سەرۆکی گرڎینوو پارتی ئیسلامی کوردسانی (پیک) حیکمەت سەربڵند بە ئاماژەدای بە هجوومە ئەرەگیریەکاو سەروو مەتینای باسش چانەی کەرد، ئا پارتۍ ۋەرا ۋەر پا هجوومە ئەرەگیریە مەمرداوە بەشداری ئا ئەرەگیریە مکەرا ۋەروودەم و تاریخینە گنانۍ ۋەروو ۋنەپەرسایۆ.

سەرۆکی گرڎینوو پارتی ئیسلامی کوردسانی (پیک) حیکمەت سەربڵند، جە دیڎارێنە چنی ئاژانسوو هەواڵوو فوراتی (ANF)ی باسش چانەی کەرد ئامانجی سەرەکی پلانەی تازۍ ئەرەگیریەو دەوڵەتوو تورکی دلېنەبەردەو قەوارەو پانیشتوو کوردسانین. جەختیچش کەردۆ کە هەڵوێسی هامبەشوو پارتە سیاسیەکا دژوو ئەرەگیری جە ئاستوو تاریخینە گرنگا و واتش، ئا پارت ولایەنۍ ۋەرا ۋەر پی پلانۍ مەمرداوە و بەشداریش چنە کەرا، ۋەروودەم و تاریخینە گنانۍ ۋەرو ۋنەپەرسایۆ و دادگایی کەردەی.

گەرەکشانە قەوارەو کوردەکا دلېنە بەرا

سەربڵند ئەرەیاۋناش، دەسەڵاتداری ئاکەپە-مەهەپەی بە مەڵامەتوو دۆڕنایش جە هۊرچنیەکانە تەنگەتاو بیەن، پەی کەمکەردەیۆ کاریگەری ئا شکسەیە پەنەوازش بە خوڵقنای شەپۆلێوە تازۍ شۆڤینیۍ هەنە و واتش، "جە لېوەتەرۆ دەسکەوت و سیاسەتوو کوردی ڕۆ دماو ڕۊی بەقوەتتر بۆ. پەی دلېنەبەردەو دەسکۆتەکا کوردی، دەس جە پیلانگێڵنای هۊرمەگێرا. چنی فرەو دەوڵەتا دیڎارشا ئەنجامدان. چنی حکومەتوو عێراقی و حکومەتوو فیدراڵی کوردسانیچ سەروو ئا بنەمایۍ سەودا و مامەڵە مکەرا. گەلوو کوردی دژوو ئانەی مشۊم بە هۆشمەندی نەتەوەیی و مسۆگەرکەردەی یۊبیەی نەتەوەییۆ جمۊوە. مردایۆ ۋەرا ۋەر بە دەوڵەتی ئەرەگیری و نیشاندای هەڵوێسی سەروو گرڎ کوردێوە فەرزا. دەوڵەتوو تورکی تەنیا هجووم مەکەرۆ سەروو پەکەکەی، تەنیا هجووم مەکەرۆ سەروو پانیشتی. ئامانجی سەرەکی دەوڵەتوو تورکی دلېنەبەردەو دەسکۊتەکا پانیشتیا، دلېنەبەردەو تەماموو گەلوو کوردین. گەرەکشانە قەوارەو پانیشتی دلېنەبەرا".

ئامانجوو دەوڵەتوو تورکی گرڎ کوردێوەن

سەربڵند ئانەش وست ڕووە کە دەوڵەتوو تورکی دەسکەوتەکا کوردا پەی هەمیشەییبیەو ۋێش پېسە مەترسی منیۊرە و واتش، "حەرپۊکەی هیچ پارت و مەنتیقێوە لاشۆ جیاوازنییا. هجووم کەرۆ سەروو گرڎ کوردێوە. ئەگەر جە ۋەرا ۋەروو ئا هجوومانە پېسە پارتە کوردیەکا هەڵوێسی هامبەش نیشانە نەڎەیمۍ ئێمە ۋەروودەم و تاریخینە گنمېنە ۋەروو ۋنەپەرسایې گۊرەی. پارتە کوردیەکۍ هەر شۊنۍ جەهانینە هەنۍ، مشۊم دیپلۆماسیێوە هامبەش بەرانۍ ڕاوە. ئا هجوومە ئەرەگیریۍ تەنیا دژوو پەکەکەی نییەنۍ، با کەس نەگنۆ غەڵەتۆ. ئامانج چنەش گرڎوو دەسکۊتەکا کوردینۍ. چ هێز و پارتێوە ۋەرا ۋەر پا هجوومە ئەرەگیریا بێدەنگ بۆ، ۋەروودەم و تاریخینە ۋەرپرسیار بۆ. گەلوو کوردی جە سەڎەو ٢١ینە هېقم و ڕێکوزیان. دەوڵەتوو تورکی عال ئانەی مزانۆ. مردایۆ و ۋێڕاگری بە رۆحی نەتەوەیی، گەلەکەیما میاونۆ بە سەرکۊتەی".