ڕۊو یەکشەممەی ٢٤و کانونوو یووەمی/دیسەمبری جە شاروو لیڤەرپول و وڵاتوو بەریتانیای جەمەو کوردی نۆرس وێستوو شارەکەی بە مەراسیمێوە یاڎوو گیانبەخشایا کۊکوشی مەرەشیش کەردۆ.

مەراسیمەکە بە دەیەقېوە بێدەنگی پۍ رێزۋنەگېرتەی جە گیانوو گەشمەرڎا دەسشپنەکەرڎ و دماتەر هامسەرۆکاو جەمەو کوردی نۆرس وێستی جە لیڤەرپول سەرەڕاو خېرئامای جە ئاماڎەبیا باسشا جە کۊکوشکەرڎەی گەلوو کوردی جە سەرنیشتوو کوردسانی و بەتایبەتی کۊکوشی مەرەشی کەرڎ و باسشا چانەی کەرڎ کە چنی دەوڵەتوو تورکی ئا کۊکوشیەشە کەرڎەن.

حەرپېسە ئاماژەشا پانەیچ کەرڎ، کە کۊکوشی مەرەشی درێژکریاوەو کۊکوشیەکا تەری بیەن کە جە دژوو کوردی وعەلەویەکا و پێکئاما نەتەوەیی و ئایینیەکا تەری ئەنجامدریېنۍ و جە مەرەشیچ هەم ۋەروو کورد بیەیشا و هەم ۋەروو عەلەوی بیەیشا کۊکوش کریېنۍ.

جە درێژەو مەراسیمەکەینە بەڵگەفیلمێوە جەبارەو کۊکوشی ١٩-٢٦و کانونوو یووەموو ١٩٧٨و مەرەشی نمایش کریا.

جە مەراسیمەکەنە ژمارېوە کەسایەتیۍ ئازاڎیوازۍ و وڵاتپارێزۍ و حەرپاسە نوێنەروو پارتوو ژیۋای ئازاڎیی کوردسانی (پەژاک) ئاماڎۍ بېنۍ.

یادەکە بە دروشمەو "گەشمەرڎۍ ڕۊشنایی ڕېمانۍ" جە سەعات ٣ۍ دمانیمەڕۆی تا سەعات ٥و وېرەگای بەردەوام بۍ، دماتەر بە دروشمەکاو "گەشمەرڎۍ مەمرا"، "بژیۋۊ ئیراڎەو گەلوو کورد"ی و " بژیۋۆ ڕابەر ئاپۆ"ی دمایش پنە ئاما.