شەریفە محەمەدیە کە جە زینانۍ ئێرانینە سزاو جە قەنارەدایش سەرەرە سەپیان، ئەرەیاۋناش هێزەکۍ ئێرانی عەزیەتشا کەرڎێنە و واتش: "نمەبۆ ئینسان دلۍ خەم و پەژارەینە بژیۋۆ و تەسلیم بۆ، مشۊم ئینسان بەهیواوە بژیۋۆ".
زینانیەی سیاسیە شەریفە محەمەدیە کە جە زینانو لاکانو ئێرانینە زینانیەنە و سزاو جە قەنارەدایش سەرەرە سەپیان، دەربارەو پرۆسەو دادگاییکەردەی ۋێش و نزیکایەتیی دۆڵەتو ئێرانی پەیامێوەش وەڵاکەرڎۆ.
شەریفە محەمەدیە ئەرەیاۋناش ۋەرپەرسا زینانو لاکانی جە ڕۊو جە ئەڎابیەیشەنە سزاو جە قەنارەداکەیشا پنە واتەن، ماچۆ: " جە کاتو ۋنەپەرسایۊینە چېرو ئەشکەنجەینە گەرەکشا بۍ دڎانیایپۊرەی زۆرەملێ ئیمزا بکەرو، بەڵام قبووڵم نەکەرد، پا مەڵامەتۆ زیاتەر ئەزیەت دریانی و دەمووچەمم زەخمین بی".
جە درێژەنە ماچۆ: " دماو ئەزیەتکەردەی و کەوەبیەیۆ دەمووچەمیم پەی ماوەو یەرۍ مانگا جە ژووری تاکەکەسینە زینانیە کریانی و تێکەڵ بە ژەنا نەکریانی، چا ماوەنە یەرۍ کیلوۍ جە کێشیم کەمش کەرڎ. مەڵامەتو سزادایم ئانەنە کە زیاتەر جە ١٠ ساڵان ئەندامەو کۆمیتەو هەماهەنگی یارمەتیدای جە ئەرەمەرزنای ڕێکوزیا کرێکارییەکا بێنا و بە ئاشکرا چالاکییەکېم ئەنجامدێنۍ."
جە دماینە ماچۆ: " هەڵای نمەزانو چ تاوانێوەم کەردێنە، کە لایەقو سزێوە نادادپەروەرانەی بو، بەڵام جارێوەتەر وەهار ئاماوە و حیچ زمسانێوە پەی هەمیشەی بەردەوام نمەبۆ، نمەبۆ ئینسان جە خەم و پەژارەنە بژیۋۆ و تەسلیم بۆ، مشۊم بە هیواوە بژیۋۆ".
