هامسەرۆکۊو جەمەو عەلەوییە دیموکراتیکەکا (داد)ی قەدریە دۆغانە ئاماژەش پانەیەدا کە سووریانە بە شێوێوە وەحشیانە پارێزنەرەو مافەکا مرۆڤی ڕاسا ئەل-عەلیە گەشمەرڎۍ کریا کە ئینە پەی ژەنا و کەمە نەتەوەییەکا هەرێمەکەی هەڕەشێوە گۊرێنە دەرەنجامو سیاسەتۍ سیستەماتیکیا.
هامسەرۆکۊو گرڎینەو جەمەو عەلەوییە دیموکراتیکەکا (داد)ی قەدریە دۆغانە پەی ئاژانسوو هەواڵوو فوراتی (ANF)ی قسێش کەرڎۍ.
گەشمەرڎەکەردەو ڕەسا ئەل-عەلیۍ چ مەعنێوەش هەنە؟
ئینە یۆن جە ڕووە تاریکەکا ڕژێمو جیهادیستی کە گەرەکشا جە سووریانە ئەرەمەرزنۊشەرە. دژمنایەتی هەیئەو تەحریر ئەل شامی (هەتەشە) هامشێوەکاش جە ۋەرا ۋەرو ژەنۍ، عەلەوییەکا و گرڎ کەسێوە پارێزنەرو ژیۋای حەقەتینێوەن نمەشاریۆوە. گەشمەرڎەکەردەی ڕاسا ئەل-عەلیۍ نەک تەنیا گەشمەرڎةکەردەی ئەکادیمیستێوەن، نیشانۍ ئانەینە گەرەکشانە گرڎو ژەنا، عەلەوییەکا و کەمە نەتەوەییەکا دلېنە بەرا.
مۆدێلو ۋەرنیشتی چنی دلۍ چوارچێوێوەنە یاگۍ مگېرۆ؟
ۋەرنیشت سیستەمێوەن کە ژەنی بە شێوێوە یەکسانو ئازاد و گەل پێوەرە ژیوایش ئەرەمەرزنان. ئینە تەرسەو هەتەشەینە. بیەو سیستەمێوە کە ژەنی جە ژیۋای گلېرگەینە چالاکە بۆ، ئایدۆلۆژیاو ئاڎیشا هۊرشێونۆوە. هەرپۊکەی کورد، عەلەوی، کەمە نەتەوەییەکۍ و ئانۍ کە ژیۋایۍ علمانیشا گەرەکا، ئینۍ چېرو هەڕەشێوە گۊرێنە.
پەیوەندی تورکیای چنی هەتەشەی چنی هۊرسەنگندۍ؟
موینمۍ کە دەسەلاتو ئیساتۍ تورکیای بە ئاشکرا پەشتگیری هەتەشەی مکەرۆ. ئا زیهنیەتەی کە ئارۆ جە سووریانە کەما نەتەوەکا مکەرۆ ئامانج، ڕەنگە سەبای بەرەو بەشە جیاوازەکا تورکیای بلۆ.
پەنەوازا جە ۋەرا ۋەرو ئی ئاژەینە هەڵوێسێوە چنین گێرمێنە ۋەر؟
ڕای گرڎیی دیموکراتیک پەنەوازا ئاگاڎارو ئی حەقەتینەیە بۆ. ئەرکو گرڎیمانە کە ئاشتیی دلېینەو تورکیای وەش بکەرمۍ و دیموکراسی ئەرەمەرزنمێرە. مشۊم گلېرگە خاوەنداریی جە عەلەوی، کورد، ژەنی و گرڎو بەشە چېردەسەکا جە دژو هەڕەشۍ کۆمکووژی بکەرۆ. ئەر بێدەنگی بۆنە ئینە گەورەتەر بۆ. پەنەوازا گرڎ کەسێوە خاوەن ویژدان جە دژو ئینەی مردۆوە.
جە دماینە پەی ڕەسا ئەل-عەلی چێشتا گەرەکا؟
ڕەسا ئەل-عەلی-ە نەک تەنیا ئەکادیمیستێوە، بەڵکم هېماو مڎرامانی و ئازادی بۍ. جە کەسایەتی ئاڎینە گرڎو ژەنا گەشمەرڎۍ، عەلەوی و ئا کەسۍ ئەوەکۊشای پەی ئازادی مکەرا یاڎۍ مکەرووە.
