جە سەڎ ساڵی وییەرڎەنە ئاژەو کوردی بەردەوام یۆبییەن چا ئاژا کە جەلایەن و دۆڵەتە ئەرەگیرەکا و مۆدیرنیتەو سەرمایەداریۆ، دژ بە گلېرگەو کوردی دریژە بە فراوانبییەو ویش و دۆڵەت نەتەوە داردەسەکاش مڎۆنە. ٢٦ساڵۍ چێوەڵتەر جە کەسێتی ڕێبەر ئاپۆینە پلانگێڵنێوە میامینی، دژ بە ئاخیزو کوردی بەشێوێوە فراوان جە تەمام و دنیێنە دەسش پنەکەرد.

٩/١٠/ ١٩٩٨ ڕێبەر ئاپۆ خاک و وەرکەوت‌و میامینیش بەرەو دۆڵەتا ئۆروپای جیائاست، بە ئامانج و ئانەی کە ئاژەو کوردی جەڕاو دیموکراسیۆ چنی سیستەم و دۆڵەت نەتەوەکا "تورکیا و ئێران و ئێراق و سورییەی" چارەسەرکەرۆنە.

پیلانگێڵنای دژ بە ڕابەر ئاپۆی چێرو سەرپەرشتی دۆڵەت و "ئەمریکا و بەریتانیا و ئیسرائیل"ی و بەشێوە فرە جە دۆڵەتا ئۆروپای وەڕاوە بریا. مەڵامەت و ئانەی وەختێوە ڕابەرایەتی ڕووەکەرۆنە ئۆروپا هیچ دۆڵەتێوە بەنام دیموکراتی ئامادەنەبی کە ڕێبەر ئاپۆی گیرۆ وېش و ماف و مەنەیشۆ پنە بەخشۆنە، ئینەیج ئا ڕاسییە نیشانەمرۆنە کە ڕابەر ئاپۆ سەرمەشقی ئا ڕۆحە ئازادەو کوردی مکەرۆنە کە جگە جە ژیانێوە ئازادانە بە هیچ ژیانێوەتەری مەساکیۆرە.

دۆڵەت و یۆنانی کە وەعدو مەنەیۆ و چارەسەرکەردەو ئاژەو کوردیش جەوېش گیرتەبێ، خیانەتش چی وەعدەیشەکەرد پانەی چنی یاواو ڕابەرایەتی جە فڕگەخانەنە ئاگاڎارش کەراوە کە مەبۆنە جە خاک و یۆنانینە مەنۆوە، جە پەرتووک و وەرگرینامەو مرۆڤی ‌و ئازادینە ڕابەر ئاپۆ ڕەخنەو دۆڵەت و یۆنانی پانەی کەرۆنە کە چنی کاروەدەسا ئەسینای خیانەتشا جە فەیلەسوفێوە گەورەو پیسە سوقراتیش کەردەن، ئانە ئارۆنە نەوەکۍ ئاپۆلۆنی هەمان خیانەت جە وەعدو شەرەفی کەرانی دژ پی ڕابەرەیە. پۆکەی ڕابەرایەتی ماچۆ وەشحاڵەنا کە تاکێوە نییەنا چا ئاخێزە ناشیرینەو یۆنانی، خاک و یۆنانی بەرەو ڕوسیا جیامازۆنە، ئەمریکا و هاوپەیمانەکیش ڕوسیای وزا چیرو فشارێوە فرەی تا ئانەی دۆڵەت و ڕوسی جە وەرانوەرو بەخشایش جە ١٠ملیار دۆلارانە دەسبەردارو ڕابەرایەتی بۆنەو ڕووەکەرۆنە خاک و ئیتاڵیای.

جارێوتەر فشارەکۍ پاسەکەرانۍ ڕابەرایەتی ڕووەکەرۆوە ڕوسیاو دماتەر یۆنان، یۆنانەنە تەمام و ڕاکا جە ڕابەرایەتی وزیارە، تا ئانەی دۆڵەت بەنام دیموکراتییەکۍ ئۆروپای و ئەمریکای وەرو ئانەی ڕووەی سیاوەشا بە ڕۆشنی بەرنەگنۆ، ڕابەرایەتیشا جە ئۆروپانە دەسگیرنەکەرد و ڕەوانەو ئەفریقایشاکەرد تا ئانەی کە جە ڕۆ ١٥و ١٩٩٩ی جە نەیرۆبی پایتەخت و دۆڵەت و کینیای ئەرفاشا و بەشیوێوە فرە دڕندانە ڕێبەر ئاپۆشا بەرەو دورگەو زینانی تاکەکەسی ئیمراڵی جە بەحرو مەڕمەڕەینە بەیەنشا"جەستە" دیلکەرد.

چی بارۆ ڕابەرایەتی جە مانیفیستۆکاشەنە ماچۆنە کە من زینانی دۆڵەت و تورکی نییەنا، ڕاسی ئانەن کە من زینانی مۆدێرنیتەو سەرمایەدارینا، دۆڵەت و تورکی و کاروەدەسەکیش دماو چن ساڵا ئەرەیاوناشا کە نەزاناما ئی گڕۆڵە "تۆپەڵ" ئێرینە چێشبێ داشاوە دەسوئێمە، ئانەی پەنەوازا درکش پنەکریۆنە ڕۆڵ و دەوڵەتە ئەرەگیرەکا کوردەسانی و دۆڵەتەکا وەرکەوتوو میامینین جە گێرتەو ڕابەرایەتینە، ئینە سەرەڕاو ڕۆڵی قیزەونو هێزە کوردییەکا پانیشت ‌و کوردەسانی. هەمانکاتەنە جەلایەن و هێڵۊ و خیانەت و کوردیۆ هۆڵ ‌و تەسفییەکەردەو پەکەکەی دریا هەمانکات هێرشێوە فرە فراوان پەی سەرو گەریلای جە گردلێوە کریا، بەڵام چونکە پەکەکە سەرو ئیرادەو ویشۆ ئەرەمەزیانەرە، تاواش گردو ئاژەکا دەرباسکەرۆنە و جە دلۍ وېچشەنە دمایی بە هێڵۆ و خیانەتی جە کەسایەتی عوسمانی و بۆتانی بارۆنە و کۆنگرەو گەلی مەزنۆرەو و پیجۆرە پەکەکە بی بە یانەو مڵک و گلیرگەی.

مدرامان و ڕێبەرایەتی جە ماوەو ٢٥ساڵی ۋییەردەینە ئانەش سەلەمنان کە گلېرگەو کوردی بییەن بە خاوەن ستراتیج و هێڵۆو ئیدۆلۆژی وېش و بەرەو ژیۋایێوە ئازادی هەنگامە منیۆنە، هەرچی پۆلیسە بەکرەگرتەکی مۆدێرنیتەیجەنۍ جە دماو ۋییەردەو ئی ٢٦ساڵەیە جە پلانگیڵنای دان پا ڕۆڵەیرە منیا کە ئەمریکا دژ بە ڕابەرایەتی پەنەش گێڵنێنۍ، جە نموونەو دڎان نیایپۆرەو ماسیمۆ دالیمی سەرۆک وەزیران و ئاوەختەو دۆڵەت و ئیتاڵیایبی جە میانەو چەم پنەکۆتەیشەنە چنی میدیا خەبەری ئەرەیاوناش کە ئیدارەو کۆشکەی چەرمۍ"سپی" جە کەسایەتی کلینتۆنینە ئاگاڎارێشا کەردیمێ کە مەبۆنە بەهیچ جۆرێ عەبدوڵڵا ئۆجالانی گیردۍ وێتا.