گرڎوو ئەگەرەکا پنەما ماچا پەدەکە پێسە پیێوە پیری کەنەفتی سەروو یاگێوە کۊتەن، مەردەیش نزیکا، ئینەیچ حەقەتینێوەن کە بەرئەنجاموو غەڵەتوو سیاسەتی و هەرمانەکا ویەردەیشا هەم جە دلێینەو بنەیانی و حیزبەکەیش و هەم جە کوردسانەنە.
هۊرچنیەی و پرۆسەو دیموکراسی بە مانا حەقەتینەکێش بڕبڕەو پەشتەو گلێرگەین نەک پا وێنەی کە دەوڵەتا سەرمایەداری پۍ ۋێشا کەردەنشا بە چەترێوە پۍ پارێزنای مەسڵەحەتەکاشا جە وەختێنە بانگەشەو دیموکراسیەتی مکەرا کەچی پاڵپەشتۍ جەنگی و نائارامی وڵاتانۍ پۍ پارێزناو مەسڵەحەتەکاشا و چەمێشا ئاستوو تەماموو کۆمکوشییەکانە کۊرێنۍ ئینۍ پاسشا کەردەن دیموکراتی بۆ بە چێوگەلۍ ڕووکەش و گاڵتەجار
هەمان وێنایچ پۍ پەدەکەیچ بەشێوێوە ئەقڵانی دروسا ئەگەر جە کاریگەری سۆزی و دژبەری دورۍ گنمێوە متاومۍ ئا حەقەتینەما پۍ بەرگنۆ کە دیموکراتی تەنیا کلکێوەن پۍ ڕوکەشی ئنا جە ڕاسینە بیەیش نییا بەجۆرێوە پەدەکەش پاسە پنەکەردەن وێنایۍ جیاوازتەر پۍ ۋێش وەش بکەرۆ کە تەنیا بەشێوە کەموو دلۍ پارتەکەی و بنەیانەو ۋێش باوەڕش پنەش هەن ئەگەرنا جە حەقەتینەنە دلۍ گلێرگەو پانیشتوو کوردسانی و گلێرگەی میان دەوڵەتی و وڵاتا هەرێمینە جگە جە تورکیای پەدەکە پێسە پیێوە خانەنشینی کەنفتوو سەروو یاگۍ خەڵوەتگەو پیرا تەماشە مکەرا و گەرەکشانە دەسهۊرچنوو ۋێشا دلۍ بنەیانەکەینە بکەرا بە یاگەگیرش
هەر ئینەیچە پاسشەکەردەن پەدەکە و بنەیانەو بارزانیچ کەرۆ بە دووۍ باڵۍ،بەجۆرێوە نێچیرڤان بارزانی ئینا چنی ئانەی کە هۊرچنیەی بکریۆ چونکی ئەنەیاوان چانەی ڕەنگە ئا دەسهۊرچنەو سیستموو سەرمایەداری بۆ کە کریۆ بە یاگەگیر، چەولایچۆ مەسرور بارزانی و تاتەش ئینۍ چنی ئانەی کە هۊرچنیەی نەکریۆ چونکی مزانا ۋەرەتاوشا بەرەو ئاوابیەی ملۆ چونکی ڕا کۆنەکۍ هۊرچنیەی پۍ مەنەیۆی دەسەڵاتەنە ئیساتۍ کۊرۍ کریێنۍ و فاڕیایەکۍ مەنتیقەکەی چێوگەلۍ تەری موازۆ، پۊکاتی ئیساتۍ دەسشا گێرتەن بە چڵە پوشەکەیۆ و چن سیناروێشا ڕەنگە ئاماڎەکەردەبۆ چونکی فەلسەفەو پارتی هامشێوەو زاوڵێوە قیناوین ئانەی پۍ ۋێش نەبۆ مەبۆ پۍ کەسی بۆ.
