کۆمیتەو ڕاوەبەری پەکەکەی گەشمەرڎۍ کۆمکوژییەکاو پاریسیش بە رێز و پنەزانایۆ یاڎۍ ئاوردۍ و ئەرەیاۋناش، "داوا جە گەلەکەیما و دۆساما مکەرمۍ کە جە گرڎ مېڎانێنە بەشداری جە ڕاپیمای و گلێرۊبیەکانە بکەرا".
کۆمیتەو ڕاوەبەری پەکەکەی ئەرەیاۋناش، "جە ١٢ەمین ساڵیادو کۆمکوژییەکەو ٩و کانونو دووەمو ٢٠١٣ ینە کە پاریسەنە کریا و جە ئاکامشەنە هەمڕا سارا (سەکینە جانسز)ە، رۆژبینە (فیدان دۆغان)ە و رۆناهی (لەیلا شایلەمەز)ە گەشمەرڎۍ بیۍ. ١٢ ساڵێن سەرو رێبازو هەمڕا سارۍ، رۆژبینۍ و رۆناهیۍ ئێمە ئەرەکۊشای ئازادی و دیموکراسی ڕاوەبەر مکەرمۍ. چی ساڵوەگەڕەیچەنە پەی ۋنەپەرسایۆ جە کۆمکوژی پاریسی جاڎۍ و مېڎانەکا پەڕۍ مکەرمێوە.
وەڵۍ گرڎ چێوێنە گەشمەرڎە قارەمانەکاما هەمڕا سارا، رۆژبینۍ و رۆناهیۍ جە ١٢ەمین ساڵیادو گەشمەرڎەبیەیشانە بە رێز، وەشەسیایی و پنەزانایۆ یاڎێشا مارمێوە؛ قەول واوەی مکەرمێوە کە خاوەنداری جە ئامانج و یادو ئاڎیشانە بکەرمۍ. ئێمە جارێوەتەر دەسنیشانش مکەرمۍ کە جە ساڵۊو ١٣ەمینە پەی ۋنەپەرسایۆ جە کۆمکوژکارا و وەڵۍ وستەی ئەرەکۊشای ئازادیی ژەنۍ، بە شێوۍ بەهێزتەر و رێکوزیاتەر ئەرەکۊشمۍ".
جە ئەرەیاۋناکەینە ئانەیچ ئامان، کە ئاشکران کۆمکوژی پاریسی بە شێوۍ مەبەسدار و پلان پەی مجیایرەی کریان و ئانەیچ وزیان ڕووە، "بە مەبەس هرووژم کریا سەرو هەر یەرە هەمڕا بەقیمەتەکاما. بە تایبەتی هەمڕا سارا ۋەرو ئانەی یووە جە ئەرەمەرزنەرا پارتەکەیما بۍ، جە دژو رژێمو فاشیستی-سەروازی ١٢و ئەیلولی یووە چا هەمڕایا بۍ کە مڎرامانوو زینانیش گۆرە کەرد و دەوری فرەش جە وەڵێوستەو هێڵۊو ئازادیی ژەنا پارتەکانە بۍ، هەرپۊکەی کریا ئامانج. سەرو ئا بنەمایۍ، ئاشکران کە کۆمکوژی ٩و کانونو دووەمو ٢٠١٣ جە دژو پارتەکەیما پەکەکەی و جە کەسایەتی ئاڎینە جە دژوو گەلوو کوردی کریان. چا چوارچێوەنە ئانەی کریا ئامانجو هرووژمەکەی گەلوو کوردی و ئەرەکۊشای بیەی و ئازادیی ئاڎیی بۍ.
جە حەقەتینەنە هەر جە ڕوانی یووەمۆ ئاشکرابی کە کۆمکوژی ٩و کانونو دووەمو ٢٠١٣ جە پاریس، جە لایەنو کێوە ئەنجامدریان. لاو گرڎ کەسیۆ ڕۊشن بۍ. بەڵام حکومەتو فەرەنسای کە سەرو بنەماو بەرژەوەندی چنی ۋەرپەرسا کۆمکوژیەکەی رێککەوت، حەجگیز بە ڕۆشنی ئا حەقەتینشە ئاشکرا نەکەرد و بکوژەکێش دادگایی نەکەردۍ و ۋنەپەرسایۆش چنی نەکەردۍ. ئەر کاتو ۋێش ئانە کریابیۍ، جە ٢٣ۍ کانونو یووەمو ٢٠٢٢ کۆمکوژی دووەمو پاریسی ڕووە نەڎۍ کە پا مەڵامەتۆ یووە جە فەرماندەکاو جەنگی جە دژو داعشی ئەڤین گۆییە و دووۍ وڵاتپارێزنۍ کوردی گەشمەرڎۍ بیۍ. ساڵەی ۋېیەردۍ گەلەکەما و دۆساشا هەوڵی فرەشا وست گەڕ، بەڵام سەرەڕاو ئانەیچ حکومەتو فەرەنسای نەلا چێر بارو هەرمانکەردەی بە یاسای و دادگاییکەردەی گرڎو تاوانبارا.
