ئەنڎاموو کۆنسەو ڕاوەبەری کەجەکەی زوبەیر ئایدار پەیوەس بە هجوومە ئەرەگیریەکاو سەروو مەتینای داواش جە حکومەتوو عێراقی کەرد هەڵوێس نیشانە بڎۆ ۋەرا ۋەر بە دەوڵەتوو تورکی و واتش: "سەدام و حکومەتەکۍ وەڵتەری ۋەراۋەر بە کوردا جەنگشا کەرد و نەمەنۍ. عێراق زەرەرێوە گۊرەش چینەینە ۋەرکەوت. پێویسا دەرز چی تەجرووبا هۊرگێرا."

ئەنڎاموو کۆنسەو ڕاوەبەری کەجەکەی زوبەیر ئایدار و هامسەرۆکوو کۆنگرەو گەلی ڕەمزی کارتال پەیوەس بە هجوومە ئەرەگیریە تازەکا دەوڵەتوو تورکی سەروو هەرێمەکاو پارېزناو میدیای و سەردای سەرۆککۆماروو تورکیای ڕەجەب تەیب ئەردۆغانی پەی عێراقی، پەی ئاژانسوو هەواڵوو فوراتی (ANF)ی قسېشا کەردۍ.

بە ئۆپراسیۆنی سەروازی فشار جە حکومەتی عێراقی مکریۆ

ئەنڎاموو کۆنسەو ڕاوەبەری کەجەکەی زوبەیر ئایدار ئاماژەش پانەی کەرد  دەوڵەتوو تورکی باس جە ئۆپراسیۆنی سەروازی تازەی مکەرۆ، چی تەرەفۆ خجڵ و ئامادەکارییا و واتش: "ماوێوە فرەن دەسش پی ئۆپراسیۆنەیە کەردەن. ڕووۍ وەڵۍ ئانەینە ئەردۆغان سەردای عێراقی بکەرۆ، دەسشا پی ئۆپراسیۆنەیەکەرد. جە ڕاو ئی ئۆپراسیۆنەیۆ فشارێوە دووە تەرەفە مکەرا، پی جۊرە جە تەرەفېوە فشار جە ڕاوەبەری پانیشتی مکەرا و جە لېوەتەریچۆ فشار جە حکومەتوو ناوەندی عێراقی مکەرا. پی جۊرە ماچۆ یا قسۍ و ویستوو من جابەجێ کەردۍ یان ئانەی گەرەکما جە ڕاو سوپاکێمۆ مکەرووش. یانی جە سەرەتانە سوپاکێش بنە وزۆ ، دماتەر ۋێش ملۊنە دلۍ گفتوگۆکاوە. پی جۊرە هەڕەشۍ مکەرۆ. جە لېوە بە سوپا هەڕەشېشا ۋنە مکەرۆ، جە لېوەتەرۆ ڕای ئابوورییشا پەی پێشنیار مکەرۆ. قۊرتەو ئاوۍ وزۊنە ڕۆژەڤۆ، وەعدوو ئەرەمەرزناو خەتەو وزەی، ئابووریشا پنەمڎۆ. بەڵام مەرامی ئەساسی ئینیشا گرڎیی پرسوو کوردی و نیەت و جەنگیا جە کوردسانەنە."

'پێویسا عێراق جیای جەنگی پێشنیاروو چارەسەری پێشکەش بە تورکیای بکەرۆ'

ئایدار ئانەش ویرئاوردۆ حکومەتوو عێراقی جە لایەنی تاریخینە جەنگ دژوو بە کوردانە زەرەری فرەش ۋەرکۊتەن و ئاماژەش پانەی دا کە پێویسا جیای سیاسەتوو  جەنگی دەوڵەتوو تورکی، حکومەتوو ناوەندی عێراقی پێشنیاروو چارەسەری پرسوو کوردی پێشەکەش بە دەوڵەتوو تورکی بکەرۆ. ئایدار واتش: "چا ڕوۆ بانگەوازیما پەی حکومەتوو عێراقی هەن. پەنڎە جە تەجرووبەو حکومەتەکا وەڵینتەروو عێراقی هۊرگێرۆ. با تەجرووبە جە حکومەتەکەو سەدام حسێنی هۊرگېرۆ. گرڎوو ئا حکومەتا کە دژوو کوردا جەنگشا کەرد و هیچشا دەسنەکەوت، جگە جە زەرەر یاۋنای بە عێراقی. پێویسا ئی تەجرووبە بوینیۆ. تورکیایچ سەروو هەمان ڕۍ ملۆ. گەرەکشانە عێراقی پەلکێشوو دلۍ جەنگی دلېنەو عێراقی بکەرا. ئاەو عێراقی جیاوازا. جە دەستوری بنەڕەتینە کورد پېسە ستاتۆیۍ فیدراڵی قبوڵکریان. ئانەی سەروو عێراقی پېویسا ئانەنە تەجرووبەو ۋێش پېشکەش بە تورکیای بکەرۆ. عێراق چنی دڎانش کوردانە نیان پێویسا پێشنیاروو ئانەیچ پەی تورکیای بکەرۆ. گەر ئەردۆغان داواو هامکاری سەروازی جە عێراقی مکەرۆ، پێویسا عێراق پێشنیاروو مۆدێلوو چارەسەری ۋێش پەی توکیای بکەرۆ.

