" پژاک بە وانایۆ لۆژیكانەو دۆخو جیهانی و هەرێمەكەی و ئێرانی و وەرکەوتی ئەرەیاوناش، جە كۆشیای ئازاڎیوازانەو وێمانە بەدەر جە هێزی گەوهەریی وێما و پاڵپەشتیی گەلەكەیما و پراكتیزەكەرڎەی پلان و ئەرەسپارایەکاو كۆنگرەكەیما پەشتی بە حیچ هێزێوە بەری و هەرێمی نمەبەس
ویس ساڵێ سەرو ئەرەمەرزنای پارتو ژیوای ئازاڎو كوردستانیرە مویەرۆ. ماوەو ئی ویس ساڵەینە پژاک بییەن ساعیبو دماخانێوی كۆشیای گەورەی و دەسكەوتی گەورەی و بە فیداكەرڎەی سەدان گەشمەرڎە قارەمان و وێگەرەکنەبیا و سەدان گەریلێ و سەدان هەزار بنەیانێ گەشمەردێ و دۆسێ و لایەنگیرێ و گەلی وەڵاتپارێزنی عومری ویس ساڵە جە كۆشیای ئازاڎیوازیی گەلەكەیمانە وەرکەوتو كوردستانی و ئێراننە بییەن بە بەشەش.
پژاک وەختێوەنە وێش ئەرەمەرزنا كە هێزەكاو هامپەیمانی بە سەركێشیی ئەمریكای جە ٢٠٠٣ێوە ڕژێمو سەددام حسێنی گەورە دیكتاتۆرە وەرکەوتو دلێراسەیشا وڕنا و سەدام حسێن دماو پڕۆسێوی دادگاییکەرڎەی دریا قەنارە و فرەو ناوەندە سیاسی و پارت و كەسایەتییەكا ئجێشا، كە جە دوو-یەرە حەفتەی تەرنە ئەمریكا پەلامارەو ڕژێمو ئێرانیچ مدۆنێ و بە دەرڎەو سەدام حسێنیش مبەرۆنێ. پەوکای فرێشا جیای ئانەی ڕۆحو كۆشیای و پتەوكەرڎەی ڕیزەكاشا و هەوڵێ یۆگێرتەی بدانێ، كەچی پاڵشا وەنە داوە و بەگردی كەوتێ چەمەڕایی و وەرموینای پانەیۆ كە دماڕۆنە ئادێچێ هامشێوەو لایەنە سیاسی و كەسایەتییەکاو هەرێمو پانێشتو كوردستانی و ئێراقی ملاوە وەرکەوت و ئێران و ملا سەرو سفرەی حازری و حەریۆ هەرێمێ و تەپێوەشا سەس مگنۆ و مکەرانێش بە ڤێلا و هۆتێل و مۆتێل و مبانێ بە ئاغاو سەروو گەلی. ئا وەرمە فەنتازییێ پێسە وێشا نامێ دی. زاناشا پاسەن حەریۆشا هامشێوەو لایەنە سیاسییەكاو ئێراقی و هەرێمو پانیشتو كوردستانی وێشا خزنان پاڵو بڕێ چا هێزا کە گوایا ناكۆكێنێ چەنی ڕژێمو ئێرانی.
لاێوی تەرۆ ژمارێو جە هێزەکاو دلێ ئێرانی بە نامێ بەرەو ڕیفۆرمی و كەسایەتی، كە بانگەشەو دیالۆگو شارستانیەتەكاشا و مافو نەتەوە جیاوازەكاو دلێ ئێرانیشا بەرز کەرێنێوە، هامشێوەو هێزەكای تەرو بەرو ئێرانی بۆنەو نزیكبییەیۆ و ڕێككەوتەی ڕژێمو ئێرانی و ئەمریكایوە پڕۆسەو فاڕیایە سیاسی، كۆمەڵایەتییەکاو دلێ و بەریوە کریێ بەرۆ.
ڕژێمو ئێرانی پێسە یپ جە گەورە زلهێزەكاو مەنتێقەکەی هامشانەو دەوڵەتای تەرو مەنتێقەکەی دەوڵەتو تورك، سوریا، عێراقی گەرەکشابێ بە درێژكەرڎەیۆ وەختێ لاێوە و لاێوی تەرۆ بە ڕێبازی جیاواز و بڕێ جاریچ بە شێوەی هامبەش بڕێو یاگێنە بە هامكاری زلهێزە جیهانییەكا فرسەتو مانۆڕی و مناورەیشا ئەمریكانە و جە هاماپەیمانا بڕی و تا ئا یاگێ جە هێز و تواناشانە بێ، ئاستەنگێ و قۆرتێشا دژو ئا هێزا نیاوە و ڕاشا چانەیە گێرتە، كە ئەمریكا و هامپەیمانێ بەئاسانی و ماوێوی كەمنە پلانە و پڕۆژەكاو وێشا ئێراق و مەنتێقەکەنە بیاونا یاگێ. پەوکای حەرچند ساڵ جارێو بە نامێوی جیاوازە ئەمریكانە و هامپەیمانێ پێسەو "عێراقی دیموكراتیكی، پڕۆژەو وەرکەوتو دلێڕاسەی گەورەی، پڕۆژەو وەرکەوتو دلێڕاسەی تازەی، پڕۆژەو بیكرهامڵتۆنی، پڕۆژەی دیمیستۆرای و نەتەوەیۆگێرتەکا و هەوڵێشا دێ پلانێ و بەرنامەكاشا بیاونا یاگێ. ئا پڕۆژە و پلانێ جە بوارو دلێنەینە جیاوازیێوی چانەشا نەبێ، ئانە نەبۆ کە گردشا یۆ بێنێ و تەنیا نامەکێشان جیاوازو بێ.
