ژەنە زینانیەو ڕامیارەو کورڎی زەینەب جەلالیانە جە زینانو یەزدو ئێرانیۆ نامېەش وەڵاکەردۆ و دلېشەنە بەشداری وېش جە هەڵمەتۊو ئازاڎی پەی ڕابەر ئاپۆی ئەرەیاونا و داواش کەرد گرڎو ژەنا، جوانا و ئازادیوازا بەشداری جە هەڵمەتەکېنە بکەرا.
زەینەب جەلالیانە کە ماوەو ١٧ ساڵان ئینا زینانەکا ئێرانینە و سزاو زینانی هەتا هەتایش سەرەرە سەپیان، جە زینانو یەزدیۆ نامێوەش ئاراسەو ڕاو گرڏی کەردەن و جە بەشێوە نامەکەینە ئەرەیاویان: " ویرکەردەیۆکام ئیلهامشا جە پارادایمو هزرو ڕابەریم عەبدوڵا ئۆجالان هۆرگێرتەن، کە بەمەڵامەتو هزر و ئازادیوازییەکەیشۆ ٢٦ ساڵێن گێرتەخانێوە نامرۆڤانەنە دەسبەسەر کریان. من بە ئەرکی سەرەکی و ئەخلاقی وێمش مزانو کە بەشداری ئا کەمپەینەیە بکەرو پەی ئازادی جەسەیی ڕابەر ئاپۆی دەسش پنەکەردەن."
هەر جە نامەکەشەنە جەلالیانە ئەرەیاونانش: " ئێرانەنە ژەنی و گرڏو گەلا هەرمانەی ماناڏرە بە شۆڕشی مکەرا و دروشمۆو "ژەنی ژیوای ئازادی" ماچاوە کە فەلسەفەو ئازادی ئێمەو ژەنان. ئادروشمە، ئا هزر و فەلسەفەنە کە ڕابەر عەبدوڵا ئۆجالان ئەرەمەزیرەیشا، پۆکەی پەی پارێزنای ئا هزرەیە پاگیری سەرو ئازادیەکەیشەرە مکەرمێ و جە چوارچێوەو ئا دروشمانە پەی ئێرانێوە دیموکراتیکی و هزر و مرۆڤێوە ئازاد، پەشتیوانی و پارێزگاری چی هزر و فەلسەفەیە مکەرمێ."
جەختیشش کەردۆ: " وەرو ئانەی کە ڕابەر ئۆجالان پەی مرۆڤایەتی و پەی گرڏ لایێ ئەرەکۆشایش کەردەن و جە سەختترین هەلومەرجەنە جە دوورگەو ئیمرالی مڏرامان و ئەرەکۆشایش کەردەن و بنەماو ویرکەردەوەکاش سەرو ئازادی ژەنا ئەرەمەزیان، کەواتە پەشتیوانی و هەڵوێس ئینا چوارچێوەو ئەرەکۆشای جە دژو پیاسالارین، کە بێگومان پەنەوازا گرڏ گلێرگێوە، پۆکەی خوڵقەتا مکەرو بە بەشداریکەردەی جە هەڵمەتەو ئازادی جەسەیی پەی ڕابەر عەبدوڵا ئۆجالان ئەرکو مرۆیی وێتا ئەنجام مرەیدێ."
دەقو نامەکەو زەینەب جەلالیانێ:
"پەشتەو دیوارەکا زینانیۆ پەی گرڏو ئازادیوازا"
من زەینەب جەلالیانە، ژەنێوە ئازادیوازەو سیاسیەنا کە سەرو ویرکەردەیۆکام ئینانی زینانەنە. ویرکەردەیۆکام ئیلهامشا جە پارادایمو هزری ڕابەر عەبدوڵا ئۆجالانی هۆرگێرتەن، کە بەمەڵامەتو هزر و ئازادیوازییەکەیشۆ ٢٦ ساڵێن ئینا گێرتەخانێوە نامرۆڤانە دەسبەسەر کریان. من بە ئەرکو سەرەکی و ئەخلاقی وێمش مزانو کە بەشداری ئا کەمپەینەیە بکەرو پەی ئازادی جەسەیی ڕابەر ئاپۆی دەسش پنەکەردەن. سڵام گیانو پەی شەرەفمەندترین ئازادیوازو جەهانی، کە وانەو ئازادیش فێرکەردانی و هیواو ئازادی پەی ئی ویرمەند و مرۆڤە گۆرەیە وازونە.
