جە شارو ڤییەنای پایتەختو نەمساینە نەورۆز بە وەڵېۋەبیەو (فەیکۆم)ی پیرۆزکریا. کورڎسانیۍ چنی دۆسەکاشا جە گاسۆمەتر کۆبیېۋە و بە جۆش وخرۆشێۋە فرۊ جەژنەو نەورۆزیشا پیرۆزە کەرڎە.

جە چالاکییەکەنە سیاسەڎمەدارو کورڎی "خەتیب دیجلە" ئەرەیاۋناش، چی ھورچنیەینە هێزەکۍ ئازاڎی و دیموکراسی ھەرمانە پۍ وڕناو سیستمی فاشیستی مکەرا. دماو تەمامبیەو واچەکا دیجلەی، نوێنەرەو هەدەپەی جە ئەڵمانیا "لەیلا ئیمرەت"ە و نوێنەرو یۊبیەی هێزە دیموکراتیکەکا "ئەحمەد زیرەک " قسېشا کەرڎۍ.

حەر جە پیرۆزکەرڎەکەینە " ئەرنست وۆلەر" سەرۆک پەرلەمانی ڤییەنای ۋاتش، پەشتگیری جە کورڎسانیا مکەرو. حەرپاسە ئەندامو ئەنجومەنی نەتەوەیی کورڎی "هارالد ترۆچ" ۋاتش: "ۋەختۍ جە هۊلێر، ۋەرنیشت، ئامەڎ و ئێران ماچمۍ دیموکراسی و ئازاڎیی پێۋەرە، بێگومان ئانە بە ماناو وڕاو دیکتاتۆریی ئەردۆغانیا".

جە پیرۆزکەرڎەکەینە حەر یۊ جە هونەرمەنڎا '' شڤان پەروەر، شەهریبانا کورد، دیلان تۆپ، شیار مونزور و گروپو دەمی لوۋۍ سەرو تەختی و هونەرەکەو ۋێشا پێشکەشکەرڎ و کورڎسانیۍ  دەمو گۆرانیەکاوە زەماۋنەو هورپڕایشا گێڵنا.

*بۆردیۆ

نەورۆز شارو بۆردیۆی فەرەنساینە بە ڕێکوستەو چالاکیېۋە پیرۆزکریا.

دماو دەقېۋە ڕێزگرتەی جە یاڎو گەشمەرڎا ئەرەکۊشای ئازاڎیی کورڎسانی، هامسەرۆکو کۆنگرەو گەلی "رەمزی کارتال" بە تەلەفۆن قسېش پۍ بەشدارا مەراسیمەکەی کەرڎ و ئەرەیاۋناش، ۋەخت ۋەختو ئازاڎیی ڕابەرو گەلوو کورڎی "عەبدوڵا ئۆجالانیا". ئانەیچش وات،  ھورچنیېکۍ  با بە ھورچنیەو نەورۆزی.

جە پیرۆزکەرڎەکەینە حەر یۊ جە هونەرمەنڎا "ئاگرین ئازاد، زیلان نار، دەنیز ئەسمەر و هونەرمەنڎۍ مەنتیقەکەی هونەرەکەشا پێشکەشکەرڎ. حەرپاسە سەرەمڕە  دروشمەکا "بژیۊ سەرۆک ئاپۆ"، "بێ سەرۆکی ژیای مەبۊ" واچېنۍ.

ھ.ش