فەرماندەو قەرارگەی ناوەندیی پارێزنای گەل (نەپەگە)ی، موراد قەرەیلان پەیامێوە ڤیدیۊییش ئاراستەو خەڵکوو مەخموری کەرد و دلێشنە ئەرەیاوناش، "گەریلاکاو ئازاڎیی کورڎسانی چاگە هەرمانەشاو وێشا کەرڎە و ئیتر هەرمانەو پارێزنای ئاگەیشا دا دەسوو گەنجاو ئاگەیۊ".
دماو ئانەیە فەرماندەیی قەرارگەی ناوەندیی پارێزنای گەلی جە ئەرەیاوناێوەنە واتەبێش، کە هێزەکێشا جە کەمپوو گەشمەرڎە ڕۊستەم جودیینە کێشنێنێوە، فەرماندەیی قەرارگەی ناوەندیی پارێزنای گەلی موراد قەرەیلانیچ پەیامێوە ڤیدیۊییش پەی خەڵکوو مەخموری کیانا. موراد قەرەیلان پەیامەکەشنە کە ١١و ئەیلوولینە تۊمار کریان، گەشمەرڎاو جمیەروو ئازاڎی، کە خەڵکوو کەمپەکەی بێنی بە ڕێزۊ یادێش کەرڎێوە. موراد قەرەیلان وستش ڕووە کە دەوڵەتوو تورکی قڕکەری کۊلۊنیالیستی سەرباروو گردوو هجوومەکایچ نەتاواش بیاوۊ ئەنجام و ئانەش وست ڕووە، کە گەریلا ڕۊحوو گیانبازییش یاونان بەرزتەرین ئاست. قەرەیلان ئەرەیاوناش، کە کۊلۊنیالیستەکۍ چێولایچ نمەتاوا سەرگنا.
فەرماندەو قەرارگەی ناوەندی پارێزنای گەلی موراد قەرەیلان واتش، کە خەڵکوو مەخموری دلۍ دژواری و تەنگوچەڵەمەی گەورینە مژیوا و بۊنەو هەڵوێستە شکۊمەندانەکەیشاوە خەڵکی مەخموری یاگۍ پەنابەرە سیاسییانە، کەس مەتاوۊ بە بەهانۍ جیاجیێوە ئا ڕاسییەیشا پەرڎەپۊش کەرۊ.
قەرەیلان واتیچش، کە پێسە جمیەروو ئازاڎیی کورڎسانی هێزەکێشا مەخمورنە هەرمانەشا تەمامنێنە و واتش، "ئێمە پارێزنای و وەرگریی ئاگەیە مدەیمۍ دەسوو گەنجەکاشاوە. ". قەرەیلا ئانەیچش وست ڕووە، کە حیچ گومان و دڕدۊنگیێوەشا نییا، کە خەڵکوو مەخموری فرە خاس نوێنەرایەتیی فکر و فەلسەفەو ڕابەروو گەلوو کوردی عەبدوڵڵا ئۊجالانی کەرا.
خەڵکوو مەخموری هەڵوێستێوە شکۊمەندانە نیشانە مدا
فەرماندەو قەرارگەی ناوەندی پارێزنای گەلی موراد قەرەیلان پێسە قسێش کەرڎێ:
"وەڵێنە سڵام جە خەڵکە بەنرخەکەیما کەمپوو گەشمەرڎە ڕۊستەم جودیینە کەروو، دوژمن بۊنەو ئانەیۊ جە هەڵوێستوو ژەنا، گەنجا و گەلەکەیما دلۍ کەمپەکەینە تەرسۊ، هجوومۍ کەرۊ. ئا گرد ساڵۍ گەلەکەما، بنەیانەکێما مەخمورنە نوێنەرایەتیی هەڵوێستێوە کەرا، فرە تەنگوچەڵەمۍ و دژوارییێشا دیۍ. بێگومان ئا هەڵوێستە هەڵوێستێوە شکۊمەندانە و بەنرخا. وەروو ئانەیە دوژمن هجوومۍ کەرۊ و گەرەکشا کەمپەکەی ورشانۊوە.
ئێمە پێسە هەپەگەی هێزەکاما مەخمورنە کێشنمێوە
ئێمە گەرەکمانە چانەیە هاگادارێتا کەرمێوە، کە پێسە هەپەگەی قەرارما دان، کە هێزە سەروازییەکاما چاگە کێشنمێوە. شمە مزاندۍ و هاگادارێندۍ کە ماوۍ چێوەڵتەر ئێمە بەشۍ جە هێزەکاما چا کێشنێبێبێوە. ئیساتێچ گەرەکمانە گردوو هامڕایاما چا کێشنمێوە. بێگومان چا بابەتەنە کەس هیچ داواکاریێوەش وەنەو ئێمە نەکەرڎەن؛ پێسە ڕاوەبەرایەتیی جمیەرەکەیما قسەوباسما کەرد و قەرارێوە چینەما دا، پێسە گەرەکمانە هێزە سەروازییەکاما چاگە کێشنمێوە.
