هامسەرۆکایەتی کۆنسەو ڕاوەبەرایەتی کەجەکەی پەیامێوە نوویسریاش پەی "کۆنفرانسو یەکڕیزی و یەکهەڵوێسی کوردی جە وەرنیشتەنە" گیانا و واتش: "گرڏ کاتێ پەشتیوانی جە ڕەنج و ئەوەکۆشایتا مکەرمێ هەتا سەرکەوتێوە هەمیشەیی".
جە "کۆنفرانسو یەکڕیزی و یەکهەڵوێسی کوردینە جە وەرنیشتەن" کە شارو قامیشلۆ و وەرنیشتوو کوردەسانینە بەردەواما، پەیامو پەشتیوانی کەجەکەی پەی کۆنفرانسەکەی ونریاوە.
پەیامەکەو کەجەکەی پی جۆرەنە:
"هەڤاڵا قارەمان و ئێژاکاما
سەرەتانە سەرو نامێ ڕابەر ئاپۆی و گەریلاکا ئازادیی کوردەسانی سڵام جە گرڏو ئەنداما کۆنفرانسەکەی مکەرمێنە و برواما چانێنە بە ڕەنجو شمە کۆنفرانسەکە سەرکەوتە تەر بۆنە، شۆڕشو وەرنیشتی کە جە ١٩ـو تەمووزو ٢٠١٢ نە دژو ڕژێمو بەعسی و، داعش، دۆڵەتو تورکی و چەتەکاس، جە ئەنجامەنە زیاتەر جە ١٠ هەزار گەشمەرڏێ و زامڏارێ بە سەرەمشقایەتی یەپەگەی، یەپەژە و قەسەدەی سەرکەوت. ئێمە سڵام جە گرڏو خەباتکارا ئی شۆڕشەیە مکەرمێنە و گەشمەرڏەکاما بە منەتدارییۆ یاڏ کەرمێوە و هیواو سەرکەوتەی و تەندروسی پەی زامڏارەکاما وازمێ. بێگومان ئی شۆڕش و دەستکەوتێ بەرهەموو ڕەنجو ڕابەر ئاپۆینێ، گەل بە پەیوەسبییەی بە ڕابەرەکیشۆ یاوا پی دەسکەوتا. بڕواما چانێنە کە بە زهنییەتو شۆڕشو ئازادیی ژەنێ و، گلێرگەی و نەتەوەو دیموکراتیکی و ئیکۆلۆژی ئی شۆڕشە پارێزیا بۆنە و وەڵێ گنۆنە.
ڕابەر ئاپۆ پەی ئانەی کوردی جە قڕکەردەی دەرباز بکەرۆ و بۆنە خاوەن شناسنامە و بییەو ژیوای وێش پێشکەش بە گەلەکەیس کەرد و ماوەو ٢٥ ساڵان جە زینانەنە مڏرامان مکەرۆ. ئارۆیچ بە بانگەوازییەکە و دەسوەڵوستەکەیش گەرەکشا جە پرۆسێوە تاریخینە کە جارێوە تەر تەرسەی گۆرێ هەنە، کورد بۆنە هێزێوە کاریگەر و خاوەن ماف، پەی ئینەیچ بانگەوازو یۆبییو نەتەوەییش کەرد و گەلەکەما جە حەر چوار پارچەو کوردەسانینە خاوەندارێتیش جە بانگەوازییەکەی کەرد. پۆکەی ئێمە موبارەک بای جە گەلەکەیما جە وەرنیشتوو تەمامو هێز و ڕێکوزتەکا مکەرمێ و سووپاو ئی هەڵوێسە جوامێرانەیشا مکەرمێ.
ئەرکو یوەم و کۆنفرانسەکەی و هەڵوێسو نەتەوەیی ئانەن کە ئا دەسکەوتێ کە بە بەخشا و دەیان هەزار گەشمەرڏێ خوڵقنانشا پارێزناش، شۆڕشو وەرنیشتوو کوردەسانی بە خوڵقناو ئیدارەو وێڕاوەبەری سەرنیشتوو وەرکەتوو سووریای جە وەرکەتوو دلێڕاسەینە بییەن باخچە و دیپلۆماسی. ئینەیچ هێزش بە گەلی بەخشان و بییەن بەشانازی پەی گرڏو گەلوو کوردی. بڕواما چانێنە ئی شۆڕشە نەک تەنیا پەی سووریای بەڵکووم پەی گرڏو وەرکەتوو دلێڕاسەی بۆنە هێزێوە گۆرە وەڵکەوتەو دیموکراسیی.
ساڵانێوە هەوڵمڏەیمێ و هەرمانە پەی وەڵکەوتەو یۆبییەی نەتەوەیی کەرمێنە. چونکە دەسکەوتەکێ حەر چوار پارچەو کوردەسانی تەنها بە یۆبییەو نەتەوەیی پێکمێ، کاتێ یۆبییەو کوردا نەبۆنە ئانە هێزە ئەرەگیرەکێ ناکۆکی بەینوو هێزە کوردییەکانە وەش مکەرا ئینەیچ پاسە مکەرۆ ئەرەگیری بەردەوام بۆنە. کۆنگرەو نەتەوەیی و یۆبییەو نەتەوەیی پەی بییەو نەتەوەیی فرە گرنگ وینمێ. پۆکەی کۆنفرانسو هەڵوێسو نەتەوەیی وەرنیشتوو کوردەسانی بە هەنگامێوە تاریخییە وینمێ.
بڕواما چانێنە ئا یۆبییەی کە ئی کۆنفرانسە و هەڵوێستە وەڵێش وزۆنە، جە دیموکراتیزەکەردە و سووریای و مسۆگەر کەردە و یاسایی کەردەی دەسکەوتە نەتەوەییەکا کوردا و دیموکراسیینە دەورێ چارەنووسساز گێڵنۆنە. بێگومان پەی ئانەی ئی ڕەنجە یاوۆنە بە سەرکەوتەی ڕێککەوتەو بەینو پێکئامایەکا، بڕواکا، ژەنا و هێزە دیموکراتییەکا سووریای گرنگێنێ.
جە دماینە ماچمێنە جە گرڏ کاتێ زیاتەر کوردێ پەنەوازیشا بە کۆنگرەی نەتەوەیی هەن، بەهیوانمه ئی کۆنفرانسە بۆنە بناغێوە و بۆنە هەنگامێوە پەی یۆبییەو کوردا سەرو ئاستو حەر چوار پارچەو کوردەسانی.
سەرو ئی بنەمێ، جارێوە تەر سڵام جە کۆنفرانسەکەی مکەرمێ و گەرەکمانە بزاندێ کە گرڏ کاتێ پەشتیوانی جە ڕەنج و ئەوەکۆشایتا مکەرمێ هەتا سەرکەوتێوە هەمیشەیی. پێسەو ڕابەر ئاپۆی واتەنش “کات کاتو کوردان، کات کاتو ئازادیی کوردان".
