دەم پارتی بە جۆش و خرۆشێوە فرۆ ۋێش پۍ شارەوانی سێرتی ئاماڎە کەرۆ کە جە تەرەفوو قەیومیوە دەسش سەرەرە گیریان. سەفیە ئالاگاشە کاندیدەو هامسەرۆکایەتی شارەوانی ئەرەیاۋناش، دژوو فاڕایۆ هێزەکا دەوڵەتینمۍ کە پێسە 'دەنگدەری' دەسشا پۍ دەنگدەراو بێ قەراری و بێ چالاکی درێژ کەرا.

ئاکەپە جە هۊرچنیەکا ساڵەو ٢٠١٩ ینە شارەوانی سێرتیش دۆڕنا، بەڵام دماو ساڵێوە ئیدارەو شارەکەیشا جە ڕاو قەیومیوە گرت دەس. شارەوانی سێرتی گرڎوو دەرفەتەکاش پێشکەش بە ئەرەمەرزیاکا دەوڵەتی و شەریکەکاش کەرد. جە هۊرچنیە گرڎینەکا ساڵەو ٢٠٢٣ێنە، ڕێژەو دەنگەکا ئاکەپەی پۍ ٩٪ کەمۍ بیۍ. پۊکەی ئیسە دەسش کەردەن بە فاڕایۆ دەنگدەرا جە شارەکا تەریۆ پۍ هۊرچنیە دلێینەییەکا. ناڕەزایەییەکۍ دەم پارتی جە تەرەفوو دەسەڵاتی دادوەریۆ کە ئینا چێروو دەسەڵاتوو حکومەتەکەو ئەردوغانینە ڕەڎکریاوە. سەفیە ئالاگاشە کاندیدەو مەنتیقەو بەرواری باڵاینە پۍ هامسەرۆکەو شارەوانی سێرتی جە دەم پارتی.

سەبارەت بە هۊرچنیەکا ئاڵاگاشە قسێش پۍ ئاژانسوو هەواڵوو فوراتی کەردۍ و ئەرەیاۋناش، بەمەڵامەتوو قەیومەکاوە حیچ خزمەتگوزاریێوە جە شارەکەنە نەکریان، سەرەتا کێشەو ئاوۍ چارەسەر کەرا کە ساڵانێوەن چارەسەر نەکریان.

جە شارەوانینە خزمەتگوزاری فرە زۋانی دەس پنەکەرمۍ

ئاڵاگاشە ئاماژەش پانەیچ کەرد، شارەوانیێوە فرە زۋان ئەرەمەرزنا، کە یۆن جە بەرنامەکا دەم پارتیی و واتش، "گەرەکمانە بە پاو ئاژەو ئیسەی ئی پڕۆژەیە جابەجێ کەرمۍ".

ئالاگاشە ئەرەیاۋناش کە ئاڎۍ گرنگی بە هەلوو کاری پۍ ژەنا مڎا، پۍ ئینەیچ پڕۆژەشا هەن و واتش:"ئێمە یاگۍ ژیۋای پۍ ژەنا وەش کەرمۍ. حەرپاسە یاگۍ داڵدەدای پۍ ژەنا وەشکەرمۍ ، کەشێوە پۍ ژەنا وەشکەرمۍ کە بتاوا قۊرتەکاشا بەربڕا و هەرمانە کەرا".

ئالاگاشە یاڎش ئاردۆ کە یۆ جە بەرنامە گرنگەکا شارەوانی گەلی دەم پارتی، جە باوەش گێرتەی گرڎوو بەشەکا گلێرگەین و واتش: "چی شارەنە تەنیا کورد یان عەرەب نییا، شارێوە فرە ڕەنگا کە خەڵکێوە فرە پێوەرە مژیوا. پۊکەی ئێمەیچ جە هەمبەروو بەشەکا گلێرگەینە گەرەکمانە جە چوارچێوەو بەرنامەکا ۋێمانە شارەوانیێوە فرە زۋانی، فرە کولتور، فرە ئایینی وەش کەرمۍ، سێرت شارێوە فرە زۋان و کولتوورا، ئێمە بەپاو پێویسییەکا مەنتیقەکەی ڕەوزەو زارۆڵا بە زۋانی کوردی و عەرەبی وەش کەرمۍ".

حەرپاسە ئاڵاگاشە ئەرەیاۋناش، یانە بە یانە، جاڎە بە جاڎە، چالاکییەکاو هۊرچنیەی ڕاوەبەر کەرمۍ، دەنگدەرا قەرار ڕازی کەرا، دەنگدەرۍ چالاکۍ مارا و داوا کەرا بەشداری هۊرچنیەی کەرا.