پێخاموو زینڎانیېوە کە پۍ ڕابەروو گەلوو کوردی عەبدوڵا ئۆجالانی نویسیابۍ، بە بەهانۍ 'نیگەرانی جە نەواخنەکەیش' دەسش سەرەرە گیریابۍ، دماتەر بە شەرتەو ئانەی بڕۍ کەلیمۍ دلۍ پېخامەکەی لابریا، ڕووانە کریابۍ.
زینڎانیېوە بە نامۍ سەلامی چیفتچی کە جە زینڎانی ژمارە ١ جۆروو تی رحاینە زینڎانیکریان، جە ١٨و کانونوو یووەم و ٢٠٢٣ پېخامېوەش پۍ ڕابەروو گەلوو کوردی عەبدوڵا ئۆجالانی نویستەبۍ، کە جە زینڎانوو جۆروو ئێفی جە ئاسایشوو تنوو ئیمراڵینە زینڎانیا و زیاتەر جە ٣٤ مانگان حیچ هەواڵێوەش مەزانیۆ.
دەسەو کارگێری و چەمڎاری زینڎانی دەسشا سەروو پېخامەکەیرە گرتەبۍ.
کۆمیسیۆنوو ۋەنایۆ پېخامەکا زینڎانی بە بانگەشەو "نیگەرانی جە نەواخنوو نامەکەی" دەسشا سەروو پېخامەکەیرە گرتەبۍ و ڕاشا نەڎابۍ رەوانە کریۆ. پا مەڵامەتۆ چیفتچی جە دادگاو جابەجێکەرڎەی سزاو رحای تانەش چا قەراریە دابۍ.
دادگایچ ئا داوېشە پەسەند کەردەبۍ، قەراروو دەسەو کارگێڕی و چەمڎاری زینڎانەکەی ڕەڎش کەردەبېوە، بەڵام ئا بەشۍ کە پېسە "مایەو نیگەرانین"ۍ دیاریۍ کریۍ و جە پېخامەکەنە ئەسڕیېوە و پا جۆرە و بە سانسۆرکریایی پېخامەکە پۍ ئیمراڵی کیانیا.
