هیدایەت تاهیر چەمڎاری سیاسی جە شاروو کەرکووکوو پانیشتوو کورڎسانینە، جە جەمپەنەکەوتەیۍ تایبەتنە چەنی ئاژانسوو هەواڵوو فوراتی (ANF)، سەبارەت بە پەرسەکا پیسە بەرڎەوامیی هجوومەکاو دەوڵەتی ئەرەگیروو تورکیای بە هامکاریی نۊکەرەکاش جە پانیشتنە بەسەرپەرشیی پەدەکەی، هەوڵەکێشا بەرڎەوامێنۍ جە خەتەو خیانەتی پەی تێکدای یەکڕیزیی نەتەوەیی کورڎی وەروو ڕازیکەرڎەی دڵوو ئەرەگیرا، گرنگیی یەکڕیزی و یەکوتاری هێز و لایەنە سیاسیەکاو حەرچوار پارچەو کورڎسانی پەی بەقووەتیی کورڎی، سەرەمڕیی حەوڵ و کۊشیای پەی نزیکبییەیۊ تەماموو لایەنە سیاسییەکا سەروو بنەماو مسڵەحەتی نەتەوەیی و یۊبییەی نەتەوەیی کورڎی و چند پەرسێوە تەری دوا.

دژ بە دوژمناو گەلەکەیما کۊشییەیمێ

هیدایەت تاهیر چەمڎاری سیاسیی نزیکوو یەنەکەی، سەبارەت بە گرنگیی نزیکبییەیۊ هێزە کورڎییەکا پەی کۊشیای دژ بە دوژمنا، پەی ئاژانسوو هەواڵوو فوراتی واتش: "بەدڵنیاییوە دیارا یۊبییەی نیشتمانیی کورڎسانی هەرمانەشسەروو ئانەی کەرڎێنە، کە هامکاریی یەرە پارچەکەی تەروو کورڎسانی کەرۊ، ئا هامڕۍ کە کۊشیا پەی کورڎایەتی پەی مافە ڕەواکاشا بە درێژای ئا تارێخییە چە پێسە جەنابوو "مام جەلال"ی چە پێسە بەڕێز "بافڵ تاڵەبانی"ی حەوڵۍ ئانەی مڎا بە بەرڎەوامی هامکاری و گفتوگۊنە با و چا شکڵە کۊشیاینە با، دژوو گرڎوو ئا شۊڤینییا کە دژوو میللەتەکەیما مرڎاوە، ئی هەڵوێسێچە دوژمنۍ پێسە تورکیای پەنەشا وەش نییا".

هجوومەکاو تورکیای بیێنۍ یاگۍ دڵتەنگیی گرڎوو خەڵکوو کورڎسانی

سەبارەت بە دژایەتیی دەوڵەتی ئەرەگیروو تورکیای دژ بە پەیوەندیی یەنەکە چەنی وەرنیشتوو کورڎسانی و هامکاریکەرڎەیشا چەنی هامپەیمانیی دژوو داعشی، هجووموو سەروو تەیارەخانەو سلێمانیی ئا چەمڎارە ئاشکراش کەرد: " دیارا وەڵاتوو تورکیای ئینەش پەنە وەش نییا، کە ئا هامکارییۍ پێشکەش بە وەرنیشتی و بە پارچەکای تەروو کورڎسانی کریا پەوکای بە بەرڎەوامی هجووم کریۊ سەروو ئا لایەنە کورڎسانییا، کە حەوڵۍ یەکڕیزی و هامکاریکەرڎەی یۊترینی مڎا، چە جە ڕاو هجووموو ئەرەیاونایۊ یان سیاسیوە، کە ئی جارەیچ بەداخۊ جە ڕاو هجوومی سەروازیوە، هجووم کریا کە تەیارەخانەی میاندەوڵەتیی سلێمانی کریا ئامانج، ئینەیچ بییەن یاگۍ نیگەرانیی گرڎوو خەڵکوو کورڎسانی بەتایبەتی خەڵکوو سلێمانیی".

