جەمەو قوربانیا کوردەسانی جە ٩و کانونو دووەمینە بە نامەکا شاهوان عەبدولرەحمان، مەکی رەوەندی و هاموڵاتیێوە ئەمریکی بە نامۍ جۆن دۆسی دژو بنەیانەو بارزانی جە دادگاو ناوچەو کۆڵۆمبیاینە دۆسیێوەشا کەردۆ. شەکواکۍ جە دژو بنەیانەو بارزانییا کە پېسە 'رێکوزیاو تاوانکاری بارانی' پێناسە کریان و دۆسیەکە بە ژمارە 1:24-cv-00278-RDM تۆمار کریان.

شرۆڤەکاری ئەمریکی مایکڵ رۆبن جە دیڎارێوەنە چنی ئاژانسەکەیما هۊرسەنگنایش پەی شەکوا تازەکۍ جە دژو 'رێکوزیاو تاوانکاری بارزانییەکا' کەرد و ئانەش وست ڕووە کە ئەوەکۊڵیای چا شەکوۍ مکریۆ کە جە دادگاو ناوچەو کۆلۆمبیای تۆمارە کریێنە و واتش: "مەسرور بارزانی تووشو کێشە و بەڵایۍ گۊرەی بیەن".

'ئانەی دادگایی مکریۆ، حکومەتو هەرێمو کوردەسانی نییا، مەسرورا'

مایکڵ رۆبن سەرنجش وست سەرو ئا دۆسیەیە کە مەسرور بارزانی بە هرووژم، نامەزڕنای و سوکایەتی تۆمەتبار کەردەن و باسش چانەیە کەرڎ کە مەسرور بارزانی هەوڵەکێش پەی هۊرشێونایۆ دۆسیەکەی وستەن گەڕ. واتیچش: "مەسرور بارزانی دروێش کەردە کە شەکواکارەکۍ جە دۆسیەکەنە کیشیێنێوە، یاخود جە مەڵامەتەکەیش نەیاوانەنە. شەکواکەرەکۍ دەسبەردارۍ دۆسیەکەی نەبیێنۍ، جیای ئانەی بە مۊچیاری دادوەری دۆسیەکەشا بەهێزتەر کەردەن و مژارەکۍ پێوەس بە پارێزبەندی و سەروەرییشا چارەسەر کەردۍ. ئانەی دادگایی مکریۆ حکومەتو هەرێمی نییا، بەڵکم مەسرور بارزانییا. بەمەڵامەتو بڕفانای خەڵکی و کوشتەی، بەمەڵامەتو ئا تاواناوە کە بەشێوەنۍ جە دەوڵەتی نمەتاویۆ داواو پارێزبەندی بکریۆ. رەنگاتی مەسرور بارزانی برجیۆشەنە کە متاوۆ دۆسیەکەی پوچ بکەرۊوە، بەڵام ئینە فرە دژوارا. چن کەسێوەیچ جە دژو مەسروری جە ڤێرجینیانە دۆزێشا کەردۆ. ئا دادگایەی دۆسیەکەش چنە کریابێوە، ئا نمونێشە دیاریکەردێبێنۍ کە شەکواکارەکۍ ئاماژەشا پنە کەردێبێنۍ. بە پەیلواو مەسرور بارزانی دادگا جە بنەڕەتۆ چەمۍ سەرو نمونەکارە قوجنۆ، بەڵام ئانە ڕووە نمەڎۆ".

جە شەکوای تازێنە جە دادگاو ناوچەو کۆڵۆمبیای، شەکوا چی کەسا کریێنە: بنەیانەو بارزانی و ئا کەسۍ سەر پا بنەیانەینۍ، مەسعود بارزانی، مەسرور بارزانی، وەیسی بارزانی، موکسی بارزانی، مەلا مستەفا (بابۆ) بارزانی، ژەیرا محەمەد خالید، کاتژا ورێسار بارزانی، ئارین مەسرور بارزانی، هەروەها جۆناسان س موور، جۆی ر ریدەر، ڤالێریا کوپ، جولی مای سانفۆرد، لاورا گیۆ هاریس، روبار سندی، تریفە عەزیز، عێرفان ساڵح عومەر شێروانی، عومەر س.بارزانی، ئینتفازە کەمال قەنبەر، حەمزە سەلیم، حیکمەت بامەڕنی، هەیمان قواس، داسکۆ شێروانی.

مایکڵ رۆبن ئاماژەش بە پەیوەندی بەینو جۆی ر. ریدەری و مەسرور بارزانی کەرد و واتش: "نامۍ جۆی ریدەریچ ئامان کە جە دۆسیەکەنە پارێزنەرو مەسرورین. ئینە ئاژێوە ئاسایی نییا، بەڵام پەشت قایما پا بەڵگاوە کە پێوەسێنۍ بە تاوانەکاو ریدەری جە ساختەکاری و تاوانەکا تەری. مشۊم مەسرور بارزانی ئیساتۍ چەمۍ بە ئەرکو پارێزنەرەکاشەرە خشنۊوە، ئاخۆ ریدەر گەرەکشا مەسروری رزگار بکەرۆ، یاخود مەسرور هەوڵ مڎۆ ریدەری نەجات بڎۆ؟".

جە دۆسیەکەنە تۆمەتبارا جە بنەیانەو بارزانی بە ئەشکەنجە، پاشێلکەردەی یاساکا وەرەنگاربیەیۆ تیرۆری، تاوانەکۍ جە دژوو مرۆڤایەتی، کوشتەی هەڕەمەکی، تاوانەکۍ جە دژی ڕا گێرتەی جە قڕکەردەی، تاوانەکۍ وەڵاکەردەیۆ قینۍ و کینەی، ساختەکاری و چەرمەکەردەیۆ زەڕی تۆمەتبارۍ کریێنۍ. مایکڵ رۆبن جە دمادمایی هۊرسەنگناکەیشەنە جە بارەو مەسرور بارزانیوە واتش، "هیواڎارەنا مەسرور بارزانی رووسی بزانۆ، چونکی پی هەرمانێشە، دماییەکەش یان جە زینانێوە ئەمریکاینە بۆ یاخود چارەنوویسش پېسە بەشار ئەسەدی جە تاراوگەنە بۆ".