ئارۆ تەرمو حاجی ئەحمەدی یۆ جە ئەرەمەرزنەرا و هامسەرۆکی وەڵینو پەژاکی، دماو ئانەی جە وڵاتو ئەڵمانیای بە مەبەسو ئەسپەردەکەردەیش گێڵاوە پەی کوردەسانی، کوچۍ چێوەڵی بە مەراسیمێوە شکۆڎار جە شارو سلێمانی پێشوازیش ۋنە کریا دماتەر تەرمەکەش ڕەوانەو قەبرسانو گەشمەرڎا قەندیلی کریا.

جە مەراسیمو خواحافیزیەکەینە بنەیانۍ گەشمەرڎا، ئازادییوازا و وڵاتپارێزنا چنەشەنە بەشدارۍ بیۍ و تەرمو حاجی ئەحمەدی جە مزگی ئەحمەدو حاجی عەلی ئشناسیا بە ئەحەسووری جە شارو سلێمانینە ڕەوانەو قەبرسانو گەشمەرڎا جە بنارو قەندیلی کریا.

ئەنڎازیار عەبدولڕەحمان حاجی ئەحمەدی ئشناسیا بە (حاجی ئەحمەدی) ڕامېیاریمەدار و یۆ جە سەرمەشقا دیارو کوردی و هامسەرۆکی وەڵینو پارتو ژیۋای ئازادیی کوردەسانی (پەژاک)، کە زیاتەر جە نیم سەدە جە ئەوەکۊشای و کۊششی نەتەوەیی پەی ئازادیی و دۆزی ڕەواو گەلو کوردی بێوچان بەردەوام بۍ، جە ١٨و ئادارو ٢٠٢٥ بە مەڵامەتوو نەوەشیۆ جە وڵاتو ئەڵمانیای ژیانئاواییش کەرد.