دەسێوە دلێمانە هامکاروو پەلامارەکاو تورکیاین، ئینەیچ ئەوپەڕوو خیانەتین

حەرپاسە "هیدایەت تاهیر" چەمڎاری سیاسی سەبارەت بە هامکاریکەرڎەی دەوڵەتی ئەرەگیروو تورکیای لاو پەدەکەیۊ پەی کەرڎەی هجوومی دژ بە گەلوو کورڎی، ئاشکراش کەرد: "بە حوکموو ئانەی شاروو سلێمانی خەڵکی فرە کۊشیا و ڕۊشنویرێنۍ، ویرما نەشۊ سەرڎەموو بەعسیچنە سلێمانی فرەو جارا گیچەڵۍ (ئیستفزاز)ێشپەنە کریێنۍ، تەنانەت زانکۊو سلێمانی فاڕیاوە پەی هەولێری، پێسە سزێوە چونکوم ئا وەخت داواو مافوو گەلوو کورڎی و مافوو حەرچوار پارچەو کورڎستانی کەرێنی، ئیتر چێوە ڕژێموو بەعسی حەوڵۍ سزادای خەڵکوو کۊشیاو سلێمانیی دۍ، ئیساتێچ هەمان چێولاو دەوڵەتوو تورکیایۊ دووەبارە بۊوە، بە هامکاریی لایەنێوە دلۍ، پەوکای بەدڵنیاییوە ئینە یاگۍ نیگەرانیین، کە دەسێوە دلۍ هەن هامکارا چی پەلاماراو دەوڵەتوو تورکیاینە، کە ئینە بەڕاسی ئەوپەروو خیانەتین ئینە پەنەش ماچا خیانەتی گەورە و دژوو میللەتەکەیت، دژوو خاکەکەیت ئینە یاگۍ قبووڵی نییا".

بەرڎەوامۍ بیمۍ سەروو ڕێبازوو بەدیئارڎەی یەکڕیزیی نەتەوەیی

حەرپاسە سەبارەت بە بەرڎەوامیی حەوڵەکا پەی بەدیئارڎەی یەکڕیزیی نەتەوەیی، ئا چەمڎارە سیاسیەو نزیک جە یەنەکەی واتش: "یەنەکە ویرۍ چانەی کەرۊوە کە جە ڕاو گفتوگۊی دیموکراسییانەیۊ بتاوۊ مافوو گرڎ کورڎۍ بەدەس بۍ و هێزە کورڎییەکۍ جە یۊترینی نزیکۍ باوە، کە وەڵتەریچ مام جەلال حەوڵۍ ئانەیش دێنۍ، کە جە ڕاو دبلۊماسیوە بەڕێز ئۊجەلان جە زینداننە بۍ جبەر و بە هەمان نۊع بە هەمان تایپ پەشتیوانیی بەڕێز "قاسم لۊیی"یش کەرد وەرو ئانەی درێژە بە کۊشیای بڎۊ،تا مافەکاو وەرکەوتی بەدەس بەیا، وەلێم عومر باقی نەبی، ئێمەیچ بەرڎەوامۍ بیمۍ سەروو ئا ڕێبازەیە پەی هامکاریکەرڎەی و یەکڕیزی هێزە کورڎییەکای تەریچ".

ڕووەو ئا لایەنا و وەڵاتا مردمێوە، کە دژایەتیی میللەتوو کورڎی کەرا

حەرپاسە سەبارەت پا دژایەتییەیە، کە لاو پەدەکەی و دەوڵەتی ئەرەگیروو تورکیایۊ کریۊ، ئا چەمڎارەو یەنەکەی واتش: "ئینە بییەن یاگۍ نیگەرانیی بڕۍ لایەنا، کە چەمێشا پی وەڵیکەوتەی و سیاسەتییە ور نمەیا، کە یەنەکە دەسش داننە پەی نزیکبییەیۊ لایەنە کورڎستانییەکا، دڵنیانا پێسە کاک بافڵی وات 'درێژە مدەیمۍ پا سیاسەتوو وێما یا کورڎسان یان نەمەنەی' ئینە بەڕاسی ئەوپەڕوو دروشمین کە تاومۍ (تەحەدا)و گرڎوو نەیارەکاش پەنە کەرمۍ (تەحەدا)و گرڎوو ئا لایەنا و وەڵاتا کەرمۍ کە دژایەتیی میللەتوو کورڎی کەرا".

پەدەکە ئامادەن دەس وزۊ دلۍ دەسوو دوژمنا دژ بە گەلەکەیش

حەرپاسە نامەبریا باسش جە بەرڎەوامیی خیانەتەکاو پەدەکەی کەرد، جە دەسوستەی دلی دەسوو دوژمناو کورڎیوە، و واتش: "بەداخۊ مشکیلەکە ئانەن لایەنێوە کورڎسانی بە بەرڎەوامی حەوڵی ئانەیە مڎۊ دژایەتیی لایەنەکاو دلۍ کەرۊ، ئامادەن دەس وزۊ دلۍ دەسوو گرڎوو نەیارەکا و دوژمنا، ئێمە بەپراکتیکی دیما چە سەروو ئاستوو مەنتێقە کێشەدارەکا (مەنتێقە کورڎسانییەکاو جبەروو هەرێموو کورڎسانی) کە بەداخۊ پیلانگێڵنایۍ گەورە جە کورڎی کریا، کە بی بایسوو جەدەسدای ٥١٪ی خاکوو پانیشتوو کورڎسانی (بۊنەو ڕیفراندۊمیوە)".

