دژو هرووژمەکا دۆڵەتو تورکی و چەتەکا سوپاو نەتەوەیی سوریای (SNA)، چالاکی ئێشکگیری سەرو سنوورو نسێبین - قامیشلۆینە ٢٥ ڕووێن بەردەواما.

جە چالاکییەکەنە ئەرەیاۋنای ۋنیاوە، وێنەو ڕۆنامەنوویسا نازم داشتانی و جیهان بیلگینۍ هۆرگیریا.

پەرلەمانتارەو دەم پارتی ساڵیحە ئایدەنیزە قسێش کەردۍ و ئەرەیاۋناش گەرەکشانە بە دەسو چەتەکا دەسکەوتەکا دلێنەبەرا.

ساڵیحە ئایدەنیزە جەختش کەردۆ مشۆم ستاتۆو سەرنیشتوو ۋەرکۊتوو سوریای دڎانش بنریۆ پۆرە، واتش: "هرووژم پەی سەرو ۋەرنیشتی هرووژمێوەن پەی سەرو سەرنیشتی و پانیشتی و ۋەرکۊتی. پۊکەی پەنەوازا ستاتۆو ۋەرنیشتی قبوڵ بکریۆ. پەنەوازا دەمودەس پرسو کوردی چارەسەر بکریۆ. ئینەیچ بە وتارەو دیموکراتیکی و ئاشتییانەی بۆنە. جە لێوە باسو ئاشتی مکەرا و جە لێوەتەریچۆ کوشانە. پاسە نمەبۆ. گلێرۆبیەیۍ هەن و شاندەکەما چن ڕوێوەن سەردای پارتە سیاسییەکا مکەرۆ. بەڵام موخاتەب (عەبدوڵا ئۆجالان) قسەکۍ ۋێش کەردۍ. مشۆم ئۆپۆزسیۆن ئیتر جوبو ئینەی بڎۆوە. ئا سیستەمەی ئێژا ئۆجالان پەرەش پنەدان، ئەڵتەرناتیڤێوەن پەی سیستەمو گەندەڵی. مشۆم ئینە پېسە دەرفەتێوە تەماشە بکریۆ. پۊکەی جیای گلێرۆبیەی، هەلومەرجو ئازادبیەیش بڕەخسندۍ. پەنەوازا ئێژا ئۆجالان ئازاد بۆنە".