چی ساڵڕۆنە جارێوەتەر داوا جە حکومەتو فەرەنسای مکەرمۍ کە دیموکراسیانە نزیکو ئاژەکەی بۆوە و یاسا جابەجێ بکەرۆ و گرڎو تاوانبارا هەردووە کۆمکوژی پاریسی ڕادەسو دادگای بکەرۆ. بە تایبەتی ئەرەیاۋنمێش ئاشکراکەردەی و ۋنەپەرسای جە بەشداری ڕاسەوخۆو حکومەتو تەیب ئەردۆغانی چی کۆمکوژییانە ڕا جە قڕکەردەی کوردا مگێرۆ و هامکات خزمەت بە دیموکراتیزەکەردەی تورکیای و سوریای و گرڎو ۋەرکۊتوو مېیامینی مکەرۆ. سەرو ئی بنەمایۍ داوا جە گەلی وڵاتپارێزن و دۆسا دیموکراسیوازیما مکەرمۍ هەتا یاوای بە ئەنجامەکا بەردەوامی بە ئەوەکۊشایشا بڎا.
ئێمە بەردەوام پەشگیریما جە بڕیارەکاو ڕابەر ئاپۆی کەردەن و چیولایچ بەردەوامۍ بیمۍ.
گەلی وڵاتپارێزن و دۆسا بەقیمەتیما
چی قۆناغێنە، کە ملمێنە ١٣هەمین ساڵوەگەڕو کۆمکوژیی ٩و کانوونو دووەمو ٢٠١٣ کە جە پاریسەنە ڕووەشدا، ئێمە پېسە جمېیەری و گەلەکەیما، بە قۆناغێوەرە موېیەرمۍ کە ئەگەر و دەرفەتی فرەش ڕەخسنان، بەڵام مەترسی و هەڕەشۍ فرێچ ئینۍ ئارانە. چنی وڕای ڕژێمو بەعسی جە سوریانە، سیستەمو دەوڵەت نەتەوەی کە جە ۋەرکۊتوو مېیامینینە جە دماو جەنگی جەهانی یووەمیۆ پێکئامان، جە جەهانی عەرەبینە وڕا و جە ئێران و تورکیایچەنە یاوان دمایی ڕێش. هەرپاسە کورد و کوردەسانیا جە پێکئاوردەی سیستەمی تازەو ۋەرکۊتوو مېیامینینە دەوری سەرەکی گێڵنا. ئینەیچ جەنگ و ملەملانەکا سەرو کوردەسانی زیاتەر مکەرۆ. ئا هێزۍ گەرەکشانە جە ۋەرکۊتوو مېیامینینە کاریگەریشا زیاتەر بۆ، فرەتەر هرووژم مکەرا سەرو کوردەسانی. چی ئاژەنە ئێمە پېسە جمېیەری و گەلی پەنەوازا فرە هەستیارانە و بە وریاییوە پەرە بە یۆبیەی و ئەوەکۊشایما بڎەیمۍ.
ڕابەر ئاپۆ دەسوەڵێوستەیۍ تازەش پەی کەردەیۆ قفڵو ۋەرکۊتوو مېیامینی پەی ئازادی و دیموکراسی دەسپنەکەردەن. بێ گومان ئی ئاژە دەرەنجامو هەڵمەتەو ئازادی جیهانییا کە جە ١٠و ئۆکتۆبەرو ٢٠٢٣ۍ دەسش پنەکەردەن. ئێمە بە ئەوەکۊشای بەرەکۍ ئیمرالیما کەردێوە. ئەرەیاۋناکەو شاندو دەم پارتی کە جە ٢٨و کانوونو یووەمو ٢٠٢٤ کە چنی ڕابەر ئاپوی کۆبیۆ، پېسە ئانەی کورد و دۆسەکێش دڵوەشۍ کەردۍ، بە شێوێوە جددی کەشوهەوای سیاسی تورکیایچش فاڕان.
ئێمە پېسە جمېیەری و گەلەکەیما بێ گومان ئی پرۆسە و گفتوگۆیە بە گرنگ مزانمۍ. ئێمە هەمیشە پەشتگیریما جە بڕیارەکاو ڕابەر ئاپۆی کەردەن و بێ گومان بەردەوامێچ بیمۍ. پەی سەروستەی ئەوەکۊشای ڕابەر ئاپۆی گرڎ ئەرکێوە گێڕمێنە ئەستۆ. پەی ئی مەبەسەیچە هەمیشە سەرەمڕە پەی سیاسەت و ڕێبازەکاو ڕابەر ئاپوی ئەرەکۊشمۍ. جە هەمان کاتەنە بەردەوام بەوریایی و هۆشیارییوە جە ۋەرا ۋەرو فێڵۍ و گەمەو ئاوەزیەت و سیاسەتو فاشیستی-جینۆسایدی نزیکۍ بیمێوە. پېسە فرەو جارا واتەنما هەمیشە هەم پەی جەنگی و هەم پەی ئاشتی ئاماڎێنمۍ. هەرپاسە جە هەمان کاتەنە پا کەسا کە ماچا؛ 'وزمێشا چێرو خاکی' ماچمۍ تەماشەو حاڵو ۋێشا بکەرا موینا کە ئانە ۋێشانۍ گنا چێرو خاکی.
جارێوەتەر بە ڕێز و حورمەتۆ هەڤاڵە گەشمەرڎەکاما سارا، ڕۆژبینۍ و ڕۆناهیۍ یاڎۍ مارمێوە و داوا جە گرڎو گەلی و دۆساما مکەرمۍ بەشدارۍ ڕاپیمای و ۋێنیشانداکا با کە قەرارا جە گرڎ شۆنێنە بلۆڕاوە."
