ھەرێمو لینزو نەمسایەنە نەورۊز پیرۊز کریا
کورڎ چنی دۊسەکاش ھەرێمو لینزو نەمساینە جەژنەو نەورۊزیشا پیرۊزە کەرڎە.
پیرۊزکەرڎەکەی ڕۊو شەممەی بە دەیەقېۋە ڕێزگېرتەی جە یاڎو گەشمەرڎا دەسش پنە کەرڎ.
مەراسیمەکەنە کورڎەکۍ چنی دۊسەکاشا کۊبیېۋە. "خەتیب دیجلە" سیاسەڎمەدارو کورڎی باسش جە مەعنا تاریخیەکۍ نەورۊزی پۍ گەلو کورڎی کەرڎ.
"خەتیب دیجلە" باسش جە ورچنیە گرڎینیەکا پەرلەمانی و سەرۊکایەتی کۊماری تورکیانە کەرڎو ئەرەیاۋناش:" ئەشۊ پۍ وڕناو ئا سیستمە فاشیستەیە گرڎو ھېزە دیموکراسی و ئازاڎییەکا بە گرڎو قوەتیشاۋە ھەرمانەو ئەرەکۊشای بکەرا".
"خەتیب دیجلە" ۋاتش؛ دەنگېۋەیچ دەنگېن، بەعزەجارۍ دەنگېۋە چارەنۋیس فاڕۊو ئاماژەش بە گرنگی ئی ھورچنیایە کەرڎ.
شەھریبانی کورڎی و سەرحەدۊ و ڕزگار ئاکان و گروپو دەنی لوۋۍ سەرو تەختو شانۊی و ھونەرەکەشا پېشکەش کەرڎ. ھونەرمەنڎ ھۊزان جۊمېرد بە مەڵامەتو نەۋەشیۊ نەتاۋاش بەشڎارو مەراسیمەکەی بۊ.
ھ.ش
