دەوڵەتی ئەرەگیروو تورکی ڕۆو جومعەی مەنتێقەو سەیدسادەقو سلێمانینە، پانیشتوو کوردسانینە سەیارێوە ڕۆنامەوانە کورداش بۆردومان کەرد. هجوومەکەنە گولستان تارا و هێرۆ بەهادینە گەشمەردێ بیێ و شش ڕۆنامەوانێ کە یۆشاڕێبین بەکر وەرپەرسوو سۆشیاڵ میدیاو چەترین بریندار بی.

کۆکوشییەکە ئاست و ڕێکوزیا و حزب و کەسایەتییەکانە ژاردایوەی فرەش ئاما شۆنیرە و ئینێ بڕێو جەکاردایۆکانێ:

پەیامکیانێ بێسنوورێ: مشۆم پێچیۆوە وەنەو دەوڵەتوو تورکیای

ڕێکوزیاو پەیامکیانە بێسنوورا جگە جە ئیدانەو ئا هەرمانێ، داوا مکەرۆ وەنەو دەسەڵاتوو تورکی بپێچیۆوە و دەسەڵاتداراو هەرێمیچ ڕۆشنکەردەیوەی تەمام بارەو ئا تاوانەیوە بدانێ، کە وەراوەروو ئا ڕۆنامەنویسا کریان.

ئەرەیاونایەکەو پەیامکیانە بێسنوورانە ئامان، دماو کەمتەر جە دوێ ڕوا جە وەڵاکەردەیوە،هۆشدارییەکەو پەیامکیانە بێسنوورا دەربارەو زیادبییەی تندوتیژییەکا وەراوەروو ڕۆنامەوانا هەرێمەنە، بە هجوومو فڕۆکە بێفڕۆکەوانا دووێ ڕۆنامەنویسێ تەرێ کوشیێ و یۆ تەریچ بەسەختی بریندار بی، کە هەریەری کارمەندێ کەناڵوو ستێرک تیڤی سەر بە کۆمپانیاو بەرهەمئاردەی میدیای کوردی چەترینێ.

ئاماژە پانەیە کریان،کوشیای یەرێ ڕۆنامەنویسا ماوەو دوێ مانگانە، هەرێموو کوردسانی مکەرۆ بە یۆ جە هەرە یاگە تەرسناکەکاو دنیێ پەی ڕۆنامەنویسا.

چەنی ئیدانەکەردەی بەئامانجگێرتەی رۆنامەنویسا، راو فڕۆکەی بێفڕۆکەوانی و گەشمەردەکەردەی هێرۆ بەهادینێ و گولستان تارێ، داوا وەنەو دەسەڵاتداراو هەرێموو کوردسانی مکەرۆ، ڕۆشنۆکەردەی تەمام بارەو ئا تاواناوە بدانێ و ڕاسییەکا بەربوزانێ.

پەیامکیانێ بێسنوورێ جەیخت مکەرۆوە چانەی مسۆم دەسڵاتداراو تورکیای،وەنەشا پێچیۆوە و پەنەوازا ڕۆنامەنویسێ کوردێ پارێزنیێ با.

هاموەخت داواو بەدیئاردەی دادپەروەری پەی مافوو هێرۆ بەهادینێ و گوڵستان تارێ مکەرۆ.

هامپەیمانیی ژەنە ڕۆنامەنویسا: گوڵستانە و هێرۆ پەی وەرگێریی جە ڕاسییەکا گیانسا جەدەس دان

هامپەیمانیی ژەنە ئەرەیاونەرا "CFWIJ"‌، پلاتفۆرموو ئێکسینە ئەرەیاوناێوەشا سەبارەت بە بەئامانجگێرتەی ڕۆنامەنویساو هەرێموو کوردسانیوەلاو دەوڵەتی ئەرەگیروو تورکیوە وەڵا کەردۆ.

ئەوەڵوو ئەرەیاونایەکەینە هامپەیمانیی ژەنە ئەرەیاونەرا"CFWIJ" ، نیگەرانیی وێشپەی جەدەسدای هەردووە ژەنە ئەرەیاونەرا هێرۆ بەهادینە و گوڵستان تارێ بەروست و جەختش کەردۆ، ئا دووە ڕۆنامەنویسێ کوشیێنێ، چونکوم وەرگێریی جە ڕاسی مکەرا.

بەیاننامەکەنە ئامان: " ئا هجوومە کردەوێ تەرسنۆکانە و تندوتیژیین، ئێمە جە CFWIJ پەرسە و سەرەوەشیی وێما ئاراسەو بنەیانەی و هامکارا ڕۆنامەنویسە کوشیایەکا مکەرمێ. پەنەوازا سوپاو تورکیای واز جە بەئامانجگێرتەی ڕۆنامەنویساو هەرێموو کوردسانی بارۆ. داوا مکەرمێ زووتەرین وەختەنە، دادپەروەری بێ دی و ئاراسەو بنەیانەی و هامکارە رۆنامەنویسەکا مکەرمێ. زووتەرین وەختەنە دادپەروەری بێ دی و گردوو ئانیشا دەسشا هەن هجوومەکەنە وەنەشا بپەرسیۆوە.