'جە ۋەرا ۋەروو هەڵوێسوو ئازاڎیی گەلوو کوردینە شکس مارا'

ئایدار ئاماژەش پانەی کەرد جە ۋەرا ۋەروو گەلوو کوردی و تەڤگەری ئازاڎیی کوردانە هجوومی تازەو ئەرەگیری ئینا رۆژەڤەنە، جە ۋەرا ۋەروو ئینەینە هەڵوێسوو کوردا هەن و واتش: "پېسە گەلوو کوردی، تەڤگەری ئازاڎیی و تەڤگەری کوردسانی جە ۋەرا ۋەروو ئینەینە ساعیب هەڵوێسېنمۍ.جە ۋەرا ۋەروو ئی حۊڵانە و کاریگەریەکاو جەنگینە، پېسە میللەتی هەڵوێسما هەن. ئازاڎیی و خاکوو ۋێما پارېزنمۍ. جە پلاتفۆرمی نەتەوەی و میان نەتەوەیینە دژوو ئی پێشئامایا کۊشیەیمۍ. پی جۊرە گرڎوو ئا ئۆپراسیۆنا بێ ئەنجامۍ با. چېش کەرا با بکەرا، ئێمە کۊشیای ئازاڎییما هېقمتەر بکەرمۍ و ئازاڎیی گەلیما مسۆگەر مکەرمۍ. دەوڵەتوو تورکی جە کوردسانەنە جەنگەنە شکسش واردەن. ئینەما جە پیرۆزباییەکاو نەورۆزی، جە دەرنجامەکا هۊرچنیەینە دی. سوپاش چا شۊنانە هەنە، بەڵام جە ڕوو ڕوحی و دەروونیوە مەڕیێنۍ. گەلوو کوردی ئینا سەروو پەیاوە، ئشناسنامە و مافوو ۋێش پارېزنۆ."

'دەوڵەتوو تورکی دەس بە جەنگۍ مکەرۆ کە شکس مارۆ'

هامسەرۆکوو کۆنگرەو گەلی ڕەمزی کارتال باسش چانەی کەرد کە حکومەتوو فاشیستی ئاکەپە-مەهەپەی پەی پەشتگیری کۊکەردەیۆ پەی هجوومە تازەکەیش وڵات بە وڵات گێڵۆ و ئینا حۊڵوو تەقەڵانە و واتش: "پەی ئانەی پەشتگیری پەی ئی ئۆپراسیۆنەیە پېڎا بکەرۆ سەردای عێراقی و وڵاتا ۋەرکەوتوو دلېڕاسەیش کەردەن. چی چوارچێوەیچەنە ئەردۆغانە سەردای عێراقی مکەرۆ. جە ڕاو ئی ئۆپراسیۆنەیۆ فشار جە عێراقی مکەرۆ. بەڵام ئێمە ماچمۍ؛ هجوومەکۍ دەوڵەتوو تورکی ۋەراۋەر بە گەریلای بێ ئەنجامۍ بیێنۍ. بە تەکنیکی تازە گژیۍ و شکسشا وارد. جە ۋەرا ۋەروو مدرامانوو گەریلاینە کۆنسپێتوو جەنگی شکسش ئارد. پۊکاتی حیچ دەرفەتێوە پەی دەوڵەتوو تورکی نەمەنەنۆ جگە جە شکسی. دەرفەتی ئابووری نەمەنەن. هێزەکېش بەشوو ئانەی مەکەرا. هەر پۊکەی شۊنەو هامکاریرە گېڵۆ جە ئێران و عێراقەنە. جە وڵاتا ئەوروپای، ئەمریکاینە و جە گرڎ شۊنېوەنە شۊنەو هامکاریرە گېڵۆ. پا هامکارییاوە گەرەکشا ئەنجامێوە دەس وزۆ. بەڵام فرە بە ڕۊشنی ماچمۍ؛ ئی حۊڵۍ دەوڵەتوو تورکی بێ ئەنجامۍ با.

'هەڵویسوو گەلەکەیما هجوومەکا تێک مڎۆ'

دەڵەوتوو تورکی، ئاکەپە-مەهەپە و جاشەکېشا پی هجووما مەتاوا ئەنجام بەدەس بارا. ئی قۆناغۍ بە تێکشیەی دەوڵەتوو تورکی فاشیستی دمایش پنە مۍ. چی قۆناغېنە گلېرۊبیەو کەنەکەی ئەنجامدریا. کەنەکە و گرڎوو ئا پارتوو لایەنە ئینۍ چېروو چەترەو کەنەکەینە ۋەراۋەر پی هجووما مرداوە، دژوو ئینەی هەڵوێسشا نیشانەدا. دژوو ئی هجووما گرڎوو گەلیما، پارت و لایەنە سیاسیەکا هەر چوارپارچەو کوردسانی و کورداو بەروو وڵاتی دژوو ئی هجووما هەڵوێسشا هەن. دەوڵەتوو تورکی تا ئیساتۍ نەتاوانش چی هجوومانە ئەنجامۍ دەس وزۆ و مەتاۊیچ. جە هۊرچنیەکانە ئانە بەرکۊت کە ئی سیاسەتە شکسش واردەن. گەلەکەما جە هۊرچنیەکانە هەڵویسش نیشانەدا و عالش پنە دایمۍ. پۊکاتی گەلەکەما جە ئیساتۍ و ئایندەیچەنە پی هەڵوێسۆ سیاسەتوو جەنگی تێک مڎۆ."