پارێزنەر جان فێرمۆن ئاماژەش پانەیەدا کە دۆڵەتو تورکی یەرێ جۆرێ تاوانێ مییاننەتەوەیی جە سەرنیشتوو و وەرکەوتوو سووریای ئەنجام مڏۆنە، تاوانەو جەنگی، تاوانە جە دژو مرۆڤایەتی و هرووژمکەردەی و واتش: "وەرپرسیارەتی ئی تاوانا تەنیا جە ئاستو سەروازینە نییا، دۆڵەت ب
سەرو تاوانەکا دۆڵەتو تورکی جە هەرێمەکا سەرنیشتوو و وەرکەوتوو سووریای و هەرێمە ئەرەگیرەکا ئەنجامش مڏۆ، چنی پارێزنەر جان فیرمۆنی کە یۆن جە پارێزنەرا سەندیکاو برۆکسلی قسێما کەردێ.
'وەرپرس باڵاو تورکی وەرپرسیارا'
پارێزنەر جان فێرمۆن ئاماژەش پانەیەدا کە دۆڵەتو تورکی جە هەرێمەکا سەرنیشتوو و وەرکەوتوو سووریای یەرێ جۆرێ تاوانێ مییاننەتوەیی ئەنجام مڏۆنە و ئی تاوانێشە پاسە ڕیزکەردێ: "یوەم تاوانەو هرووژمکەردەی. هرووژمەکێ دۆڵەتو تورکی دەسوەردێوە سەروازی جە دژو سەروەری وڵاتێوە سەربەخۆی. تاوانەو هرووژمکەردەی ڕا وەردەموو گرڏ تاوانێوە تەرێ مکەرۆوە و ئامانجەکا وێش بە دی مارۆنە.
دووەم تاوانە جە دژو مرۆڤایەتی. ئی تاوانێ، بە شێوێوە سیستەماتیک کریۆنە و وەرو ئینەی بە پێناسەو تاوانێ جە دژو مرۆڤایەتی یاگێ گێرۆنە. بە تایبەتی یاگێ کوردانە، عەرەبی ئەرەنیشتە مکەرۆ و پەی ئینەیچ کۆچکەردەی سەپنۆنە و فاڕیاو دیمۆگرافیش ونە گنۆوە.
یەرەم تاوانەو جەنگی ئەنجام مڏۆنە. چێگەنە باسەکە تاوانەو جەنگی تاکەکەسی نییا، تاوانەو جەنگی فرەلایەنینە. بڕێ تاوانێ جەنگێ هەنێ پەی ئانەی گەلی کۆچبەر بکەرا پلانەش پەی منریۆرە. حەر پۆکەی گرڏو ئی تاوانا پێوەرە لگە دریێنێ".
پارێزنەر فێرمۆن ئاماژەش پانەیەدا کە وەرپرسا ئی تاوانا جەنگی ڕاستەوخۆ دۆڵەتو تورکین و واتش: "ئی تاوانێ تەنیا جە لایەنو سەروازییۆ ئەنجام مەدریۆنە. بە ڕاسی بە شێوێوە سیستەماتیک و پلان مچیێ ئەنجام دریێنێ و تاوانەی پی جۆرە جە لایەنو ڕاوەبەرا دەسەڵاتدارییۆ ئەنجام مڏریا.
'قەرارەکا کە جە دادگاو گەلیۆ بەرێ مشا گرنگێنێ'
پارێزنەر فێرمۆن کە دۆسێدارا و جە دادگاو هەمیشەیی گەلا وەرنیشتینە یاگێش گێرتێنە، ئاماژەش پانەیەکەرد کە قەرارەکێ کە جە دادگاوە بەری مشانە گرنگێنێ و واتش: "هیوادارەنا ئا چێوێ کە ئاشکراما کەردێنێ پێسەو تاوانەو جەنگی و تاوانەو دژ بە مرۆڤایەتی دانشا پۆرە نریۆرە. پەنەوازا ئی قەرارە بۆ بە ئامرازێوە کە حکومەتەکەما جە دژو تورکیای هەڵوێس هەرگێرۆنە. خاڵەی گرنگە ئانێنە کە ئا قەرارێ چی دادگایۆ بەرێ مشانە ڕەوایەتی بە ئەوەکۆشایما دۆنە".
'ئەوەکۆشای کاریگەریش بۆنە'
پارێزنەر فێرمۆن جە دماینو قسەکاشەنە واتش: "نەتەوەیۆگێرتەکا وەرپرسیارەتیش هەن، بەڵام پێسە هەمیشە ماچونە، هێزەکەش پێسەو پۆلیسەکا نەتەوەیۆگێرتەکا نییا. جە دماینە یاسا بە ئەوەکۆشای گەلا پارێزیۆنە. گەل ئانێنێ کە فشار جە حکومەتەکا بکەرا پەی ئانەی هەڵوێس هورگێرانە، ورەتەو چەکی مدرنانە و پەیوەندییە دیپلۆماسییەکا بچڕنانە. میکانیزمێوە کە ڕێز جە یاسا مییاننەتەوەییەکا گێرۆنە، وێش بە نەتەوەیۆگێرتەکا نەسپارۆ یان پۆلیسو نەتەوەیۆگێرتەکا. وێش بە ئیرادە و چالاکی گەلا سپارنۆنە".
