بە مەڵامەتوو هرووژمە ئەرەگیریەکا دۆڵەتو تورکیوە سەرو خاکو پانیشتوو کوردەسانی بەهەزاران ئەرەنیشتۍ دەگایەکا ناچارۍ کریێنۍ کە دەگایەکاشا جیابازا، دەگاو دەرگەلێ یووەنە چا دەگایا کە جە لایەنو پەدەکەی و دۆڵەتو تورکیوە چۆڵەکریێنە.
سوپاو تورکی ئەرەگیری پانیشتوو کوردەسانینە پەی ئەرەگیری و تاڵانکاری جارێوەتەر هرووژمش کەردەن سەرو مېڎانوو مەدەنییەکا. دیمەنەکۍ دەگاو دەرگەلێ نیشانەش مڎا کە یانە و زەمینەکۍ دەگا نشینەکا بە چ جۆرۍ تاڵان مکریا.
سوپاو تورکی ئەرەگیری جە ٢٣ۍ نیسانو ٢٠٢١یوە بە مەرامو ئەرەگیری هرووژم مکەرۆ سەرو هەرێمو مەتینای. ئی ئۆپراسیۆنە ئەرەگیریۍ جە سەرنیشتوو کوردەسانی جە ١٦و حوزەیرانو ئێساڵیوە ۋەرفراوانتەرۍ بیێنۍ و پڕێنێوە پەی خاکو پانیشتوو کوردەسانی. بەتایبەت مەتینا، گۆلکا، شێلازۍ، دەرگەلێ، بازێ بیێنۍ بە ئامانجو ئەرەگیرکەردەی. هەر جە ئەوەڵ ڕۆو ئۆپراسیۆنەکەیۆ بە چڕی هرووژم مکریۆ سەرو یاگۍ ئەرەنیشتەبیەی و بە تاڵانکەردەی سەرچەماکاو ژیۋای، دەگا نشینەکۍ ناچار بە کۆچبەری مکریا.
سەرچەمە دلێینەییەکۍ ئەرەیاۋناشا هرووژمێوە قورس کریان سەرو یانەو مەنزڵو دەگانشینەکا دەرگەلێ.
سوپاو تورکی و پەدەکە هەوڵ مڎا دەگاکۍ بە دەگا نشینا چۆڵبکەرا، بەڵام خەڵکو دەگایەکا هەرجۆرە دەرفەتێوەشا پەی ڕەخسیۆنە گێڵاوە پەی سەرو یانەو مەنزڵو ۋێشا. ئاشکرا بی کە سوپاو تورکی بە فڕۆکەی جەنگی هرووژمش کەردەن سەرو یانە و مەنزڵو دەگا نشینەکا و دماتەر تاڵانێشا کەردێنۍ و کەلوپەل و پەنەوازیەکۍ دەگانشینەکاشا دزیێنۍ. ئینە فرە بە ڕۆشنی جە دیمەنەکانە بەرگنۆ.
پەدەکە هامبەشا جە تاڵانکارییەکانە
دەگا نشینەکۍ ئاماژەشا پانەی دا کە دۆڵەتو تورکی جە ڕاو پەدەکەیۆ داواشا ۋنەکەردێنۍ کە دەگاکاشا چۆڵۍ بکەرا. بەڵام کاتێ دەگا نشینەکۍ گێڵاوە پەی دەگاکاشا موینا هیچ چێوۍ پېسە ۋێش نەمەنەن و تاڵان کریان. پۊکەی پەدەکەیچ چی تاڵانییە بە ۋەرپەرس موینا.
یاگۍ ئاماژەینە، وەڵتەر جە دەگاو دەرگەلێنە چڼین کەسۍ بیێنۍ بە پێشمەرگۍ و جە هەرێمەکەنە جەنگشا کەردەن. بەڵام ئارۆنە بەمەڵامەتوو داردەسەیی و خیانەتو پەدەکەیۆ خاک و خەڵک، ۋنی و ڕەنجو سەڎان وڵاتپارێزنا تاڵان کریان و ورەشیان.
