە دیارییە کەرۊ، کە ئیناش پۊوە.
دەوڵەتی ئەرەگیروو تورکی، ماوە وەڵینەکانە، چندین بۊردومانۍ و هجوومێش دلۍ شارەکاو پانیشتوو کورڎسانینە کەرڎێنۍ و تا ئیساتۍ حەوت پەنابەرۍ سیاسیۍ سەرنیشتوو کورڎسانیشا دلۍ شارەکاو پانیشتوو کورڎسانینە تیرۊرۍ کەرڎێنۍ و ئیساتێچ ڕاو نیایرەی GPS دلۍ جلوبەرگ و کەلوپەلوو وەڵاتپارێزنانە، گەرەکشا یاگەکێشا وێزۊوە و کەرۊشا ئامانج.
س.ز
