سیاسەڎمەدارو گەلوو کورڎی محەمەڎ ئەمین پێنجوێنی سەبارەڎ بە هجوم و پلانەکا دەوڵەتا ئەرەگیری پۍ سەرو کورڎسانی پۍ ئاژانسو هەواڵی فوراتی قسېش کەرڎۍ و باسش جە هەستیاری قۆناغەکەی کەرڎ کە گەلوو کورڎی جە چۋار پارچەو کورڎسانی وەرەن ڕووش بیەنۊ سەرنجش وست سەرو ئا پلانۍ کە دژوو گەلوو کورڎی بەسەر کەشی تورکیای جە دژوو گەلوو کورڎی ملۊ ڕاۋە.

 سەرەتاو قسەکاشەنە نامبریا ئاماژەش پانەی کەرڎ:" بە شێۋېوە گرڎی جمیەرو ئازاڎیوازی گەلوو کورڎی بە قۆناغێوە هەستیار و مەترسیڎارەنە ۋیەرۊنە، گرڎما ئانەی مزانمۍ کە ئەردۆغان جە وەختو بانگەشەو هۊرۊچنیەکانە ۋاچۍ من گەلوو کورڎی دلېنەبەرو. ئا پیلانېچە چۋار ساڵېن ئاماڎەکاریش پۍ کریان جە لایەنو دەوڵەتا ئەرەگیری سەرو کورڎسانی و تورکیا سەرمەشقەکەشا،  پۍ ئانەی گۊرەتەرین گورز جە جمیەری ئازاڎیوازی گەلوو کورڎی بڎا و کۊششەکەیش دلېنەبەرا."

" تورکیا حکومەتو جەنگیش پێکئاورڎەن"

پێنجوێنی قسۍ و هەڵۋېسەکۍ جمیەرو ئازاڎیوازی گەلوو کورڎیش ۋیر ئاورڎۊ و ئاماژەش پانەی کەرڎ:"بە وەردەوامی جمیەری ئازاڎیوازی گەلوو کورڎی و پارتە سیاسیە کورڎیەکۍ ئاماژە پانەی کەرېنۍ ئەگەر هامپەیمانی ئاکەپە- مەهەپەی جە هۊرۊچنیەکانە سەرگنا ئاوەختە هجومەکۍ پۍ سەرو گەلوو کورڎی بە درێژی ئەنجام دریا، ئانە ڕاسیېۋە چەمەڕاکریابۍ، کە دماو هۊرۊچنیەکاوە ئیسە ۋینمېش جە تورکیا حکومەتۍ پېکئامان کە حکومەتو جەنگیا دژبە گەلوو کورڎی."

 سەرنجش وست سەرو پێکئاماو کابینەو حکومەتە تازەکەو تورکیای و پی جۊرە باسش کەرڎ:"پەی دلېنەبەرڎەو گەلوو کورڎی، ئاکەپە ئینسانە فاشیستەکېش ئەرکردار کەرڎېنۍ دلۍ حکومەتە تازەکەیشەنە. بە شێۋېوە کە سەرۆکو میتی کریان بە وەزیرو جبەری و جەنەراڵە فاشیستەکۍ دلۍ لەشکریەنە ئەرکدارۍ کریېنۍ، بێگومان پێکئاورڎەو کابینێوە پی جۊرە فاشستەیە ئامانج چنەش دلېنەبەرڎەو گەلوو کورڎی و جمیەرە ئازاڎیوازەکەیشا جە حەر چۋار پارچەو کورڎسانی."

 "ئیسە پلانەکا دژوو گەلوو کورڎی وزانە بوارو جابەجېکەرڎەیوە"

ئا سیاسەڎمەدارە سەرنجش وست سەرو ئا هجوما کە ئیسە جە دژوو گەلوو کورڎی جە چۋار پارچەو کورڎسانی ملا ڕاۋە بە سەرکەشی تورکیای و ماچۊ:" گرڎما مزانمۍ ئیسە هجومەکۍ ئێرانی جە  ۋەرکەوتوو کورڎسانی دەسشا پنەکەرڎەن پۍ سەرو هێزە کورڎیەکا هەم جە دلۍ  ۋەرکەوتی و هەم جە جبەرۊ، جە پانیشتوو کورڎسانیچ تورکیا هەرمانەو تیرۆری و هجومەکاش پۍ سەرو هەرێمەکا پارېزناو میدیای درێژە پنە مڎۊ، بێگومان جە ۋەرنیشتوو کورڎسانیچ تورکیا، جە عەفرین حەتا کانتۆنو جزیرەی بە زەمیینی و ئاسمانی و بە شێۋەی سیخوری(جاسوسی) دەسش بە هجوم و هەرمانەو تیرۆری کەرڎەن، پینەیچ متاۋمۍ ۋاچمۍ؛ ئیسە وەختو پێکئارڎەو هەڕەشەکا ئەردۆغانیا دژ بە گەلوو کورڎی"

 "پەنەوازما بە کۊشیای هامبەشین پۍ دلېنەبەرڎەو پیلانەو ئەرەگیرا"

جە دمادمایی قسەکاشەنە محەمەڎ ئەمین پێنجوێنی بانگەوازش جە لایەنە سیاسیەکا کورڎی و گلېرگەو کورڎسانی کەرڎ کە  پۍ وەرەنگاربیەیۊ و پوچکەرڎەیۊ ئا هجومە وەرفراوەنەیە مشۊم گرڎو لایەنە سیاسیە کورڎیەکا ۋېشا ڕێك وزا و دژ بە پیلانگێڵیەکا دۊڵەتە ئەرەگیرەکا مرڎاۋە، ئەگەر نا کۊشیای و دەسکۊتەکۍ گەلوو کورڎی جە چۋار پارچەو کورڎسانی وەرەن ڕوو کارەساتی باوە، پۍ ئا مەبەسیچە مشۊم تەمامو گلېرگەی کورڎی چا مەجالەنە ۋېش ئەرکدار ۋینۊ و وەرن ڕوو ئا هجوما باوە و پەشگیری کۊشیای ئازاڎیوازی گەلوو کورڎی کەرا.

هـ . ش