پێگەو زانیارییەکا زیڼانیا سیاسی و مەزهەبی (هیوا)ی کۆت هەرمانە
تۆڕەو مافو مرۆڤوو کورڎەسانی پێگەو زانیارییەکا زیڼانیا سیاسی و مەزهەبی کورڎیش کەرڎۆ، کە مکریۆ چا ڕێوە گرڎوو داتا و زانیارییەکا پێوەس پا زیڼانیە کورڎا جە زیڼانەکا دۆڵەتو ئێرانینە بێزیۆوە.
جە دەیەمین ساڵەو ئەرەمەرزنایشەنە تۆڕەو مافو مرۆڤوو کورڎەسانی ئەرەیاۋناش، پێگەو زانیارییەکا زیڼانیا سیاسی و مەزهەبی کورڎی جە ئێرانەنە (هیوا) دەسش بە هەرمانۍ کەرڎ. ئی پێگە جە قۆناغی یوەمەنە نامونیشانو زیاتەر جە ١٠٠ زیڼانیا و دەسبەسەرکریایا سیاسی و مەزهەبیی کورڎی و ڕۊشنکەرڎەیۆ پرۆسەو دەسبەسەرکەرڎەی، دادگاییکەرڎەی، سزادای و گێرتەیشا جە ۋێش مگێرۆ. بەڵام مەرامو ئێمە کەرڎەیۆ لاپەڕەو هەرچی زیاتەرا پەی گیریایا و زیڼانیا سیاسی و مەزهەبیی تەریچ و پرۆژەکە تەنیا جە گیریایا ئیسەینە کوڵ نمەبۆوە."
ئی پێگە جە قۆناغی یوەمەنە بە دووۍ زۋانۍ فارسی و ئینگلیزی وزیان ۋەرو دەسا و جە ئاینڎێوە نزیکەنە بەشی کورڎیچ سەرو ماڵپەڕو ڕێکوزیاکەیۆ زیاڎ مکریۆ.
تۆڕەو مافو مرۆڤوو کورڎەسانی ئەرەیاۋنانیچش: "ئێمە «هیوا»ما بە هیواو ئازاڎبیەی زیڼانیاوە دەس پنە کەرڎەن، هەرچنە داخەم نمەشۆ جە پرۆسەو ئاماڎەکەرڎەی پرۆفایلو زیڼانییەکانە و چی مانگا دماینە سزای نامرۆڤانە و جە قەنارەدای دوۍ چی زیڼانیا، کامەران شێخە و ڕەزا ڕەسایی، کە جە پرۆسێوە دادوەریی نادادپەروەرانەنە سەرشارە سەپیابۍ، جابەجێ کریا."
تۆڕەو مافەکا مرۆڤوو کورڎەسانی داوا جە گرڎ کەسۍ مکەرۆ کە پەی دۆڵەمەڼکەرڎەی پێگەو زانیارییەکا زیڼانیا سیاسی و مەزهەبیی کورڎی (هیوا) یاردەیشا بڎا و ئەگەر ۋێشا یان یۆ جە کەسە نزیکەکاشا ئەزموونو دەسبەسەرکەرڎەی و گێرتەیشا جە زیڼانەکا کۆمارو ئیسلامیی ئێرانینە بی، بەپاو فۆرمێوە کە جە هیوانە نریانەرە، نامونیشان و زانیارییە پەنەوازیەکێشا پەی بکیانا.
تۆڕەو مافەکا مرۆڤوو کورڎەسانی رێکوزیێوە سەربەخۆی قازانجنەویستی بێلایەنا کە ساڵەو ٢٠١٤ ی جە وڵاتو فەرەنساینە بە شێوێوە ڕسمی و یاسایی ئەرەمەرزیان و "هەرمانە مکەرۆ پەی برەوپنەدای مافەکا مرۆڤی و بەبەڵگەکەرڎەی ئا پاشێلکاریا جە کورڎەسان / ئێرانەنە ئەنجام مڎریا."
