هامسەرۆکەو پارتوو ژیۋای ئازاڎیی کوردسانی (پەژاک) پەیمان ڤیانە هۊرسەنگنایش پەی کۆنگرەو چوارەم و کەژاری کەرد کە جە بەین و ٧-٩و ئایاری سازکریا.

پەیمان ڤیانە پی جۆرە دەسش بە قسەکاش کەرد: "ئێمە پی بۆنۆ، جە سەرەتانە مبارەک بایی مکەرمۍ جە مهەندیسوو ئازاڎیی رابەر ئاپۆی، حەرپاسە ئا ئەڎۍ کە پەی ئازاڎیی قوربانی گەورەشا دان، ئەڎایا گەشمەرڎا، ئەڎایا ئاشتی و تەماموو ژەنا جە مێڎانەکانە و جە هەمان وەختەنە بە تایبەتی ئا ژەنێ کە زینڎانەکانە ئەرەکۊشا، جە گرڎوو ژەنا نەتەوەکا ئێرانی، گرڎوو گەلا وڵاتپاڕێزنی، گرڎوو ئا ژەنە شۆڕشگێڵنا کە جە ۋەرا ۋەروو سیستموو کۆیلەداری و قڕکەرینە ئەرەکۆشا، مبارەک بایی وسڵامشا ئاراسە مکەرمۍ. جە هەمان وەختەنە ئێمە ئی کۆنگرەیە جە تەماموو ئەنداما کەژاریچ مبارەک مکەرمۍ. کۆنگرەو گلێرگەو ژەنا ئازاڎیی ۋەرکەوتوو کوردسانی (کەژار) جە پرۆسێوە فرە گرنگەنە سازکریا. ئێمە جە قۆناغۍ چانێنە کە کۊشیای ژەنا، هەم سەروو ئاستوو کوردسانی، سەروو ئاستوو ۋەرکەوتوو دلېڕاسەی و هەمیچ سەروو ئاستوو جەهانی، مۆرەو ۋێش جە جیهانی دان و ئێمەیچ جە قۊناغۍ چانێنە کۆنگرەما بەست. سەرمەشقایەتی ژەنا جە ئاستوو فاڕیای و هۊرچەرخنای تاریخینە، ساحیب دەورێوە گرنگەنۍ.جە ئاستێوە باڵانە کۊشیانە. ژەنی جە دژوو هوشیاری نەتەوەی، ئەرەگیری و پیاسالارینە کۊشیانە".

'کەژار ساحیب و میراتێوی گەورەیا'

پەیمان ڤیانە پی جۆرە درێژەش بە قسەکاش دا، "چی ساڵا دماییەینە ۋەروو ئانەی ژەنی خاوەن رادیکاڵتەرین سەرمەشقایەتی بیێنۍ، جە ئیساتێنە رابەرۍ کۊشیاینۍ. ئا مژارە جە کۆنگرەکەمانە گرنگتەرین مژار بۍ. ژەنی رەخنەشا جە ئێمە بۍ. ئێمە پېسە کەژاری بە شێوێوە کە چەمەڕا کریۆ، نەبیەیمۍ بە جوابدەر. ۋەروو ئانەیچ ، ئێمە گردیما ۋەروودەم و ژەنانە رەخنەما جە ۋێما گێرت. کەژار ساحیب میراتێوە گەورەن. بە دەیان سەشمەرڎۍ پېسە شیرین عەلەمهولۍ، زیلان پەپولە، فەرماندۍ گەورێما ئاریەن ئارە، حەرپاسە گەشمەرڎە سارا، بشەنگە و شیلان بانە، کە کەژار جە سایەو ئاڎیشاوە گەورەتەر بی، بیەیشا هەن. بە رۆحی فیداکاری و زانسی ۋێشا تا دما ژیۋای جەستەییشا پەی ئشناسنامەو کەژاری بیۍ بە بنەما. پەی ژەنا کۆششکارو ئێرانی بیۍ بە یاگۍ هەناسە هۊرگێرتەی و هێقم کەردەی هیوای. جە کۆنگرەکەنە ئێمە پەیوەس بە مژارەکا پېسە کەموکوڕیەکاو چن ساڵی ۋییەردەی کامۍ بێنۍ، دەسکەوتوو ئێمە کامە بۍ و جە ئیساتۍ بە دماوە ئێمە چێش بکەرمۍ، گفتوگۆی ۋەرفراوان کریا و ئێمە ئامانجەکاو ۋێما بەشێوۍ ڕۊشنتەر وستۍ ڕووە".

