کورڎسانیۍ جبەرو ۋڵاتی و دۊسەکېشا جە شارو سیدنیی ئوسترالیای پۍ شەرمەسارکەرڎەو گۊشەگیریی سەرو ڕابەرو گەلوو کورڎی عەبدوڵا ئۊجالانی جە سیدنی تاون کۊبیێۋە.

"گولۍ ڕۊس"ە هامسەرۊکەو ناۋەنڎی گلېرگەو دیموکراتیکو کورڎی جە سیدنی ۋاتش، هێزە پیلانگېڵە میان نەتەوەییەکۍ ماوەو ٢٤ ساڵان جە کەسایەتیی عەبدوڵا ئۊجالانی ڕابەرو گەلوو کورڎینە ھجومی پاکتاوکاری و جینۊساید کەرانە سەرو گەلوو کورڎی و جمیەرو ئازاڎیی کورڎسانی.

"گولۍ ڕۊس"ە ئەرەیاۋناش، حۊڵ مڎا جە ڕاو گۊشەگیریۊ ڕا جە پارادایمو ئازاڎیی زایەندی، ژیوگەیی و دیموکراتیکی ڕابەرو گەلوو کورڎی عەبدوڵا ئۊجالانی گېرا و ۋاتیچش: "ۋەڵۍ گرڎ چېۋێنە سی پی تی و گرڎو ئەرەمەرزیا پەیوەنڎیدارەکا ۋەرو ئا مەڵامەتیە ۋەران ۋەر بە گۊشەگیرینە بێدەنگېنۍ و پی شکڵە پەشتیوانی چا گۊشەگیرییە مکەرا. ئێمەی کورد جە ئوسترالیا چنی دۊسەکاما ئی بێدەنگییەو سی پی تی و ۋڵاتا ئۊروپای شەرمەسار مکەرمۍ."

"پیتەر بۊیل" بە نامۍ هامپەیمانیی سۊسیالیستو ئوسترالیایۊ ۋاتش، "عەبدوڵا ئۊجالان جە ۋەرکەوتوو میامینینە موھەندیسو ئاشتیین. پێویسا حکومەتو ئوسترالیای و هێزە باڵادەسە میان نەتەوەییەکۍ ۋەرپەرسیاری ۋێشا پۍ دمایی ئارڎەی بە گۊشەگیریی سەرو عەبدوڵا ئۊجالانی جابەجۍ کەرا و فشار وزا سەرو دۊڵەتو ترکی. بەڕێز عەبدوڵا ئۊجالان تاکە ڕابەرا، کە متاوۊ کێشەو کورڎی چارەسەر کەرۊ".

چالاکییەکە بە دروشمەکا 'بژیۋۊ سەرۊک ئاپۊ' ی و "ژیای بەبۍ سەرۊکی مەبۊ'' دمایش پنەئاما.

ھ.ش