شێخ مەقسوود و ئەشرەفیەنە هێزەکۍ ئاسایشو دلېینەی دەسبەکارۍ بیۍ
دماو کیشیایۆ هێزە سەروازییەکا جە گەڕەکەکا شێخ مەقسوودی و ئەشرەفیەو حەلەبی، هێزەکۍ ئاسایشو دلېینەی دەسبەکارۍ بیۍ پەی پارېزنای ئاسایشو گەڕەکەکا.
دماو کیشیایۆ هێزە سەروازییەکا جە گەڕەکەکا شێخ مەقسوودی و ئەشرەفیەو حەلەبی جە چوارچێوەو ڕێککەوتەی بەینو ئەنجوومەنو گرڎیی هەردووە گەڕەکەکۍ و حکومەتو کاتیی دیمەشقی، هێزەکۍ ئاسایشو دلېینەی ئەرکو پارېزنای ئاسایشو گەڕەکەکاشا جە ئەستۆ گېرت.
بەپاو خاڵەو ششەمو ئا ڕێککەوتەیە کە ١ و نیسانی ئیمزاکریان، هێزە سەروازییەکۍ جە هەردووە گەڕەکەکېنە کیشیێوە پەی ۋەرکۊتوو فوراتی، پینەیچ ئەرکو پارېزنای گەڕەکەکا ڕادەسو هێزەکا ئاسایشی کریا.
هېزی یەکینەکۍ پارېزنای گەلی (یەپەگە) ئەرەیاۋناشا بەپاو ڕێککەوتەکەی مامەڵە مکەرا و ئەرکو پارېزنای ئاسایشو گەڕەکەکا پەی هێزەکاو ئاسایشو دلېینەی جیامازا.
یووە جە ڕاوەبەرا هێزەکاو ئاسایشو دلېینەو شێخ مەقسوودی و ئەشرەفیەی، ئارین عەبدۆ قسێش پەی ئاژانسوو هەواڵوو هاواری (ANHA) کەردۍ و ئەرەیاۋناش پېسە هێزەکاو ئاسایشو دلېینەی ئەزموونو ١٠ ساڵاشا هەن پەی پارېزنای ئاسایشو گەڕەکەکا. جەختش کەرڎۆ، گرڎ ڕاو جایۍ گێرانە ۋەر پەی پارېزنای ئاسایشو گەلی.