کۆنگرەو ستاری: هیچ چێوێوە نمەتاوۆ قۆرتێ وەردەموو کۆشیاینە ساز بکەرۆ

ئەنجومەنوو کۆنگرەو ستاری ڕاو بەیاننامێوە هجوومەکەششەرمەزار کەرد و ئەرەیاونانش" ئێمە ئی هجوومەو دەوڵەتوو تورکی فاشیستی و پەدەکەی هامکاریش شەرمەزار مکەرمێ. جە کەسایەتیی گەشمەردە گوڵستان تارێ و هێرۆ بەهادینێنە سەرجەموو  گەشمەرداو کوردسانی یادێ مکەرمێوە و هومێدوو خاسبییەیوە پەی بریندارەکا موازمی".

حەر جە ئەرەیاونایەکەینە ئامان، "هیچ چیوێوە نمەتاوۆ قۆرتێ وەردەموو کۆشیایمانە ساز بکەرۆ. بێدەنگی ڕا وەردەموو کۆکوشیی تەرینە مکەرۆوە، پەوکای زیاتەر جە  گرد وەختێ گوڕ بە کۆشیای مدەیمێ".

یەنەکە: ژیوای کەسە مەدەنییا مکریۆ ئامانج، بێدەنگیی مایێ قبووڵکەردەی نییەن

 

فراکسیۆنوو یەنەکەی پەرلەمانوو عێراقینە جگە جە ئیدانەکەردەی هجوومەکەی ئەرەیاوناش، هجوومی پاسە ناڕەوان و دژوو یاسا و ڕێسا میاننەتەوەیەکانێ، حەرپاسە پاشیلکەردی سەروەریی خاکی و عاسمانوو عێراقین.

پەوکای داوا جە حکومەتی فیدراڵی مکەرمێ وەراوەروو پاشێلکەردەی ڕوانەو خاک و عاسمانوو عیراقی و هەرێموو کوردسانی بێدەنگی بماڕا، چونکوم تەرسیوی گەورێ سەروو ژیوای مەدەنییەکاوە هەنە".

بەرەو گەلی: بە هامکاریی دەسوو دلی مکریۆ!

بەرەو گەلی ئەرەیاونانش:"  وەرپەرسوو پارێزنای ژیوای و سڵامەتی و سەروەریی خاکو عێراقی و هاموەڵاتاش ئینا گەردەنوو دەوڵەتوو عێراقی و دەسەڵاتداراو هەرێمو کوردسانینە، بەداخۆ هەردویشا ئینێ لای سەری بێباکی و بێخەمیوە وەراوەروو ژیوای و سڵامەتی و ونەو هاموەڵاتاو هەرێموو کوردسانینە".

واتەنیچشا: "ئانە کە ڕووە مدۆ هر ڕوێو درۆنێوە ئینسانێوە بێتاوان و بێگوناحوو ئێمە مکەرۆ ئامانج، بە هامکاریی دەسوو دلێ و ئەجێندای سیاسین، ئەوەخوایبییەیوەی ئا خەرق و پاشێلکارییانە شکسوو دەسەڵاتدارا و حکومڕاناو هەرێموو کوردسانین و پاسەش کەردەن هیچ تاکێوە هەست بە سڵامەتی و ئاسایش و ژیوای وێش نەکەرۆ.

ئەجێندایەکاو بەری کلکایەتی و بەشبییەیە حزبی و شەخسییەکاو دەسەڵاتداراو هەرێمی گرد سنوورێوەشا بەزنان و مشۆم ئا بێباکی و ئەجێندا تەرسناکا وەراوەروو ژیوای هاموەڵاتاماوە دماییش پەنە بێ".

بەرەو گەلی سەرەوەشی وەنەو کوسوکارو ڕۆنامەنویسە گەشمەردەکا مکەرۆ و ئەرەمیاونۆش:" ژیوای و سڵامەتیی هاموەڵاتا خەتەی سوورەنە و مسۆم ئا تیرۆر و تۆقنایە سنوورش پەی بنریۆرە نەک هامئاوازییش چەنی بکریۆ".  