نەتەوە یۊگێرتەکۍ بەڕسمی کەمپوو مەخمووریشا بە کەمپێوە پەنابەرە سیاسییا ئشناسان، وەلۍ چی نمەیا واگە؟ چون بانگەشەو ئانەیە کەرا، کە کەمپەکە کەمپێوە سەروازیین. وەلۍ چی دۊخەنە مشۊم ئینسان ئانەشا وەنە پەرسۊ؛ واگە کەی و چەنی فاڕیا پەی کەمپێوە سەروازی؟ ئەگەر گەریلاکاو ئازاڎیی کورڎسانی و خەڵکوو مەخموری چاگە دژوو داعشی وێگێرییشا نەکەرڎۍ، ئاخۊ یاگێوە بە نامۍ مەخمور یا هەولێری مەنێوە؟ وەختۍ داعش دەسش بە هجوومی کەرد، فرەو لایەکاش گێرتۍ. چا هەلومەرجەنە گەریلا پەی پارێزنای ئا مەیدانەیە ڕووەش کەرڎە واگەی. ئەر گەریلا نەلۍ پەی مەخموری و هەڕێمەکاو واگەیە، چا دۊخەنە نەتەوە یۊگێرتەکێچ نەتاوێنۍ عێراقنە مەناوە. وەلۍ ئا وەختەکاتە گەریلا بەرەو شەنگال، مەخمور، کەرکووک و دهۊک کەوت جووڵە و ئا یاگێشە پارێزنۍ، بەتایبەتی مدرامانشا بە سەرمەشقیی گەشمەرڎە تێکۊشەر و دەنیز فوراتی پاسەش کەرد کە مەخمور، کەرکوک و هەولێر پارێزییا و پێسەیچ دەروازەو هەولێری پارێزییا.
ئێمە هەلومەرجێوە چانەنە ئامایمۍ وا، وەلۍ ئیساتۍ گەریلاکاو ئازاڎیی کورڎسانی دەوری پێویسوو وێشا یاونان و ئیتر ئێمە هەرمانەو پارێزنای و وەرگێریی مدەیمۍ دەسوو گەنجەکاشاوە. کەمپەکە کەمپێوە سیاسیی پەنابەرانەن. مشۊم گرد یاگێوە بپارێزییۊ. مەبۊ کە هیچ کەسێوە پەی هجوومکەرڎەی سەروو کەمپەکەی بەهانۍ جیاجیۍ بتاشۊرە. ئاگە کەمپێوە سیاسین و بییەن بە ساعیبوو ئا مافەیە.
کەمپوو مەخموری نموونەن
شمە سەروو ئەندێشەو ڕادیکاڵوو ڕابەر ئاپۊیۊ ژیوای بونیاد منیەیدۍ، ئەندێشە و ئەرەمەنەی ڕابەر ئاپۊی هۊشمەندیی دیموکراسی هەرە وەڵێکەوتەو ئی سەرڎەمەینە. شمە پێسە گلێرگەی و کەمپوو پەنابەرە سیاسییا مشۊم ئانەیە دەسنیشان کەرڎۍ. ئیساتێنە سیستمێوەتا هەن، وەلۍ مشۊم زیاتەر ئەندێشە و فەلسەفەو ڕابەرایەتی تێکەڵ پا سیستمەیە کەرڎۍ. یانۍ مشۊم زیاتەر دیموکراتیک بۊ، گرد چێوۍ بە ورچنیەی بۊ. مشۊم شمە باخچێوە دلۍ بیابانی بیدۍ کە ولی و خونچەکێش تنگیێنێوە، مشۊم چاگەنە نیشانەو گرد لێوەش دەیدۍ کە دیموکراسی چێشا، سیستمێوە دیموکراتیک-وێڕاوەبەر چەنی مەرزیۊرە. کەمپوو مەخموری ئارۊ دلۍ پانیشتوو کورڎسانی و عێراقینە پێسە نموونەی مێوە و چانەیە زیاتەر متاویۊ کریۊ. یانۍ مشۊم شمە زیاتەر گیان کەرڎۍ وەروو ئا سیستمەیرە کە مەرزنانتارە، نەک بە ڕواڵەت بەڵکوم جەوهەرنە چا سیستمەنە بژیودۍ. ئا گلێرگە کە سەروو خەتەو ڕابەر ئاپۊیۊ هەنگامە منیۊ، پەوکای چا چالاکییەنە، هەرپاسە پەی ئا ئامانجەیە ژیواێوە فرە بەنرخ و مانادارش بونیاد نیان، پا هێزەیە جە جەوهەروو وێش ورش گێرۊ، بەدڵنیاییوە سەر گنۊ، ئێمە دڵنیێنمۍ چانەیە.
سەروو خەتەو ڕابەر ئاپۊی و گەشمەرڎە قارەماناماوە، کە شمە فرێشا خاس مشناسدۍ، شمە سەرگندۍ. پا بڕوا و هومێدۊ بە نامۍ ڕاوەبەرایەتیی پارتیماوە جارێوە تەر بە وەشەسیای و ڕێزۊ سڵامتا وەنە کەروو و هومێدوو سەرکەوتەیتا پەی موازوو".