'سەرمەشقایەتی مکەرۆ'

پەیمان ڤیان سەرنجش وست سەروو ئازاڎیی ژەنا و واتش، " چی قۆناغە تاریخیەنە تەنیا ژەنی متاوا سەرمەشقایەتی حەقەتینە بکەرا. بە سەرمەشقایەتی ژەنا گلێرگە متاوۆ ئازاڎ بۆ، وڵات ئازاڎ بکریۆ و جوگرافیایچ ئازاڎ بکریۆ. رزگاری گرڎوو ئایین، باوەڕی و نەتەوەکا بە شۆڕشوە ژەنا و بە رزگاری و ئازاڎیی ژەناوە پەیوەسا. ئا مژارۍ بیۍ بە رۆژەڤی سەرەکی ئێمە. کەژاریچ سەرمەشقایەتی مکەرۆ. پێویسا ئێمە پېسە جمیەری جە بواری سیاسی، کۆمەڵایەتی، رێکوزیایی و پارێزناینە زیاتەر جە ئاستوو سەرمەشقینە دەور گێڵنمۍ. ئێمە ئانەیچما پېسە رەخنێوە قبوڵ کەرد و ئێمە رەخنەما جە ۋێما گێرت. جە هەمان وەختەنە ئێمە پەی سەردەمی تازەی پلان و پرۆژەی تازەما وست ڕووە. ئێمە پاگیرێنمۍ کە جە ئاستێوە باڵاتەرەنە کۊشیەیمۍ، تا ئا وەختەی زیاتەر بیمۍ بە جوابدەرەوەو ژەنا، کە ئێمە خاوەن ئا هێزەنمۍ".

'سیستمێوە کۆنفیدڕاڵا'

پەیمان ڤیانە جە درێژەو هۊرسەنگنایەکاشەنە باسش چانەی کەرد، "کەژار ۋێش پېسە کۆمیتەی رێکوزۆ. سیستمەکە سیستمێوە کۆنفیدڕاڵا. پەی ئانەی ۋەرپرسیاری ۋێش جە ۋەرا ۋەروو گرڎوو ژەنا ۋەرکەوتوو کوردسانی و ئێرانینە جە ئاستێوە باڵاتەرەنە بە ئەنجام بیاونۆ، جارێوەتەر سەروو پرسو ۋەرگیری، پەروەردەی و رێکوستەی کۆمەڵایەتی کۆمیتەینە هەڵوێسەش کەرد. جە ئارۆ بەدماوە کۆمیتەو پەروەردەی کەژاری جە پەروەردەو پیایانە زیاتەر ۋەرپرسیاری ۋێش بەیاگۍ میاونۆ. حەرپاسە کۆمیتەو ژنۆلۆژی پەی ئانەی ژەنا و گلێرگە زیاتەر بانۍ بە خاوەن دەوروو ئیراڎە، جە بوارو بیردۆزی رزگاری ژەنانە زیاتەر بۆ بە خاوەنەو دەوری گەورەتەری. جە هەمان وەختەنە کۆمیتەو ئەرەیاۋنای ئازاڎیی ژەنایچ پەی ئاشکراکەردەی گرڎوو سیاسەتەکاو رژێموو ئێرانی و جە قاوداینە ۋەرپەرسا. حەرپاسە ۋەرپەرسیچا جە وەڵاکەردەیۆ ئایدۆلۆجیاو کەژاری. جە دژوو ژیۋگەیچ کە مرۆڤایەتی چنەشەنە مژیۋۆ، جە دژوو جوگرافیاو کوردسانی قڕکەردەی و تاڵانکاری جە بەرزتەرین ئاستەنە ملۆڕاوە. پەی مردنای و دماییپنەئاردەی پا کردەوایچە ئێمە قەرارما دا کە کۆمیتەو ژیۋگەپاڕێزی یاخود سروشت پارێزنی ئەرەمەرزنمۍ. جە کۆنگرەکەنە بەشداری جوانە ژەنا ئاما ئاراوە و ئەزمونەکێشا پەیوەس بە ۋەرکەوتوو کوردسانی و ئێرانی گفتوگۆشا جە بارۆ کریا. نوێنەرەو هێزەکاو پارێزنای ژەنا ۋەرکەوتوو کوردسانی (هەپەژە)یچ بەشدارۍ بێنۍ. هەپەژە جە ۋەرا ۋەروو پارێزنای گرڎوو ژەنانە ۋەرپەرسا. جە پارێزنای جەوهەری ژەنانە، هەر ژەنێوە جە پەروەردەکەردەی، زانایی کەردەی و بنیاڎنیای سوپێوە گەورەتەرو ژەنا ۋەرپرسیارا. هەپەژە ئایدیاو پەروەردەکەردەی و رێکوستەکەردەیش وست ڕووە."

