ئەندامو دەسەو ڕاوەبەری نوسینگەو یاسایی ئامەدی پارێزنەر باوەڕ مزراک پېوەس بە ئازادی ڕابەر ئاپۆی و مژارو مافو هیوای قسێش کەردۍ و دەسنیشانش کەرد دەسەڵاتی تورکی ۋێش جە پیادەکەردەی مافەکا مرۆڤی دزۆوە کە مافۍ گەردوونیێنۍ و بنەڕەتو مافەکا مرۆڤینۍ.

پارێزنەر مزراک ئاماژەش پانەیەدا وەڵتەر بە پاو یاسا بنەڕەتییەکا تورکیای سزاو زینانی هەمیشەیی قورسی بییەیش نەبێ، سزای هەمیشەیی پەی ماوەو ٣٠ ساڵا بێ، یان سزاو جە قەنارەدای بێ و جە درێژەنە ئینەش وات: " دماو دادگایکەردەی ئێژا ئۆجالانی دادگاو مافەکا مرۆڤو ئەورووپای (DMME) بەپاو یاساکا ئەورووپای سزاو جە قەنارەدایش لابەرد و فاڕاش پەی سزاو زینانی هەتا مەردەی جە زینانەنە، دماتەر پارێزنەرا ئێژا ئۆجالانی سکاڵاشا جەدژو ئی قەرارەیە تۆمارکەرد، جە وەراوەرەنە دادگاو مافەکا مرۆڤو ئەورووپای (DMME) بە قەرارێ ئاماژەش پانەیەدا سزاو زینانی کەردەی هەمیشەیی و سیستەمو جابەجێ کەردەو پاشلکاریی و ئەشکەنجەی."

مافەکێ مرۆڤ پاشێلێ کریانە

مزراک یاڏش وستیمێ ساڵەو ٢٠٢٤ینە  دادگاو مافەکا مرۆڤو ئەورووپا (DMME) داواش جە تورکیای کەردە پێوەس بە مافو هیوای جە یاساکا وێشەنە هەموارشا کەرۆنە و پەی ئینەی تا ئەیلولو ٢٠٢٥ کاتش دان بە تورکیای پەی ئانەی  ئەنجامش ڏۆنە ئینەش وات: "چنی قسێ باخچەلیی ئی بابەتە بییەن بە ڕۆژەڤ، پێسەو پارێزنەرا ئینایمێ جا بڕوێنە مەبۆ مافو هیوای تێکەڵ بە پرۆسەکەی کریۆ و کریۆنە موزایەدەی سیاسی، وە مشۆم مافو هیوای جە چوارچێوەو مافە بنەڕەتییەکانە هورسەنگینۆنە. مافو مرۆڤی کە بناغەو مافەکا ئینسانی و گەردوونییا. بەڵام سەدێوەن بە مەڵامەتو پەرسە س کوردیۆ یاسا ئینسانییەکێ جە تورکیانە پێسەو بازاریێ بەکار مارانە و چی پرۆسەو ئیسەینە دیسان ئی داوێ هەنێ، دۆڵەت پەی ئانەی پرۆسەکەی  بە ویستو وێش بەرۆ ڕاوە و ڕێکوزتەی چەک بنیۆرە، ئی بابەتەیە پێسەو بازاریکەردەی و هەرەشەکەردەی بەکار مارۆنە. کاتێ ئینسان تەماشە و ئی قۆناغ و ململانێیا ئیسەی مکەرۆ ، فرە بە ئاشکرا بەرگنۆنە پەی ئانەی ئێژا ئۆجالان تاوۆنە پرۆسەکەی بەرۆڕاوە مشۆم تاوۆنە بەشێوێوە ئازادانە هەرمانەکاش بکەرۆ."

پارێزەر باوەڕ مزراک ئاماژەش پانەیەدا گرڏ جۆرە فشارێ سەرو ئازادی و مافەکا مرۆڤی  تورکیانە هەنێ کە مافو هیوایچ جا چوارچوەنە پاشل کریۆنە.