فیگەن یوکسەکداغە سەبارەت بە سری سورەیا ئۆندەری کە ئینا چێرو چارەسەرو چڕو دکتۆرینە واتش: "ئینانی جا باوەڕێنە بە وەشەویسی، پەشتیوانی و دوعاکاما خاس بۆوە و گێڵۆوە سەرو ئەرکە تاریخییەکەیش جە پرۆسەو چارەسەریرە."
فیگەن یوکسەکداغ هامسەرۆکەو وەڵینەو پارتو دیموکراتیکو گەلا (هەدەپە) پەیامێوەش ئاراسەو سری سورەیا ئۆندەری ئەندامو شاندو ئیمرالی دەم پارتی و یاگەگیرو سەرۆکو پەرلەمانی کەرد، کە دماو عەملیاتێ ١٢سەعاتی کە ئینا بەشو چەمدێری چڕینە.
پەیامەکەو فیگن یوکسەکداغێ کە جە هەژمارو دیجیتاڵ میدیای وێشنە وەڵاش کەردۆ، پی جۆرە بێ: "بە خەمێوە فرە ئشنیم کە سری سورەیا ئۆندەر نەوەش کەوتەن و بارودۆخو تەندروسیش تێکشییەن، من بە دڵ و گیان ئینانی جا بڕوێنە کە پی زووانە تاوۆنە جارێوە تەر ڕووەی وەشە و با دڵەی کە پەی ئاشتی گەلا دێوەنە گێڵۆوە پەی لایما. بڕوام چانێنە بە وەشەویسی، پەشتیوانی و دۆعاکا، خاس بۆوە و گێڵوە سەرو ئەرکە تاریخییەکەیش جە پرۆسەو چارەسەرینە. دڵمان ئینا چنی تۆ..."
