پەژاک گەشمەرڎە ئیقباڵ موراڎیش یاڎئاوردۆ و واتش: "سەرەڕاو ۋېیەردەو حۆت ساڵا سەرو گەشمەرڎەکەردەی و تیرۆركەردەی هەڤاڵ ئیقباڵ موراڎیی كەچی هەڵای تاوانبارا ئا تیرۆرەیە جە لایەنو ۋەرپەرسا حکومەتو هەرێمو کوردەسانی پەی ڕای گرڎیی ئاشکرا نەکریان."
كۆمیتەو کۊششو بنەیانەو گەشمەرڎا پارتو ژیۋای ئازادی کوردەسانی (پەژاک) بۊنەو حۆتەمین ساڵیاڎو گەشمەرڎەکەردەی ئیقباڵ مورادیۆ ئەرەیاۋنێوە نویسیاش وەڵاکەرڎۆ و ماچۆ: "جە حۊتەمین ساڵڕۆو شەهادەتو چالاکی مافو مرۆڤی، کەسایەتی وڵاتپارێزنی و لایەنگرو پارتیما گەشمەرڎە ئیقباڵ موراڎیی، یاڎو گرڎو گەشمەرڎا ڕاو ئازادی بەرز ڕاگێرمې و قەولو درێژەپنەدای ڕێبازو گەشمەرڎاما ئەسرار مکەرمېوە".
جە ئەرەیاۋناکەینە ئامان: "هێزە بەکرېگرتې و تاریکپەرسا رژێمو ئێرانی جە ١٧و تەممووزو ٢٠١٨ ینە جە ئاکامو کردەوێوە تیرۆریستینە، ۋەرپەرسو جەمەو مافو مرۆڤو کورڎەسانی هەڤاڵ ئیقباڵ مورادی، و لایەنگر و دۆس و هەڤاڵو رێكوستەکەیما"پەژاک"ی و یۆ جە وڵاتپارێزنە ئەشناسەکا گەلەکەیماشا بەشێوێوە دڕندانە و نامرۆڤانە تیرۆر کەرڎ، جارێوەتەر بەنامې هامسەرۆكایەتی، هەڤاڵاما و گرڎو دۆس و وڵاتپارێزنا گەلەكەیما ئا کردەوە نامرۆڤانې و هامشێوەكاش بە تنی شەرمەزار مکەرمې".
جە درێژەو ئەرەیاۋناکەینە ماچۆ: "گەشمەرڎە ئیقباڵ تەمامو ژیوایش بە ئازادی گەلی و نیشتمانی بەخشا و پەی بەدیئاوردەی ئازادی و دیموکراسی کۊشش کەرڎ و تەمەنێوە دوور و درێژش بەرد سەر. دژو زوڵم و زۆری و ئەرەگیری و فاشیزمی و دیكتاتۆری قارەمانانە ئەوەکۊشا و پەی یاوای بە ئامانج و ئاواتەكا گەلەكەیما سەرو خاکێوە ئازادی و نیشتیمانێوە پاکینە، بنەیانێوە شۆڕشگێڵن و کۊششکاریش نیا پێوەرە، کە حەجگیز جە ۋەرا ۋەرو رژێمو ئێرانی و سیاسەتو جیاوازیکەردەینە چۆکشا نەڎارە و رۆڵێوە پېسە زانیار موراڎیش بەخشا بە گەلەکەیما کە تا دما چرکە ساتەکاو ژیۋایش خەمو ئازادی گەلی و کورڎەسانی و ئاشتی و ئازادینە بې.
