پەکەکە ئەرەیاۋناش، ۋنەپەرسایۆ جە کۊکوشیەکا پاریسی بەردەوام بۆ و جەختش کەردۆ، "ئانە ئامێتەو هەڵمەتەی میان نەتەوەیی بۆ و کۊشیای پۍ ئازاڎیی جەستەیی ڕابەر ئاپۆی و چارەسەری پرسوو کوردی جە گرڎ مېڎانېنە سەروو خەتەو سەرکۊتەی ملۊڕاوە".
کۆمیتەو ڕاوەبەری پەکەکەی ئەرەیاۋناش، "جە ئەرەمەرزنەراو پارتەکەیما هامڕا سەکینە جانسزە (سارا) و جەنگاوەرەی شۆڕشگێڵنە هامڕا فیدان دۆغانە (رۆژبین)ە و لەیلا شایلەمەزە (رۆناهی)ە جە ٩و کانونوو دووەم و ٢٠١٣ پاریسەنە جە لایەنوو ئەنداموو رێکوستەی هەواڵگری تورکی (میت) عومەر گونایوە تیرۆر کریۍ. ١١ ساڵۍ سەروو ئا کۊکوشیەیرە ویەرڎەن. ۋەروو ئانەی دەوڵەتوو فەرەنسای کۊکوشیەکەش ڕۊشننەکەردۆ و ۋنەپەرسایش جە ۋەرپەرسا کۊکوشیەکەی نەکەرڎ، هەر ئا هێزۍ جە ٢٣ۍ کانونوو یووەم و ٢٠٢٢ ېنە دیسان هەر جە پاریس ئەندامەو دەسەو ڕاوەبەری کەجەکەی ئەڤین گۆییە و وڵاتپارێزا میر پەروەر و عەبدولرەحمان کزلشا تیرۆر کەردۍ. پی جۆرە نزیکتەرین تاریخوو پاریسی بی بە قۆناغوو تیرۆرکەردەی وڵاتپارێزا و ژەنە شۆڕشگێڵنەکا کوردی".
ئێمە ۋنەپەرسای جە مەژگی کۊکوشی گرڎ مېڎانېنە بەرمۍ وەڵېوە
جە ئەرەیاۋناکەو پەکەکەینە ئامان، "وەڵۍ گرڎ چېوێنە سەرەڕاو ئانەی بکوژ و هێزەکۍ پەشتەو کۊکوشیەکا ئاشکرۍ کریېنۍ، دەوڵەتوو فەرەنسای کە هەردووە کۊکوشیەکۍ پاریسیش دادگایی نەکەردۍ و حۊڵشدا پەردەپۆششا کەرۆ، ۋەروو ئانەی پەنەوازیەکۍ دادپەروەری و یاسایش جا بەجۍ نەکەردۍ، ئێمە بە تنی شەرمەزارش کەرمۍ. ئەرەیاۋناکەی پی جۆرە بەردەوام بۍ؛ "دەوڵەتوو فەرەنسای کۊکوشیەکەش ڕۊشن نەکەردەبۊوە و ۋنەپەرسایش جە ئەنجامدەراش نەکەردەبۆ، پېسە جمیەری، گەلی و مرۆڤایەتی دیموکراتیکی ١ دانە ساڵا پەی ڕۊشنکەردەیۆ کۊکوشی پاریسی و ۋنەپەرسایۆ جە بکوژا ئێمە کۊشیەیمۍ؛ سەروو بنەماو ئازاڎیی ژەنۍ ئیکۆلۆژی کۆمەڵایەتی ئێمە جە گرڎ مېڎانېنە پەرە بە جمیەری و جمایۆ دیموکراسی و ئازاڎیی مڎەیمۍ. جە ساڵەو ١٢ەمینیچەنە ئێمە کۊشیای ۋېما پۍ ۋنەپەرسایۆ جە سیاسەتی و مەژگی کۊکوشی جە گرڎ مېڎانېنە بەرمۍ وەڵېوە و دلۍ ئی کۊشیاینە خۊتانکەردەی جە یاڎوو گەشمەرڎا بەقیمەتیما کەرمۍ".
حکومەتوو ئەردۆغانی قەرارش سەروو هەردووە کۊکوشیەکەی دا ، هاکان فیدانیچ جابەجێش کەرڎ
جە ئەرەیاوناکەو کۆمیتەو ڕاوەبەری پەکەکەینە ئاماژە پی تایبەتمەندییا کریان؛
"سەروو ئا بنەمایۍ جە ١١ەمین ساڵەو کۊکوشی یووەمینە ئێمە گەشمەرڎا فرە بە قیمەتوو هەردووە کۊکوشیەکا پاریسی هامڕایاما سارا، رۆژبینە، رۆناهیە، ئەڤینە، میرپەروەر و عەبدولرەحمان کزلی بە وەشەسیای، رێز و پنەزانایۆ ویرمارمېوە. ئێمە جارێوەتەر وەعدما واوەی کەرمېوە، کە ئامانجوو ئاڎیشا بیاونمۍ بە سەرکەوتەی و خۊتانکەردەی جە یاڎوو ئاڎیشا کەرمۍ. سڵام و پیرۆزبایی ئاراسەو گرڎوو ئا کەسا کەرمۍ کە ٦و کانونوو دووەمی جە پاریس و بەرلین بەشداریشا جە ڕاپیماکانە کەرڎ و کۊکوشیەکېشا شەرمەزار کەردۍ. ئێمە ماچمۍ کە کۊشیای ۋېما پۍ ۋنەپەرسای جە بکوژا جە ساڵەو ١٢ەمینینە جە ڕاو کەمپینوو ئازاڎیی مییان نەتەوەییماوە ئامێتەو یۊی کەرمۍ، کە ئا کەمپینە پەی ئازاڎیی جەستەیی ڕابەر ئاپۆی وەڕاوە بریۆ و جە گرڎ مېڎانېنە زیاتەر بە بەقوەتی وەڕاوەش بەرمۍ.
