فەرماندەیی قەرارگەو مییانو پارێزنای گەلی موبارەک بایش ونەو ئا گەریلایا کەرد کە جە مێڏانو کوڕەژارۆو وەرکەوتوو زاپینە، ئۆپراسیۆنی شۆڕشگێڵنیشا ئەنجامدا و ئەرەیاوناش: "پێسەو برووسکەی جە ئەرەگیراشا دا."
فەرماندەیی قەرارگەو مییانو هەپەگەی سەبارەت بە چالاکی کوردینەی(هەماهەنگ)ی ٢٠و شوباتینە جە مێڏانو کوڕەژارۆی بەیاننامێوەش وەڵاکەردۆ و موبارەک بایش جا گەریلایا کەرد بەشداریشا جە چالاکییەکەنە کەردەبێ.
بەیاننامەکە پی جۆرەنە:
"هەڤاڵە قارەمانەکێما!
سەرەتا جە دڵۆ سڵام ئاراسەو شمەی هەڤاڵا خاوەن هەستو شۆڕشگێڵنی مکەرمێ پەی بەشداریکەردەی جە ئۆپەراسیۆنو شۆڕشگێڵی مێڏانو کورەژارۆی جە وەرکەوتوو زاپینە کە بە ئازای و ڕۆحی فیدایی ئاپۆییۆ ئەنجامتا دان.
جە ٢٠و شوباتینە جە مێڏانو کورەژارۆو وەرکەوتوو زاپینە ،جە چوارچێوەو پارێزناو ڕەواینە، جە دژو هرووژمە ئاسمانیەکا و زەمینەکا سوپاو ئەرەگیرو تورکی، ئۆپەراسیۆنێوە شۆڕشگێڵانەتا ئەنجامدا. جە ئۆپراسیۆنو شۆڕشگێڵی کورەژارۆینە، جە یەرێ باڵێوە بە شێوێ کوردینە( هەماهەنگ) هرووژم کریا سەرو ئەرەگیرا، هێزەکێ گەریلای بە چنەئامی وێشا یاونا دلێ مۆڵگەکا دوژمنی و لوێ دلێ سەنگەرەکا دوژمنی و هەتا یوەم فیشەک دوژمن هەستش بە حیچی نەکەرد. چی ئۆپەراسیۆنە شۆڕشگێڵینە، کە سەرەڕاو بارودۆخو قورسی زمسانی، ئیرادەو بەرزی شۆڕشگێڵی گۆرە و فیداکاری بەهێزشا نیشانە دا، پێسەو برووسکەی گورزەشا جە ئەرەگیرا دا. جە ماوەو ٢٠ دەقانە ئامانجەکە بە تەمامەتی دلێنە بریا و دەس سەرو مۆڵگە و یاگێ ئەرەگیریەیا گیریا، دوژمن زەرەرێ فرەش وەرکەوت، گەریلاکێ حیچ زەرەێشا وەنە نەکەوت و چەک و کەرەستێ سەروازیێ فرەو دوژمنا دەسشا سەرەرە گیریا، خێمە و یاگەکێشا سۆچنێ، ئینە نیشاندەرو ئانەی بێ کە ئۆپەراسیۆنەکە سەرکۆتە بێ.
با بۆنۆ ئێمە جارێوە تەر موبارەک بای جە گرڏو فەرماندەکا و جەنگاوەرا ئا ئۆپەراسیۆنەیە مکەرمێ کە بە رۆحی فیدایی ئاپۆییۆ و بە تاکتیکو سەردەمیانەی بە شێوێوە سەرکۆتانە جابەجێشا کەرد،
ئا بەڵگێ کاتو ئۆپراسیۆنو شۆڕشگێڵینە دەسشا سەرەرە گیریا، جارێوەتەر حەقیقەتو جەنگو کەشەکا کوردەسانیشا ئاشکرا کەرد. بەڕۆشنی بەرکەوت کە وەزارەتو وەرگری تورکیای درۆ مکەرۆ و پاگیری سەرو جەنگی مکەرۆ و دەرئەنجامو جەنگەکا جە گەلا تورکیای مشارۆوە و گرڏ جۆرە چەواشەکاریێ مکەرۆ و بە واتەیۆ 'قفڵما کەردەن' هەوڵو فریودای گلێرگەی مڏۆ. شناسنامەو ئا سەروازا ئاشکرا نەکریابێ کە دەس سەرو چەک و کەرەستە سەروازییەکاشا و شناسنامەکاشا گیریان. بەڵام دماو وەڵا بییەیۆ ئۆپەراسیۆنی شۆڕشگێڵی شمە و ئا چەک و پەنەوازییا و بەڵگەناما کە جە تەرمو ئەرەگیرا کۆتا کەردێوە و وەڵاکریاوە، حەقیقەتو جەنگەکەی پەی گرڏ لێوە ئاشکرا بی.
هەڤاڵە قارەمانەکێما؛ بۆنۆ ئی چالاکییە سەرکۆتەیە، جارێوە تەر بەنامێ فەرماندەیی قەرارگەو مییانگەیما موبارەک بایتا ونە مکەرمێ و جە ڕاپیمای بە ئیرادەو بڕوێتا سەرو هێڵەو ڕابەری و گەشمەرڏاما، هیواو سەرکۆتەیتا پەی وازمێنە و ئینایمێ جا بڕوێنە سەرکۆتەی گۆرە بەدەس ماردێنە."
