سامان یاسین یۆ جە گیریایا سەرهۊرداو ژەنی، ژیۋای، ئازاڎیی جە نامێوەنە پۍ سەرۆکوو دەسەڵاتی دادوەری ئێرانی باس چانەی کەرۆ، دماو ١٨ مانگا زینڎانی هەڵای دیار نییا بە چ تاوانێوە زینڎانی کریانوو ماچۆ: "جە قانەرەم دەیدۍ با بڕیۆوە".
سامان یاسین هونەرمەنڎی گۆرانیواچوو کوردی، کە جە ۋێنیشانداکا سەرهۊرداو ژەنی، ژیۋای، ئازاڎیینە جە تارانەنە گیریابۍ، نامێوە کراوەش ئاراسەو غوڵامحسێن موحسنی ئەژەیی سەرۆکوو دەسەڵاتوو دادوەری ئێرانی کەردەن و چنەشەنە ئەرەیاۋنانش، "١٨ مانگێن جە زینڎانەکا تارانی و کەرەجینە بە بێ هیچ بەڵگێوە گیریانا، چی ١٨ مانگەنە چنڎین جارۍ واڎەو ئەرەنیشتەو دادگای دیاریکریا، بەڵام ئەرەنیشتەکەی نەلا ڕاوە".
ئەرەیاۋنانیچش، "تکاتا ۋنەکەروو بۆم ڕۊشن کەردۍ کە چ تاوانێم کەردێنە، ئەگەر تاوانبارەنا سزاو زینڎانیم سەرەرە سەپندۍ، ئەگەر بێتاوانەنا ئازاڎم کەردۍ. من مەزانوو کە مەڵامەتوو ئا گرڎ قینۍ دەسەڵاتی دادوەری ۋەران ۋەر بە من چێشا و چ مەعنێوەش هەنە".
ئا زینڎانیە سیاسیە کوردە کە چنڎین جارۍ دژوو ناڕۊشنی دۆسیەکەیش مانیش جە واردەی گرتەن، یاڎش ئاردۆ کە چنڎین جارۍ ئەشکەنجەی جەسڎەیی و دەرونی دریان و چا ڕوۆ جە نامەکەشەنە نویستەنش: "داوا کەروو جە قەنارەم دەیدۍ. من ئیتر ۋەرگەو ئی ئاژە ناڕۊشنەو زینڎانی مەگێروو، بە مەڵامەتوو تاوانێوە کە نە من و نە شمە مزاندۍ چێشا، زینڎانی کریانا. سزاو جە قەنارەدایم پۍ بەرکەردۍ، من ناڕەزایی بەرمەبڕوو. ژیۋایم ۋەروو یۊی هۊرشێویانۆ، تەندروستی جەستەیی و دەرونیتا جە من ئەساوە، پێسە ئەشکەنجەی دەرونی جە قەنارەدای نمایشیتا سەرم تاقیکەردۆ، منتا ڕووانەو خەسەخانەی دەرونی کەرد، چێش مەنەن سەروو منشەرە باردۍ؟ گیانم کێشدۍ و با بڕیۆوە".
سامان یاسین (سەیدی)خەڵکوو کرماشانیا و جە رەزبەروو ٢٠٢٢ ێنە جە ۋێنیشانداکاو تارانینە گیریا و فاڕیاوە پۍ زینڎانوو ئێڤینی. سەرەتا بە تۆمەتەو جەنگی جە دژوو خوڎای و مردایۆ دژوو دەسەڵاتی سزاو جە قەنارەدایش سەرەرە سەپیا، بەڵام دماتەر جە تەرەفوو دیوانوو باڵاو دادوو ئێرانیوە سزاکۍ هۊرشێویاوەو و تۆمەتەو حۊڵ دای پۍ تێکدای ئاسایشوو وڵاتیش ئاراسە کریا.
ئا زینڎانیە سیاسیە کوردە باسش چانەی کەردەبۍ، کە چێروو ئەشکەنجەی و هەڕەشۍ وستەیرە واری جە بەرزاییەنە ناچاربیەن دڎان بنیۆ تاوانێوەرە کە نەکەردێنەش و جە ماوەو گێرتەیشەنە رووبەڕوو چنڎین جۊرا جە ئەشکەنجەی قورسی بیەنۆ و جە دژوو ئا ئەشکەنجا چن جارێوە مانیش جە واردەی گرتەن جارێوەیچ حۊڵوو ۋێکوشتەیش دابۍ.
دما بە دماو ئاشکراکەردەی ئەشکەنجەکاش جە ڕاو وەڵاکەردەیۆ تۆمارێوە دەنگیوە، ئا زینڎانیە سیاسیە پۍ چن ڕووێوە ڕوانەو خەسەخانەی دەرونی کریابۍ.
سەرەڕاو ویەرناو ١٨ مانگا سەروو گێرتەیشەرە، تا ئیسە جە پاو ئا تۆمەتا کە ئاراسەش کریێنۍ، دادگایی نەکریان و چن جارێوە ئەرەنیشتەو دادگایش دما وزیان، دمایین جار جە ١٨و شوباتوو ئێساڵینە بۍ.