چانەی مشۆ پەدەکە گێڵۊوە پۍ سەردەموو ففتی بە ففتی چونکی ئا حیزبە هەمیشە ئینا قاڵبوو کلاسیکینە و مەتاوۆ ۋێش تازە بکەرۊوە پۊکاتی گەرەکشا گێڵۊوە پۍ سەرەتای پۍ ئانەی مافوو چارەکە سەڎێوەتەروو دەسەڵاتی پۍ ۋێش بنیاڎبنیۊوە کە ئینە خیاڵ پڵاوین و ئەمریکا و ئەوروپا و ئێران چانەی یاوێنێنە پارتی چ مەعدەنێوەن.
یۊتەر جە سیناریۆکا وەشکەردەی جەنگی و پشێوییا جە هەرێموو کوردسانینە کە پۍ ئینەیشا پەدەکە ۋێش موهەندیسا و ئینەیچ هەم ئینا مەسڵەحەتوو ئاغاکەیشەنە کە ئەردۆغانا و ڕانیشاندەری هەمیشەیشا و ئیساتۍ ئاماڎەکاری کەرۆ پۍ ئەرەگیرکەردەو پانیشتوو کوردسانی و دمایی ئاردەی بە قەوارەو هەرێمی جە لێوەتەریچۆ پشێویۍ وەشکەرۆ پۍ ئانەی بواچۆ ئاژەکە جەبار نییا پۍ هۊرچنیەی کە ئینەشا ئەگەرش فرەتەرا چونکی ئیساتۍ کە تەرسی سەروو بنەیانەکەینە هامشێوەو دمارەکۊڵەکەی و بەچکەکاش مامەڵە کەرۆ کە چواردەورشا بە ئێر گیریابۍ.
ئینۍ گرڎ میاوناما پا حەقەتینیە کە پەدەکە تەرسێوە فرەش جە هۊرچنیەی هەن چونکی پۍ خەڵکی ئا حەقەتینە ئاشکرابی کە قسەکۍ مەرحووم و مام جەلالی جە چێشۆ سەرچەمەش گرتەبۍ کە واچۍ "پارتی چنی سینیچ هۊرچنیەی بکەرۆ هەر پارتی بەرۊشۆ " چونکی پارتی گردش کەردێبێنۍ بە پلۍ سردی پۍ سەرکۊتەی ۋێش بەڵام ئیساتۍ و ئەوسا فرە جیاوازا غەڵەتەکۍ وەڵتەروو پارتی، نەبیەی ستراتیجوو سیاسەتکەردەی و ۋۍ فەرزکەردەی و خزمەت نەکەردەی هاموڵاتیا و بڕیەو قوتوو هاموڵاتیا و تەنانەت کادر و ئەندامەکا ۋێچش، حساب نەکەردەی پۍ ڕائیەو یەک بەشەری، پاسشەکەرد کەیسوو تاوانەکاشا بلۆ دادگاو فیدڕاڵی ئا ئەمریکایەی کە خودوو پارتیش یاونا پا پلەو مەقامیە.
پۊکەی ئیساتۍ پەدەکە چەمەڕاو عاسا سیحراوییەکۍ حەزرەتوو موساین کە چا گێجاوۍ نەجاتش بڎۆ بەڵام محاڵا چونکی گرڎوو ئەگەرەکا پنەما ماچا مەرگوو پیا کەنفتەکەو خەڵوەتگەی پیری نزیکا، ئینەیچ حەقەتینێوەن کە دەرئەنجاموو غەڵەتی سیاسی و هەرمانەکا ویەردەیشا هەم جە دلێینەو بنەیانەی و حیزبەکەیشەنە هەم جە کوردسان و بەروو هامسای و جەهانیچەنە ئیسە پارتیشا قبول نییا چونکی نە ئینا بەرەو گەلەکەیشەنە نە ئینا بەرەو سیاسەتوو ئاڎیشانە بەڵکم ۋێش چنە فاڕیان کەتەنانەت ئا دیموکراتیەی کەردەنش بە کلک نەتاوۆ وێنەکەیچش زەریف بکەرۆ.
