کۆنفیدراسیۆنوو سەندیکاکاو سکۆتلەندای کە بەریتانیانە نوێنەرایەتی زیاتەر جە نیم ملوێن کرێکارا مکەرۆ، جە کۆنگرەو گرڎیی ٢٠٢٤ینە قەرارش دا پەی ئازاڎیی رابەروو گەلوو کوردی عەبدوڵا ئۆجالانی کۊشیای زیاتەر بکەرۆ.
سەرۆکوو کۆنفیدراسیۆنوو سەندیکاکاو سکۆتلاندای مایک ئارنۆت هۊرسەنگنایش پەی قەرارەکا کۆنگرەکەیشا کەرد. جە کۆنگرەکەنە قەراردریا کە پەیوەس بە ورەتەو چەکی جە تەرەفوو بەریتانیایۆ بە تورکیای و چارەسەری سیاسی پەی پرسوو کوردی، فشار وزانۍ سەروو بەریتانیای و حەرپاسە دەوڵەتوو تورکی.
ئارنۆت ئانەیچش وست ڕووە، کە ئاڎۍ پەی ئازاڎیی رابەروو گەلوو کوردی عەبدوڵا ئۆجالانی و حەرپاسە پەی ئانەی بڕۍ هەنگامۍ بنرییا داواشا جە حکومەتوو بەریتانیای و دەوڵەتوو تورکی کەردەن و ئەرەیاۋناش، "چنی ئانەیچە داواما جە حکومەتوو بەریتانیای کەرد کە ناتۆنە حۊڵە دیپلۆماتیکەکاش وزۆ گەڕ و ۋرەتەی چەکی بە تورکیای مردنۆ.حەرپاسە داواما کەردە کە پەی ئانەی دەموودەس بۆردومانوو سەروو مەنتیقە کوردییەکا مردۆ، دەس بە حۊڵەکا بکریۆ. قەرارە ئەساسیەکېما ئینېنۍ؛ جە سەرنیشتوو ۋەرکەوتوو سوریاینە هجوومەکۍ سەروو هەرێمەکاو کوردا مردا و حکومەتوو بەریتانیای پەی ئازاڎکەردەو عەبدوڵا ئۆجالانی فشار وزۊنە سەروو تورکیای".
ئارنۆت ئەرەیاۋناش، ئاڎۍ پەی ئازاڎیی عەبدوڵا ئۆجالانی پېخامېوە تایبەت پەی وەزارەتوو جبەروو بەریتانیای و باڵوێزخانەو باڵاو تورکیای منویسا و واتش: "جە کۆنگرەکەنە بە بەشداری ٣٠٠ نوێنەرا و زیاتەر جە نیم ملوێن کرێکارا، یۆ جە مژارە سەرەکیەکاما پرسوو عەبدوڵا ئۆجالانی بۍ کە ٢٥ ساڵېن ئینا زینڎانەنە و ٣ ساڵېن هیچ زانیاریېوە جە بارەشۆ مەزانیۆ. پەیوەس بە ئەنجامنەڎای دیڎاری جە بەینوو ئاڎیی و پارێزنەرا و بنەیانەکەیشەنە گفتوگۆما کەرد. جە وەختوو ئاماڎەکەردەی ئەنجامنامەی و بەرکەردەی قەرارینە، هیچ نوێنەرێوە کۆنگرەکەی دژوو ئا قەرارا نەمرداوە و ئێمە بە پەشتیوانی رەهاو تەماموو پێکئامایەکاما ئا قەرارێما دۍ".
ئارنۆت دەسنیشانش کەرد کە عەبدوڵا ئۆجالان کرێڵوو چارەسەرییا و واتش، "جە ئیساتێنە ئێمە پەی ئازاڎیی عەبدوڵا ئۆجالانی کۊشیایمۍ. بەڵام قەرارەکۍ ئی کۆنگرەیە بانۍ بە مایۍ ئانەی کە ئێمە فشاری زیاتەر و قورستەر وزمۍ سەروو دەوڵەتا".