گەشمەرڎە ئیقباڵ موراڎی یۆ جە کەسایەتیە سۆسیالیست و دڵسۆزەکا گەلو کوردی بې کە شۆڕشو ئازادیش جە کەسایەتی ۋێش و بنەیانەکەیشۆ دەس پنەکەرڎ و نامې و نامونیشانش هەمیشە جە دڵو گەلینە بە گەشی مەنۆوە. گەشمەرڎە ئیقباڵ بە ئەوین و ورە و وزێوە بەتینۆ ۋەرپرسیاری سەروشاناش جابەجا کەرې و بە ئەرەپڕنای ئەرکی شۆڕشگێڕنیش ئارام و ئۆقرې گێرې. تایبە یۆ چا کەسایەتیە کۊششکارا ۋەرکۊتوو کوردەسانی بې کە بڕوای تەمامش بە سیاسەتو یۆبیەی نەتەوەیی گەلەكەیما بې و جە ۋەرا ۋەرو هرووژم و ئەرەگیری کوردەسانینە ئۆقرە نەگێرې و بەردەوام خاوەن هەڵوێسی دیموکراتیک و ئازادیوازانە بې. هەر پەی ئانەیچ وەرمش جە رژێمو ئێرانی و بە کرێگرتە کوردەکا زڕنابې؛ چونكی نە رژێم و نە کرێگرتې و ئەڵقە جە گۆشەکې رژێمی بیەو کەسایەتیێوە دڵسۆز و وڵاتپارێزنو پېسە هەڤاڵ ئێقباڵیشا پنە هەرس نەکریې و دماین جار جە ئاکامو پیلانگێڵنیێوە چەپەڵو رژێمو ئێرانی و بە هامکاری جاشە کوردەکا، ئا پاڵەوان و وڵاتپارێزنەو گەلەكەیما و ئا هەسارە گەشەو کورڎەسانیشا تیرۆر کەرد. پۊکەی یاگې ۋێشەنە جە کەسایەتی هەڤاڵ و هەمڕا و نیشتیمانپەروەرو گەلەكەیما، گەشمەرڎە ئیقباڵینە جارێوەتەر سیاسەتو تۆقنای و بڕفانای و زینانی و ئەشكەنجە و جە قەنارەداو رژێمو ئێرانی ۋەرا ۋەر بەگەلەكەیما و نیشتیمانپەروەرا و ئازادیوازانە ڕسوا و شەرمەزار بکەرمې و بە دەنگێوە بەرزتەر؛ پا سیاسەتە جیاكاریە و رژێمی واچمې نا.
سەرەڕاو ۋېیەردەو حۆت ساڵا سەرو گەشمەرڎەکەردەی و تیرۆركەردەی هەڤاڵ ئیقباڵ موراڎیی كەچی هەڵای تاوانبارا ئا تیرۆرەیە جە لایەنو ۋەرپەرسا حکومەتو هەرێمو کوردەسانی پەی ڕای گرڎیی ئاشکرا نەکریان. جاشې و سیخوڕا دۆڵەتا ئەرەگیرو سەرو کورڎەسانی بە ئاسایی جە هەرێمو پانیشتوو کورڎەسانینە تەڕاتێن مکەرا و خولیاوە و کردەوەی هامشێوە واوەی و چن بارە مکەراوە و رۆ و مانگ و فەسڵ و ساڵ نییا، وڵاتپارێزن و نیشتیمانپەروەر و ئازادیوازێوە سەرو ئی خاكیۆ تیرۆر و گەشمەرڎە نەكەرا. چونكە خەمساردی و نا ۋەرپەرسی، ۋەرپەرسا حکومەتو هەرێمو کورڎەسانی پاسشە کەرڎەن کە کردەوەی تیرۆریسی و سیاسەتو بەكرێگرتەیی و سیخۆری جە هەرێمەكەنە تەشەنە بکەرۆ. ئینە بێ هەڵوێسی ۋەرپەرسا حكومەتو هەرێمین پاسشە کەرڎەن؛ ڕوانە چالاكا مەدەنی و سیاسی بەشەكا تەرو کورڎەسانی ڕووبەڕوو بێ مافی، سەرگەردانی و تیرۆری و كوشتەی باوە".