پەدەکە کەرکووکش کەرڎەن قوربانیی بەرژەوەندیی حیزبیی وێشۊ

حەرپاسە سەبارەت بە کاریگەریی دەوڵەتە ئەرەگیرا و خەتەو خیانەتوو پەدەکەی سەروو بەرشیەی کەرکووکی دەسوو کورڎینە، ئا چەمڎارە سیاسییەو شاروو کەرکووکی ئاشکراش کەرد: "بۊنەو دەستێکەڵکەرڎەی و مرڎایۊ دژوو یەکڕیزیی گەلەکەیما و هەمان وەختنە پێسە شاروو کەرکووکینە وینمێش، بە هەمان نۊع دەستێوە باڵا هەن، کە ڕا مەدۊ پارێزگارێوە کورد بنریۊرە و پەشتیوانی چا پارێزگارە بەوەکالەتە عەرەبەیە کەرۊ، پەی ئانەی مەرجەکێش قبووڵۍ کریا و تەنیا وێش باڵادەس بۊ، پێسە ئاغای ورسونیشت کەرۊ، کە حەرچێوۍ لاو ئادیوە بەر پشۊ لاو ئێدیوە ڕسمی کریۊ، ئینە بەڕاسی چی سەرڎەموو دیموکراسینە قابیلوو قبووڵی نییا، یۊبییەی نیشتمانیی کورڎسانی دایمە چەنی یەکڕیزی بییەن و دایم چەنی خەباتی و کۊشیای سیاسی و دیبلۊماسی بییەن، ئا لایەنەو دلۍ ڕاگێری کەرۊ جە پڕۊسەو یەکڕیزیی گەلوو کورڎی تا بەرەووەڵی نەلۊ".

پێویسا کورد یەکڕیز و یەکوتار بۊ وەروو ئانەی یاگێش بەقووەتە بۊ

سەبارەت بە گرنگیی یەکڕیزیی نەتەوەیی کورڎی، چی قۊناغەنە، جەختش جە گرنگیی یەکڕیزی و یەکوتاریی کورڎی کەرڎۊ و واتش: "جە گرڎ وەختێوەنە یەکڕیزی پەی کورڎی فرە گرنگا بەتایبەتی چی قۊناغەنە، کە قۊناغێوە هەستیارا مەنتێقەکە بەرەو فاڕیایۍ 'حەتمی' هەنگامە منیۊ، وەرکەوتوو دلێڕاسەی و ئا مەنتێقۍ، کە پەیوەسێنۍ بە کورڎیوە ئینۍ فاڕیاینە، چی فاڕیاینە پێویسا کورد یەکڕیز و یەکوتار بۊ، وەروو ئانەی  یاگێش زیادتەر بەقووەتە بۊ، لاو وەڵاتاوە حیسابی زیادتەر پەی یاگەکێش کریۊ".

پەدەکە پەی ڕازیکەرڎەی تورکیای حەوڵۍ تێکدای یەکڕیزیی کورڎی مڎۊ

حەر درێژەو قسەکاشنە سەبارەت بە گرنگیی یەکڕیزیی گەلوو کورڎی و حەوڵەکاو خەتەو خیانەتوو (پەدەکە)ی پەی تێکدای یەکڕیزیی کورڎی، پەی ڕازیکەرڎەی دەوڵەتوو ئەرەگیروو تورکیای "هیدایەت تاهیر" چەمڎاری سیاسی، ئەرەیاوناش: "وینمۍ کە حەر وەختێوە کە یۊگێرتەی و نزیکبییەیۊ لایەنە کورڎستانییەکا ڕووە بڎۊ و پارچەکاو کورڎسانی جە یۊی نزیکۍ باوە، ئانە لایەنێوە و تاقمێوە هەوڵۍ مڎا، ئا یەکڕیزییەو لایەنە کورڎییەکا تێک بڎا، پەی ڕازیکەرڎەی ئاغاکاشا (دەوڵەتوو تورکیای)، وەڵتەریچ دیما وەڵاتا پێسە تورکیای مشکیلەش پەی وەش کەرا و دماتەریچ ئامادۍ نیەنۍ چارەسەرش کەرا".

س.ز