کەنەکە: دژوو فاشیزمی و ئەرەگیری کۆشیای حەقیقەتی بەردەواما

 

کەنەکە ئەرەیاوناش: "دەوڵەتی ئەرەگیروو تورکیای بەردەوام دژو خەڵکوو کوردسانی و شۆڕش و دەسکەوتەکاش گردوو شیوازەکاو جەنگی و سەرکوتکەردەیش بەکارێ ئاردێنێ، وەلێ نەتاوانشورەو خەڵکی و مدرامانی قارەمانانەو گەلوو کوردسانی بماڕۆ. پیلانێ و هجوومە یۆ دماویوەکاش پووچەڵێ کریێوە و نەیاوێ یاگێ. ئی هجوومەیچە پەی سەروو ڕۆنامەوانا و دەنگی ئازادوو خەڵکوو کوردسانی حەرچند قوربانیێش چەنە کەوتێوە بەڵام واوەی بێئەنجام مەنۆوە. ڕۆنامەوانێ یارێ و ڕاسواچێ هەمیشە دەنگی هەقەتینوو خەڵکی بینێ و پەوکای چێوێوە سەیر نییەن، کە دەوڵەتێوە ئەرەگیر و دیکتاتۆرێوی سەردەمی وەنەو قەڵەم و کامێرەو ڕۆنامەوانا بتەرسۆ".

کەنەکە سەرەوەشی وەنەو کەسوکار وهامخەباتاو گەشمەردا مکەرۆ و هومێدوو خاسبییەیوە پەی بریندارەکا موزاۆ، ماچۆ:" بەتندی ئا تاوانە تەرسنۆکانەو دەوڵەتوو تورکیای و حکومەتوو ئەردۆغان-باخچەلی شەرمەزار و ریسوا مکەرمێ. وەعد بۆ کە نازمێ چراوەو دەسوو ئا ڕۆنامەوانا بکوشیۆوە ودرێژە بە کۆشیایشا پەی ئاشکراکەردەی هەقەتیەنو فاشیزمی و ئەرەگیرکاریی دەوڵەتوو تورکی مدەیمێ".

ئەدهەم بارزانی: گەشمەردەکەردەی دووە ژەنە ڕۆنامەنویسەکا تاوانیوی میاننەتەوەیین

ئەدهەم بارزانى کەسایەتىی سیاسیی پانیشتوو کوردستانی سەروو هجوومەکەو هیزیی سنوروو شارەکڵەو سەیدسادەقی کە دوێ ژەنە ڕۆنامەنویسیش دلێنە کریێ ئامانج و یۆیچ بریندار بی، ئەرەیاونانش:

وەختێوەنە ڕوانە موینمێ وەڵاتما بەبەردەوامی بوردومان مکریۆ و خاکما ئەرەگیر مکریۆ، پانەیچۆ نەمدرێ ڕۆڵێ بێ چەکێ و قەڵەم بەدەسێ نیشتمانی دوور جە بەهایوە ئینسانی گەشمەردێ مکەرا.

واتیچش: گەشمەردەکەردەی ئا دووە ڕۆنامەنویسا مبۆنە بە تاوانێوی گەورە میاننەتوەیی بەهانەورنەگیر، دژوو گرد نۆعە یاسا و نەریتێوە میاندەوڵەتی و پاشێلکەردەی مافوو هاموەڵاتا و ڕۆنامەنویسا پانیشتوو کوردسانینە.

"دەوڵەتوو تورکی تەرسی و هەڕەشێوە گەورێنە"

ئارێز عەبدوڵا ئەنداموو سەرکردایەتی یەنەکەی سەروو هەژماروو وێشۆ تۆڕە کۆمەڵایەتییەکانە ناڕەزایەتییش وەراوەروو کۆکوشی و تیرۆرکەردەی ڕۆنامەنویسانە نیشانە دا و ئەرەیاوناش: دەوڵەتوو تورکی هەڕەشێ وتەرسیوە گەورێنە سەرو عێراقی و هەرێمو کوردسانیوە".

"دژە تیرۆروو پەدەکەی وزیان خزمەتوو دەوڵەتوو تورکیوە"

ڕۆنامەنویسە نیاز عەبدوڵا، لە بارەو گەشمەردەکەردەی هەردوە ڕۆنامەنویسا لاو دەوڵەتوو تورکیوە، سنوورو سەیدسادەقینە فەیسبووکەنە نویستەنش:" تیرۆرکەردەی هەردووە ڕۆنامەنویسا لاو دەوڵەتوو تورکیوە سەیدسادەقنە گوڵستان تارا  هێرۆ بەهائەدینە دلێ خاكوو هەرێموو كوردستانینە، شكس و ئاستوو بێتوانایی ئەنجوومونوو ئاسایشوو هەرێمو كوردستانی و دەزگا ئەمنییەكا بەرموزۆنە، جە پارێزنای ڕۆنامەنویسانە و خەڵکوو هەرێمەکەینە و تەرسەو دەسوستەینە و ئەرەگیریی تورکیای.

ماچۆیچ هجوومەکە ئاستو تەرسەو دەوڵەتوو تورکی دلێ دەزگاو دژەتیرۆروو کوردسانینە بەرموزۆ، کە چەنی ئا دەزگا وزیان خزمەتوو دەوڵەتوو تورکی و جیای پارێزنای و وەرگێری هاموەلاتا، بەهانێ پەی تیرۆروو دوێ ڕۆنامەنویسە ژەنا مارۆوە، وەختێنە خەریکوو ڕۆنامەنویسیی بیێنێ.