فێستیڤاڵو پاییزەی جە قەزاو کەلارینە کە ناوەندو ئیدارەو گەرمیانیا بەردەواما، کە چنەشەنە ٥٠ ورەشیارۍ بە بەرهەمە دەسکردەکا و واردە کوردەوارییەکا بەشدارێنۍ، هاموڵاتییا پێشوازیۍ گەرمشا ۋنە کەرڎەن فرەو بەشدارا فێستیڤاڵەکەیچ ژەنینۍ، چی بارۆ هەریۆ جە بەشدارا؛ موزەفەر عزەت و فایەق محەمەد پەی ئاژانسوو هەواڵوو فوراتی (ANF)ی قسێشا کەرڎۍ.

جە سەرەتاو قسەکاشەنە موزەفەر عزەت باسش چانەیە کەرڎ کە جە هەورامانۆ ئامانو بەشداریش جە ڤێستیڤاڵەکەینە کەرڎەن، واتش: "بەرهەمەکۍ ئێمە گرڎ ۋێمانێنۍ و هینۍ کورڎەسانینۍ، خەڵکو کەلاری ئاشنێنۍ بە بەرهەمی کوردی و بە گەرمو گوڕیۆ خێرامایش ۋنەمکەرا.

چێوەکێما پێکئامێنۍ جە وەزا و تشە سماقی و وامی، فرەو واردا تەری کوردەواریچما هەنۍ، فرەو چێوەکاما بەرهەمۍ هەورامانی و ناوچەکا تەرو کورڎەسانینۍ. هیچ کام جە بەرهەمەکاما کیمیاییشا چنە نیا و سروشتیێنۍ."

'بەربوومۍ کورڎەسانی سروشتیێنۍ و تام و لەزەتۍ سروشتییانەشا هەن'

جە دما دمایی قسەکاشەنە موزەفەر عزەت باسش چانەیە کەرڎ بە مەبەسو ئاشناکەردەی بەرهەمەکاو کورڎةسانی ساڵانە سەردای ناوچەکا عێراقی مکەرا و فرە لەزەت جە بە بەرهەمەکا کورڎەسانی بەرا و واتش: " گرنگا ئی ڤێستیڤاڵۍ ساڵانە جە گرڎو شارەکا کورڎەسانینە بکریاوە، جە ئیساتێنە ئێمە پەی ڤیستیڤاڵەکا جبەرو هەرێمو کورڎەسانیچ ملمۍ، فرە لەزەت جە بەرهەمی کوردەواری بەرانە.

پەی ئانەی زیاتەر خەڵک ئاشنا بۆ بە بەرووبوومو کورڎەسانی گرنگا بەشداری ڤیستیڤاڵەکا بکەرا، پەی ئانەی بزانا کە واردە و بەرهەمە کوردیەکۍ چ تام و لەزەتۍ سروشتیشا هەن."

'گرنگا ساڵانە شارو کەلارینە ڤیستیڤاڵی کلتووری بکریۆوە'

دماتەر فایەق محەمەد باسش چانەیە کەرڎ کە جە شارو سنەو ۋەرکۊتوو کورڎةسانیوە ئامان، بە جەمۍ بەرهەمۍ کوردیۆ بەشدارو ڤیستیڤاڵەکەی بیەن، واتش: "ئا واردۍ کە ئارڎێنێم گرڎ کوردیێنۍ و سروشتیێنۍ، گازۆکێم قەنشا چنە نیا و سروشتیێنۍ.

ۋێم جە شارو سنەی جە ۋەرکۊتوو کورڎەسانیۆ ئامانا ئا واردێچە کە ئارڎێنێم هینۍ ئاگەینۍ، گرنگا ئی ڤیستیڤاڵۍ ساڵانە دووۍ پەی یەرۍ کەڕەتا جە شارو کەلارینە بکریاوە، چونکی هەم خەڵک چێوی هەرزانش دەسگنۆ و ئا واردێچە کە مەیا ۋۍ تازێنۍ متاوا ئیسفاڎەش ۋنە بکەرا."