حەرچنڎە دەوڵەتوو فەرەنسای حۊڵ مڎۆ شارۊشۆ، ئێمە و رای گرڎیی دیموکراتیکی و بکوژا هەردووە کۊکوشیەکەو پاریسی و هێزەکا پەشتیش عال مشناسمۍ. قەراروو هەردووە کۊکوشیەکەی جە لایەنوو حکومەتوو تەیب ئەردۆغانیوە دریا و جە تەرەفوو هاکان فیدانیوە جابەجێ کریۍ، کە ئا وەختە راوێژکارو میتی بۍ. ۋېش جە ۋېشەنە ئەنجامدەروو کۊکوشیەکەو ٩و کانونوو دووەمی عومەر گونەی واتەبێش کە ئەنداموو میتین و ئەمرەو کۊکوشیەکەیش جە راوێژکاروو میتیوە هۊرگێرتەن. حەرپاسە دماو کۊکوشیەکەی ئەرەیاۋناکەو تەیب ئەردۆغانی و هامڕاکاش ، ئا ئاژەشە پەشتڕاس کەردۆ.
سەرباروو ئانەی رووەداکەی ئانڎەیچ ئاشکران و ١١ ساڵېش سەرەرە ۋیەردەن، دەوڵەتوو فەرەنسای پۍ رای گرڎیی ئاشکراش نەکەردەن و جە چوارچێوەو یاساو دیموکراتیکینە دادگاییش سەروو رووەداکۍ جا بەجۍ نەکەرڎ. بە پێچەوانۊ سەروو بنەماو مەردەی یاخوڎ کوشتەی عومەر گونەی پەناش پۍ پەردەپۆشکەردەی رووەداکەی بەرڎ. ئەگەر دەورش جە رووداوەکانە نەبۆ و بۊنەو مەسڵەحەتوو ۋېشۆ جە دەوڵەتوو تورکی رووەدایەکا نەشارۊوە، ئا وەختە مشۊم دەوڵەتوو فەرەنسای بە بێ ئانەی فرە خواینۆ مشۊم دەس بە دادگاییکەردە و سزادای تۆمەتبارا کەرۆ. مشۊم گۊش پۍ بانگەوازی داڎپەروەری دەیان هەزار کەسا گێرۆ، کە ٦و کانونوو دووەمی جە جاڎەو مېڎانەکا پاریسینە هاوار کەرېنۍ. ئەگەر پی جۆرە مامەڵە نەکەرۆ، ئا وەختە دڎانش بە هامکاریکەردەی چنی بکوشارە نیان.
مشۊم کۊکوشیەکۍ پاریسی ڕۊشنکریاوە و ۋنەپەرسایشا ۋنە کریۆ
کۊکوشیەکۍ ٩و کانونوو دووەمی و ٢٣ۍ کانونوو یووەمی کە جە ناوەنڎوو پاریسینە و ۋەروو چەما تەماموو جەهانیوە ئەنجامدریۍ، مەبۆ بە حیچ جۆرێ بە ئاسایی بنریارە. ئا کۊکوشیۍ بەشێوەنۍ جە هجومی کۆلۆنیالیستی و جینۆسایدی، کە سەڎ ساڵېن جە دژوو گەلوو کوردی وەڕاوە بریا و حەرپاسە هجومېنۍ پۍ سەروو ئاخېزوو ئازاڎیی ژەنا و مرۆڤایەتی دیموکراتیکی. بە شێوېوە مەبەسدار کەردەی ئامانجوو یووە جە ئەرەمەرزنەرا پارتەکەیما هامڕا سەکینە جانسزۍ ئا راسیە وزۊ ۋەرووچەما کە قڕکەریە ئاماژە پنەکریاکا بەشێوەنۍ جە جینۆسایدوو کوردا کە جە ١٠٠ ساڵېنە ئەنجامدریېنۍ. جە بنەڕەتەنە کەردەی ئامانجوو ژەنا شۆڕشگێڵنین، هجوما جە دژوو خەتەو ئازاڎیی ژەنۍ و ژیۋای ئازاڎیی. جە یاگېوە پېسە پاریسینە ۋەرووچەما گرڎ کەسیۆ ئەنجامدای قڕکاریەکا پی جۆرە، بە ماناو ئانەینە کە هەڕەشۍ و هجوما پۍ سەروو تەماموو مرۆڤایەتی دیموکراتیکی. هەر چا سۆنگۆ مەبۆ ئا قڕکارییا بە ئاسایی و گولانە هۊرنەسەنگنمۍ و پۍ رۆشنکەردەیۆ ئا قڕکارییا بە بێ دماکۊتەی مشۊم ۋنەپەرسایشا چنە کریۆ.