پارتو ژیوای ئازاڎو كوردستانی"پژاک"، گەرمەو ئا جەنگ و ناكۆكی و ئاڵۆزییە سیاسییانە ساڵەو ٢٠٠٤ ئەرەمەرزنای وێش پێسەو پارتیوی تازەی بە ڕا و ڕێباز و هزر و فەلسەفێوی تازە و بانگەشەو بەدەسئارڎەی مافە ڕەواكاو گەلەكەیما وەرکەوتو كوردستانینە پێسەو گەلێوە دەسەبەر بكەرۆ و دلێ ئێرانێوی دیموكراتیكینە بەهامبەشی چەنی گەلای تەرو ئێرانی بە شێویوی ئازاڎانە بژیوۆ ئەرەمەرزیا و جە كۆشیایشنە بە بەكارئارڎەی مافو پارێزنای ڕەوای، كۆشیای ئازاڎیوازیش دەس پەنە کەرد.
پژاک بە وانایۆ لۆژیكانەو دۆخو جیهانی و هەرێمەكەی و ئێرانی و وەرکەوتی واتش، ئێمە جە كۆشیای ئازاڎیوازانەو وێمانە بەدەر جە هێزی گەوهەریی وێما و پاڵپەشتیی گەلەكەیما و پراكتیزەكەرڎەی پلانە و پڕۆژە و ئەرەسپارایەکاو كۆنگرەكەیما پەشتی بە حیچ هێزێوی بەری و هەرێمی نمەبەسمێ و سەرو ئا بنەمێوە ماوەو ویس ساڵی ڕەبەقین بێوچان برەو بە كۆشیای ئازاڎیوازانەی و دیموكراتییانەو وێش مدۆنێ.
دماو ویس ساڵا ئا وانایۆ پژاکی پەی ڕەوشو جیهانی و هەرێمەكەی و دۆخو دلێو ئێرانی و گەلەكەیما وەرکەوتو كوردستانینە ئا شرۆڤە و ورسەنگنایێ ساڵەو ٢٠٠٤ سەلەمناش چندە یاگێ وێشانە بێنێ. وێش پەی وێش ئا هێزێ چەمەڕوانێ بێنێ کە ئەمریكا و هامپەیمانێ ڕژێمو ئێرانیشا پەی بوڕنا و وەرم بە یاوای ئا كورسی و دەسەڵاتیوە وینێنی کە ئارۆ بۆنەو یاواینە جەیۆو ئەمریكای و ڕژێمو ئێرانی فرەو هێزە كوردی و ئێرانییەكا بێچەكێ كریێ یا ئێراق و وەرکەوتو دلێڕاسەینە کریێ بەرۆ، بەڵام پژاک جارێوی تەر سەرو هەمان بنەماو كۆشەری و پەشتبەستەی بە هێزی گەوهەری وێش و گەلی و ئازاڎیوازا زیندەتەر جە ویەرڎەی سەنگەرو خەباتی و بەرڎەوامیدای پەی بۆ دەسوستەی مافە ڕەواكاو گەلەكەیما وەرکەوتو كوردستانینە بە ڕۆحو شۆڕشو ژەنی، ژیوای، ئازاڎی برەو بە بونیادنیای نەتەوەی دیموكراتیكی و كوردستانێوی ئازاڎی و وێڕاوەبەر و ئێرانێوی دیموكراتیكی مدۆنە.
پەوکای ئا ئامانج و پیمانە و پرەنسیپەو پژاکی ساڵەو ٢٠٠٤یوە سەرشۆ مەرزیارە ئارۆنە ودماتەریچنە مەرجا و دەس چەنە وەرنەدریان. سەرو ئا بنەمێوە ویسەمین ساڵەو ئەرەمەرزنای پژاکی وەنەو ڕابەر ئاپۆی و بنەیانەو گەشمەرڎا و گەریلاكاو وەرکەوتو كوردستانی و ئێرانی و خەباتكارا و دۆس و لایەنگێراو پژاکی و گەلە وەڵاتپارێزنەكەیما وەرکەوتو كوردستانینە و ئازاڎیوازاو ئێرانی بەرز و مەبارەک بۆ.