چا سەردەمەنە کە نیشتمانو ئەڏێما، وەرکەوتوو دلێڕاسەی و کوردەسان، بییەبێ بە قەبرسانێوە کە گرڏکەسێ پێسەو مەردەی چنەشەنە سەرو پەیاوە بێنێ، و کەس و هێزێ نەبێ جەنگ چنی دوژمنا بکەرۆ، بەتایبەت جە سەرنیشتوو کوردەسانی کە دۆڵەت فاشیستو تورکیای بە شێوازێ بێ ڕەحمانە بییەو کوردیش ڕەتکەردۆ و کۆمکوژیشا کەرێنێ، تەنیا کەسێ کە تاواش جە وەراوەرو ئی دۆلەتە فاشیستەیە سەرهوردۆنە، بێ گومان ڕابەر عەبدوڵا ئۆجالان بێ، کە بێ شك ویر و هزرو ئاری، تاکە ڕۆشنایێ بێ کە ڕاو ئازادی پەی گەلو کوردی و گەلا تەرو مەنتیقەکەی جە تاریکترین قۆناغو تاریخی تورکیاینە ڕۆشن کەردۆ. کاتێ ویر جە ژیواو ئاری مکەروە دڵم عەزیەتم مرۆ کە چی دونیاو ئێمە دێر چنەش یاوێنە! ئا جە جوانی و ئازادی و بنەیانە و گرڏو پەیوەندییە تەقلیدییەکا وێش دەرباز کەرد و بە وستەی ڕووەو پێناسێوە تازە پەی ئا دەستەواژا، هەوڵشدا کە گەلو کوردی و گەلا تەرێ بە مافە شایستەکا وێشا یاوا. حکومەتو فاشیستو تورکیای بە پاڵپەشتی مییاندەوڵەتی پێسەو ئەمریکا و یۆبییەی ئەوروپا، بە شێوازێوە فرە دڕندانە ئا کەسایەتییە ئازادەشا پاڵبەس کەردەن و ٢٦ ساڵێن جە دوورگێوەنە زینانی کریان و گرڏ سنووردارکەردێوەشا سەرەرە سەپنان. جەهان شایەتحاڵو ئانەین کە ئی سنووردارکەردەیە نەتاوانشا ویرو و ویرکەردەیۆکاشا سنووردار بکەرا.
ڕابەر عەبدوڵا ئۆجالان جە زینانو ئیمرالییۆ پێسەو جەوهەرێوە درەوشیۆوە، چونکە جە زینانو ئیمرالینە ویرۆکێ تازێش پێکئاردێ و وستێش ڕووە، سیستەمو کۆنفیدرالیزمو دیموکراتیکیش پێسەو ڕاچارەسەرێ یاگێ دەوڵەتەکا مەنتیقەکەیش وست ڕووە. خەڵکو هەرێمەکەی جە ڕاو ئا سیستەمە دیموکراسییەیۆ تاواشا مافو وێشا بە دەسبارانە و پێوەرە ژیوایێ ئاشتیانەشا بۆنە. بی جۆرە بەرژەوەندی حکومەتەکا کەوتە مەترسییۆ، بی مەڵامەتەیش حکومەتو فاشیستو تورکیای به نوێنەرایەتی گرڏ دۆڵەت-نەتەوەکا فشارەکاشا سەرو ڕابەرو ئازادیوازا، عەبدوڵا ئۆجالان زیاتەر کەرد، بەڵام سەرەڕاو گرڏ ئا فشار و سنووردارکەردەیە، ڕابەر ئاپۆ بە شێوازێ فرە ئاردەینە رێبازێ تازەو ڕاو ئازادیش وست ڕووە.
