ئەڎایاو شەممەی گرد حەفتێوە پەی پرسیارکەرڎەی جە چارەنویسوو ئا کەسا جە وەختوو گیریایشانە گومۍ و بیسەروشۊنۍ بیۍ  چالاکی کەرا و داواو دادگاییکەرڎەی بکوشەکاشا کەرا. چالاکیی ئەڎایاو شەممەی ئینا جە ڕۊو ٩٤٣مینینە و سەرەڕاو قەرارەکەو دادگای دەستووری پەی یاساییبییەی  چالاکییەکا، وەلۍ پۊلیسوو تورکی بەرڎەواما جە  گەمارۊکاو مەیڎانوو گاڵاتاسەرای. ئەڎایاو شەممەی گەرەکشانە  مەیڎانوو گاڵاتاسەراینە ئەرەیاونایۍ وەڵا کەراوە. چی حەفتەنە ئەڎایا و داکۊکیکاراو مافەکاو ئینسانی لاو پۊلیسیوە هجوومشا کریان سەر و ڕاگێرییشا چەنە کریان.

ئەدێکۍ بە تاجەوولاوە لوێبێنۍ پەی چالاکییەکەی، وەلێم پۊلیس ڕاش پەنە نەدۍ جە مەیڎانوو گاڵاتاسەرای نزیکۍ باوە. ژمارێوە فرۍ پۊلیسۍ بە مەنتێقا و مەیڎانەکارە وەڵۍ کریێنێ. ئەوەڵۊ ئەدۍ و ئا کەسۍ چەنی ئەڎایەکا بێنۍ لاو پۊلیسیوە گەمارۊ دریێنۍ و دماتەر پۊلیس هجوومش کەرد سەرشا و گێرتێش.

جە هەمان وەختنە پۊلیس قەڵغانەکۍ وێش بەرزێش کەرڎێوە و ڕاگێرییش جە ڕۊنامەنویسا کەرد، کە ڕسم و ڤیدیۊو تاوان و پاشێلکارییەکاشا  گێرا. جگە چانەیچ پۊلیس ڕاگێری جە ڕۊنامەنویسا کەرۊ، کە جە شۊنەکای تەریوە جە مەیڎانەکەی نزیکۍ باوە.

ئەڎایاو شەممەی و هامسەرۊکوو کۊمەڵەو مافەکاو مرۊڤی ئەرەن کەسکین و بەگرڎی ١٧ کەسۍ گیریێنۍ و فاڕیێنۍ پەی ڕاوەبەرایەتیی ئاسایشوو شارەکەی. ئەڎایاو شەممەی "خانم تۊسون"ە کارڎایۊش وەراوەروو پەلامار و هەڵوێسوو پۊلیسەکا جە وەختوو گێرتەیشانە نیشانە دا و ئەرەیاوناش، "ئانە شمە کەرڎێش نایاسایین." حەرچندە ئەڎا تۊسون-ە، بە پۊلیسیش وات د، مشکیلەو تەندروستییش هەن و دەسیچش مەڕیان، وەلۍ لاو پۊلیسەکاوە گیریا.

س.ز