پەیمان ڤیانە سەرنجش وست سەروو بنەیانەو گەشمەرڎا و واتش، "ئا بنەیانۍ جە شۆڕشوو ئازاڎیینە فرەتەرین قوربانیێشا دێنۍ، بنەیانەو گەشمەرڎانۍ. دلۍ شۆڕشینە ئانۍ کە فرەتەرین دەورشا گێڵنا، بێگومان بنەیانەکۍ، ئەڎایا و تاتەیا گەشمەرڎا بێنۍ. رۆحوو شۆڕشی و نەتەوەییبیەیشا جە بەرزتەرین ئاستەنە بە زینڎەیی راگێرت و جابەجێشا کەرد. پەی ئانەی ئێمە پېسە کەژاری چا شکۆمەندی و رەنجەینە بە ساحیب بەرۍ گنمۍ و بتاومۍ دلۍ تەماموو بنەیانەو گەشمەرڎانە یەکڕیزیێوە و رێکوستەبیەیۍ ساز بکەرمۍ، ئێمە قەرارما دا کە چێروو چەترەو کەژارینە رێکوزیاو بنەیانەو گەشمەرڎا ئەرەمەرزنمۍ. جە قۆناغی تازەنە ئامانجما ۋۍ یاوناین بە گرڎوو بنەیانە و ئەڎایا گەشمەرڎا. جە هەمان وەختەنە بەرێکوستەکەردەی و پەروەردەکەردەی ئا بنەیانایچە ئامانجوو ئێمەنۍ".

'چەترێوە هامبەشە پێویسەنە'

پەیمان ڤیانە جە قسەکاشەنە سەرنجش وست سەروو بەقوەتکەردەی کۊشیای و ئانەش وست ڕووە، "جە کۆنگرەنە پرسوو بەقوەتکەردەی پەیوەندی چنی ژەنا بەلوچ، فارس، گیلەک، ئازەری، عەرەبی و ئەفغانستانی یۆ جە مژارە سەرەکیەکا بۍ. ئێمە جە قۆناغەی تازۍ خەباتینە، یەکێتی و یۆگێرتەی ژەنا ۋەرکەوتوو دلېڕاسەی بەقوەت مکەرمۍ و دروسکەردەی چەترەی هامبەشە مکەرمۍ بە ئامانجی بنچینەییما. پەی ئانەیچ ئێمە پلاتفۆڕمی هامبەش سازمکەرمۍ. کۆمیتەی دیپلۆماسیما پەیوەندیدارا پانەیۆ و ۋەرپرسیاریش ئینا ئەستۆنە. ئێمە خەباتما میاونمۍ بە ئاستۍ باڵاتەر".

'رەنج و ۋنەو گەشمەرڎا بە زایە مەلۆ'

پەیمان ڤیانە جە دما دمایی قسەکاشەنە دڵسۆزی و وەفاڎاری ۋێش پەی گەشمەرڎا شۆڕشی و گرڎوو گەشمەرڎا کوردسانی بەربڕی و پی جۆرە دمایش بە هۊرسنگنای و قسەکاش ئارد: " رژدۍ و پاگیرێنمۍ کە تەماموو قەرار و پلانەکا دلۍ کۆنگرەی، کە متێنێمارە، جابەجێشا بکەرمۍ. حەرپاسە ئێمە کۊشیای بەقوەتتەر مکەرمۍ. ئەسایۆ حەقەو گەشمەرڎا قەولی هەمیشەییمانە. پی بۆنۆ ئێمە سڵام جە گرڎوو هەڤاڵاما کە جە زینڎانەکانە کۆشیا و تەماموو ژەنا ۋێڕاگری مکەرمۍ و جە مدرامان و کۊشیاینە هیواو سەرکەوتەیش پەی موازمۍ".