پێسەو ڕابەرێ و فەیلەسوفێوە جە وەراوەر هەر دڕندێوە دوژمنینە گیانی شیرینش کەرد بە قەڵغانێوە پەی پارێزانی گەلا. پاڵپەشتیکەردەی و وەرگیری کەردەی گەلا جە حەقیقەتەنە وەرگری کەردەین جە دادپەروەری و یەکسانی و ئازادی. من زەینەب جەلالیانە ١٧ ساڵێن جە سەختترین هەلومەرجەنە بەمەڵامەتو وەرگری کەردەی جە مافەکام و مافو هاموڵاتییەکام ئینانی زینانەنە. من خاس جە بارودۆخو زینانی یاونە، هەر کاتێ ئا گۆشەگیرییە ماڕانە کە جە ئیمرالی سەرو ڕابەر ئاپۆی سەپیان، گرڏو زینانەکاش ماڕانە. بی جۆرە ئێمەو ژەنا بیمێ بە سەرمەشقێ جە ماڕاو سیستەمو زینانەکانە.
ئێرانەنە ژەنی و گرڏو گەلا هەرمانە پەی ماناداا بە شۆڕشی مکەرا و دروشمو "ژەنی ژیوای ئازادی" ماچاوە کە فەلسەفەو ئازادی ئێمەو ژەنان. ئی دروشمە، ئا هزر و فەلسەفەنە کە ڕابەر عەبدوڵا ئۆجالان ئەرەمەرزنەرشا، پۆکەی پەی پارێزناو ئا هزرو پاگیریە سەرو ئازادیەکەیش مکەرمێش و جە چوارچێوەو ئا دروشمەی پەی ئێرانێوە دیموکراتیکی و هزر و مرۆڤێوە ئازاد، پەشتیوانی و پارێزگاری جی هزر و فەلسەفەیە مکەرمێ.
هەر وەرو ئی مەڵامەتەینە داوا جە گرڏو ژەنا و جوانا و بەتایبەت ویرمەندا، ئەکادیمیستەکا، هونەرمەندا، ڕێکوزیێ مەدەنییەکا، پارێزنەرا، ڕێکوزیێ ژینگەپارێزنەرەکا، فێمینیستەکا و گەلو کوردی و گەلا ئازادیوازو ئێرانی مکەرو، کە پەشتیوانی جە ئازادی ڕابەر عەبدوڵا ئۆجالانی بکەرا و بەشداری جە هەڵمەتەو ئازادی جەسەیی ڕابەر ئۆجالان بکەرا، کە جە گرڏو جەهانینە دەسش پنەکەردەن و پەرەش پنەدریان. بی جۆرە گەلاو ئەرەنیشتی ئێرانی پێسەو گەلا تەر پەنەوازیشا بی جۆرە هزرە هەن پەی چارەسەرکەردەو کێشە ئەساسییەکا، کەواتە یاگێ وێشا گرڏ هەوڵێشادا پەی ئازادکەردەی و لابەردەی ئا سنووردارکەردەیە کە سەرو ڕابەر عەبدوڵا ئۆجالانیرە سەپیان.
وەرو ئانەی کە ڕابەر ئۆجالان پەی مرۆڤایەتی و پەی گرڏ لێوە ئەرەکۆشایش کەردەن و جە سەختتەرین هەلومەرجەنە جە دوورگەو ئیمرالینە مڏرامان و ئەرەکۆشایش کەردەن و بنەماو ویرکەردەیۆکاش سەرو ئازادی ژەنا ئەرەمەزنان، کەواتە پەشتیوانی و هەڵوێس جە چوارچێوەو ئەرەکۆشای جە دژو پیاسالاریین، کە بێگومان پەنەوازا پەی گرڏو گلێرگەی، پۆکەی خوڵقەتا مکەرو بە بەشداریکەردەی جە هەڵمەتەو ئازادی جەسەیی پەی ڕابەر عەبدوڵا ئۆجالانی ئەرکو مرۆیی وێتا ئەنجام بڎەیدۍ. بە دڵنیاییۆ ئازادی ئاڎیی بۆ بە ئازاڎیی گرڏی و بە تایبەت ژەنە کۆششکەرا.
زەینەب جەلالیانە- زینانیێوە کە سزاو زینانی هەتاهەتاییش سەرەرە سەپیان - زینانو یەزدی".
