سیاسەتمەدارەو کوردی سیبەل یگیتئاڵپ-ە ئەرەیاۋناش، بنیاڎنیای ئاینڎەو گەلاو تورکیای بە شێوێوە پارێزیا، جە ڕاو ئازاڎیی رابەروو گەلوو کوردی عەبدوڵا ئۆجالانیوە دەسەبەر بۆ.

یگیتئاڵپ-ە قسېش پەی ئاژانسوو هەواڵوو فوراتی (ANF)ی کەردۍ و باسش چانەی کەرد، دمایی ئاردەی بە گۆشەگیری سەروو رابەروو گەلوو کوردی عەبدوڵا ئۆجالانی، پێویسی و شەرتەی ئەساسیەنە پەی وةسگوزەرانی گەلاو تورکیای و ئامای دی داواکاری قەوارەی پەی گەلوو کوردی و ئاینڎەی پارێزیاشا. یگیتئاڵپ-ە ئانەیچش وست ڕووە، " گۆشەگیری سەروو بەڕێز ئۆجالانی جە گلېرگەنە پېسە جەنگۍ موینیۆ. درێژەدای بە گۆشەگیری پاگیرییا سەروو ئا جەنگیە. گەلوو کوردی بەڕێز ئۆجالانی پېسە ۋەردەنگی سەرەکی گفتووگۆی و ئەرەنیشتەی موینۆ و بە ملوێنان ئیمزۍ ڕووانەو پەرلەمانوو تورکیای کریێنۍ. جە مېڎانەکا نەورۆزینە جە وەختوو مبارەکباییەکا ٨و مارسینە گەلوو کوردی جارێتەر ئانەش بە رۊشنی نیشانەدا".

بڕۍ سەروو جەنگی مژیۋا

یگیتئاڵپ-ە ئانەش وست ڕووە کە بڕۍ سەروو جەنگی، سەروو ئانەی گەلا بکەرا دوژمنوو یۊترینی و سەروو قووڵکەردەیۆ قەیرانەو ئابوری مژیۋا و پی جۆرە بەردەوام بۍ، " دەوڵەت نەتەوەو تورکی حۊڵ مڎۆ ۋێش سەروو ئیتنیکی، باوەڕی و رەگەزەکا بنیاڎ بنیۆ. ئیتر محاڵا پرۆسێوە پا جۆرە بلۆڕاوە. پرۆسێوەن کە گەلی بەرەو هەژاری و دلېنەبەردەی بەرۆ. پەی ئانەی تنووتیژی دمایش پنە بۍ، مشۊم گۆشەگیری سەروو بەڕێز ئۆجالانی هۊربگیریۆ و سەرجە نۆ ئازاڎیی جەستەیی بەدەسبارۆوە".

مشۊم سەردەموو تنووتیژی بۋییەرۆ

یگیتئاڵپ-ە باسش چانەی کەرد کە زینڎانی دژوو سیستموو گۆشەگیری هەڵوێسشا نیشانە دان و واتش، "زینڎانیا دیڎار چنی بنەیانەکاشا ئەنجام مەڎا و پەویەندی تەلەفونی و دادگاکێشا بایکۆت کەردێنۍ و حۊڵ مڎا پا هەڵوێسەیشا سەرنج وزانۍ سەروو گۆشەگیری بەڕێز ئۆجالانی. ئیساتۍ تەنیا ڕێوە پەی گەلاو تورکیای و گەلاو ۋەرکەوتوو دلېڕاسەی کە چا کەش و تنووتیژیەیە رزگارشا بۆ، هۊرگێرتەی هەلومەرجوو گۆشەگیری سەروو بەڕێز ئۆجالانی و مسۆگەر کەردەی ئازاڎیی ئاڎیی و دەسپنەکەردەیۆ پرۆسەو گفتووگۆی و ئەرەنیشتەین جە نزیکتەرین وەختەنە".