جە ڕاو کەمپینی میان نەتەوەیی ئازاڎییوە ۋنەپەرسای جە قڕکاریەکا کەرمۍ و سەروو خەتەو سەرکۊتەی ڕاکەرمۍ
ئێمە پېسە جمیەروو ئازاڎیی کوردی، گەلوو کوردی و مرۆڤایەتی دیموکراتیکی، سەروو بنەماو رۆشنکەردەیۆ و قڕکاریەکا پاریسی و ۋنەپەرسایۆ جە بکەراشا ماوەو ١١ ساڵان ئینایمۍ کۊشیاینە. ئا کۊشیایە هەم جە تەرەفوو جمیەروو ئازاڎیی کوردسانی و ئاخێزوو ئازاڎیی ژەناوە بە بەقوەتی دەسشپنەکریان و هەمیچ فاڕیان پۍ جمایۆ میان نەتەوەیی. ئانە ١١ ساڵېن جە گرڎوو جەهانینە دەنگوو دروشمەو 'ژەنۍ، ژیۋای، ئازاڎیی! سارۍ، رۆژبینۍ، رۆناهی'ۍ ژەنا و ئا مرۆڤا کە پۍ ئازاڎیی کۊشیانە، نەکۊتەنەرە و بەردەواما. ژەنا، گەنجا و مرۆڤایەتی چېردەسی جە کۊشیایۍ چانەنە پەروەردۍ با، جە ١٠و تشرینوو یووەمینە هەڵمەتەی میان نەتەوەیی 'ئازاڎیی پۍ عەبدوڵا ئۆجالانی و چارەسەری سیاسی پۍ پرسوو کوردی' کە تایبەتمەندی ستراتیجیکیش هەن و ئازاڎیی جەستەیی ڕابەر ئاپۆیش بە ئامانج نیانەرە، دەسشپنەکریان.
ئیسە کۊشیای جە دژوو کۊکوشیەکەی جە ساڵەو ١٢ەمینینە دلۍ جمایۊیۍ ئنڎە گەورەینە بریۊڕاوە. ١١ەمین ساڵەو کۊکوشی ٩و کانونوو دووەمی جە گرڎوو مېڎانەکانە بە چالاکی شەرمەزارکەردەی بە شێوېوە کارا پێشوازیش ۋنەکریا. ۋېنیشاندای جەماوەری جە ٦ کانونوو دووەمینە جە پاریس و بەرلین ئەنجامدریۍ و بە راسیچ شکۆدارۍ بېنۍ و جە ۋەران ۋەروو کۊکوشیەکا ٩و کانونوو دووەمی و ٢٣ۍ کانونوو یووەمی و ئانۍ کە حۊڵشادا پەردەپۆششا کەرا، بیۍ بە هەڵوێست و هەنگامېوە کاریگەر. پی جۆرە جارێوەتەر گەل و دۆساما بە گرڎ لېوەشا نیشانەدا کە تا بکوژاو قڕکاریەکا ڕۊشن نەکریاوە، بەردەوام جە مېڎانەنە با و تا دمایی ۋنەپەرسایشا ۋنەکەرا.
دیارا کە جە ساڵەو ١٢ەمینیچەنە ئا چالاکیۍ ۋنەپەرسایۆ جە گرڎ مېڎانېنە بە بەقووەتی بەردەوامۍ با. ژەنا و گەنجا، گەلە وڵاتپاڕێزەکەما و دۆسە دیموکراتەکېما درێژە بە داواکاری ۋنەپەرسایۆ جە کۊکوشیەکەو پاریسی کەرا. تا دادگاییکەردەی گرڎوو تاوانبارا و چەسپنای دادپەروەری ئا کۊشیایە بەردەوام بۆ. ئا کۊشیایە چنی هەڵمەتەو میان نەتەوەیی ئازاڎیی ئامێتە بۆ و جە گرڎ مېڎانېنە سەروو بنەماو خەتەو سەرکۊتەی کۊشیای ئازاڎیی جەستەیی ڕابەر ئاپۆی و چارەسەری پرسوو کوردی وەڕاوەبریۆ.
ئێمە جاڕێوەتەر سڵام جە گرڎوو چالاکییەکا دژوو کۊکوشیەکا پاریسی کەرمۍ، بە تایبەتی چالاکییەکاو پاریسی و بەرلینی کە جە ٦و کانونوو دووەمینە ئەنجامدریۍ، حەرپاسە داوا جە گەلەکەیما و دۊساما کەرمۍ کە بە چالاکی گەورەتەر پەنەوازییەکا دادپەروەری شۆڕشگێڵنی بە کردەوە و بە شێوېوە سەرکۊتانە جابەجێ کەرا"!.
