ژەنا جمیەرو فاڕیای جە دژو یاساو باری کەسی عێراقی، سیمینارێوەشا ئەنجامدا بە نامو نیشانو"هۆرسەنگنای پەی پرۆژە هەموارو یاساو باری  کەسی جە عێڕاق و هەرێمو کورڎەسانینە"

هێزی جە مەکۆو جمیەرو فاڕیاینە جە شارو سلێمانی بە ئاماڎەبیەی نوێنەرو ژەنا جمیەرو فاڕیای و ژووری یاسایی جمیەرەکەی، سەبارەت بە کاریگەریەکاو هەموارو یاساو باری کەسی جە عێراقەنە و بەتایبەتی سەرو هەرێمو کورڎەسانی. سیمنارێوە پەی هەریۆ جە پارێزنەرا شۆخان حەمە ئەمینۍ و شاڵاو ئەبوبەکری ڕێکوزیا.

جە سەرەتاو سیمینارەکەینە شۆخان حەمە ئەمینە نوێنەرەو ژەنا جمیەرو فاڕیای واتش: پڕۆژەو هەموارو یاساو باری کەسی عیلاقەش بە گرڎ تاکێوە گلێرگەیۆ هەن، گرڎو ئا پرۆسا کە دلۍ خێزانینە هەنۍ هەر جە ئەنجامدای هامسەرگیریوە تا جیابیەیۆ یاخوڎ مەرڎەی زاوڵە وینای دیاری کەرڎەی نەسەبی گرڎ پێوەسا بە یاساکێوە."

'یاساکۍ پەی لاوازکەرڎەی دەورو دادگاین'

جە بەردەامی قسەکاشەنە شۆخانە باسش جە مەڵامەتەکا پەشتەو هەوڵو هەموارکەردەیۆ یاسێکۍ کەرڎ و واتش: " ئی هەموارە مگێڵۊوە پەی مژارو مەزهەبە جیاوازەکا، ۋەرو ئانەی مەزهەب قەرار سەرو پرۆسەو هامسەرگیری مڎۆ، دادگا مشۆم تەسدیقش بکەرۆ، ئینەیچ دەورو دادگای لاواز مکەرۆ و گێڵنۆشۆ پەی مەزهەبە جیاوازەکا."

هەرپاسە باسش جە هۆرشێونایۆ بڕگەو پەنجی کەرڎ جە مادەو ١٠ ی جە هەرێمو کورڎەسانینە هەوڵێوە فرە دریان پەی جابەجێ کەرڎەی ئی مادەیە کە هەرمانەش پنە بکریۆ و پی جۆرە بەردەوامە بۍ جە قسەکاش: "ئی مادە باس چانەیە مکەرۆ ئەگەر کەسێوە جە جبەرو یاسایۆ هامسەر گیری بکەرۆ ڕووبەڕوو ئەوەکۆڵیای و ۋنەپەرسای و سزای یاسایی مبۆوە جە کاتو هەموارو یاسای باری کەسینە  ئی مادەیچە هۆرشێویۆوە، واتە گرڎ کەسۍ ئازاڎ مبۆ و متاوۆ جە جبەرو دادگایۆ هامسەرگیری بکەرۆ، یان ئەگەر جە وەختو دیاری کەرڎەی مەزهەبینە ژەن و پیا خیلافشا بۆ ئەگەر ژەنەکۍ مەزهەبێوە دیاری کریاش نەبۆ مەزهەبو پیاکەی مشۆم سەرو ژەنەکێرە بسەپیۆ پینەیچ  خاوەنداریەتی جە ژەنۍ مسنیۆوە."

دماتەر جە سیمینارەکەنە پارێزنەر شاڵاو حەمە ئەمین قسێش کەرڎۍ و زیاتەر یاساکێش ڕۆشنەکەرڎۆ و  واتش: " بە هەموارکەرڎەیۆ ئی یاسۍ سەر ۋنەشێویای پەی گلێرگەو کورڎیی وەش مبۆ پا قەرارەیە ژەنی عێراقی ١٠٠ ساڵۍ مگێڵاوە پەی دمای، جە ڕوو دەرونی و جەستەیوە دماو زاوڵە بیەیچ کاریگەری خراپ سەرو ژەنا منیۆرە چونکی ئاماڎۍ نییەنە بۆ بە ئەڎا."

'یاساکۍ هانداین پەی فرەژەنی و پاشێلکەرڎەی مافەکا ژەنان'

جە بەردەوامی قسەکاشەنە ئاماژەش پانەیچ دا کە: "هەموارکەردەیۆ یاساکۍ پا جۆرە دەسدرێژیین ملو تاکو گلێرگەیرە، زاوڵەی تەمەن ٩ ساڵ، وەختۍ نمەتاوۆ هامسەرگیری بکەرۆ و بە پاو مەزهەبی ڕاش پنەمڎریۆ. پۊکەی ئینە قبوڵ نمەکریۆ هەرپاسە ڕا وەش مکەرۆ پەی فرە ژەنی ئەگەر یاساکۍ پا جۆرە هەموارە بکریۆوە عێراقی بەرەو هۆروێڵیای مبەرۆ و تنوتیژی زیاڎ مکەرۆ و مافو ژەنا و زاوڵا پاشێل مکەرۆ."

 جە ٤و ئی مانگێنە پەڕلەمانو عێراقی ۋنایۆیش پەی هەموارو یاساو باری کەسی ژمارە ١٨٨و ساڵەو ١٩٩٥ی کەرڎ، بە پاو قسۍ شارەزایا جە هەموارەکەنە مەزهەب گەرایی قوڵ مبۆوە، وە مافەکاو ژەنا و زاوڵا پاشێلۍ مکریا. بەشێوێوە ژەنی جە وەختو جیابیەیۆینە جە مافو ئەڎایی و میراتی بێبەشە مکریۆ. هامکات ڕا بە هامسەرگیری تەمەن نۆ ساڵی و هامسەرگیری جە جبەرو دادگاکاوە مڎۆ.