جە ئەرەیاۋناکەینە ئەسرار کریاوە: "یاگې ۋێشەنە چی یاڎکەردەیۊینە، حەرجۆرە كردەوێوە تیرۆریسی و نامرۆڤانەی ڕیسوا و شەرمەزار بکەرمې و جارێوەتەر داوا جە ۋەرپەرسا هەرێمو پانیشتوو کورڎەسانی بکەرمې پەی ئانەی جە ۋەرا ۋەرو کردەوەی سیخوڕی و تیرۆری و سیاسەتو تۆقنای ڕژێمو ئەرەگیری ئێرانی و توركیای و بەکرێگرتە کوردەکانە خاوەن هەڵوێسې با و بکوژا رۆڵە کۊششکارەکا کوردی ڕادەسو دادگای و یاسای بکریا.
چی یادەنە؛ جارێوەتەر ئەسرارش مکەرمېوە؛ هەڤاڵا و هامسەنگەر و وڵاتپارێزنا گەلەكەیما" ئیقباڵ موارڎی و بێهروز رەحیمی"، هەر یۆشا رۆڵێوە رەنجدەر و نیشتیمانپەروەر و دڵسۆزۍ گەل و خاكی و ئاوەو وڵاتی و نیشتیمانەكەیما بېنې و پەی ئازادی و سەربەرزی گەلەكەیما بێ دووەدڵی کۊششا کەرڎەن و شۊن کلکەو هەریۆیشا جە ئەوەکۊشای ئازادینە دیار و ۋەرچەما و بەمەڵامەتو ئا ئەوەکۊشایە ئازادیوازانەیچشا ناچارې بیې پەنا بارانە پانیشتوو کورڎەسانی و حكومەتو هەرێمی و ژیۋای کولەمەرگی و نەداری و نەبیەیشا بەگیان و دڵ هۊرچنی، تەنیا و تەنیا پەی یاوای گەلەكەیما بې بەمافە زەوتكریاکاشا. پۊکەی جارێوەتەر بەنامې هەڤاڵا و دۆسا و وڵاتپارێزنا گەلەكەیماوە ئەرەیاۋنمېش كە؛ حەجگیز تیرۆر و تۆقنای نمەتاوۆ گەلەکەیما جە یاوای بە ئامانجەکاش دوور وزۆوە، چون پاگیری گەلەکەیما و هەوڵ و ئەوەکۊشای سەرەمڕەو وڵاتپارێزنا ئا حەقەتینەیشە سەلەمنان کە سیاسەتو تیرۆر و تۆقنای و جە قەنارەدای و گێرتەی و ئەشكەنجە و زینانی نمەتاوۆ چۆك بەگەلەكەیما و ئازادیوازا بڎۊرە و جە ورەیشا کەم بکەرۆوە.
چی ساڵیادەنە؛ داوا جە ئەرەمەرزیاکا هەرێمو پانیشتوو کورڎەسانی و حكومەتو هەرێمی و لایەنە پەیوەندیدارەكا مکەرمې؛ ئەنجامو ئەوەکۊڵیاکاشا سەرو تیرۆری و گەشمەرڎەکەردەی وڵاتپارێزنا گەلەكەیما جە پانیشتوو کورڎەسانی پەی ڕای گرڎیی ئاشكرا بكەرا و ۋەرپرسیاری نەتەوەیی و نیشتیمانی ۋێشا جابەجا بکەرا.
جە هەمانکاتەنە؛ داوا جە وڵاتپارێزن و کۊششکار و نیشتیمانپەوەر و ئازادیوازا گەلەكەیما جە پانیشت و ۋەرکۊتوو کورڎەسانی و جبەرو وڵاتی مکەرمې بەچالاكی مەدەنیانە، نەتەوەییانە و یۆبیەییانە ۋەرپەرچو گرڎو ئا سیاسەتە ناڕەوا و نامرۆڤانا رژێمە ئەرەگیرەکا سەرو کورڎەسانی و رۆڵە قارەمان و رەنجدەرەكاش بڎاوە و خاوەنداری جە کۊششکارا ۋێما بکەرمې و دمایی بەسیاسەتو قڕكەردەی و جیاوازی نەتەوەیی و رەگەزی بارمې و ئاڵاو ئاشتی و پێوەرە ژیۋای دیموكراتیانەی بەبەرزی بازمێوە".
