مسەفا قەرەسوو ئەرەیاوناش؛ پرسو کوردی و بێدەنگکەردەو چەکەکا و هورشېونایۆ پارتەکەی پرسێوە چامنە نییەنۍ کە بە شێوێوە بەرژەوەندی وازانە چنەش نزیکێ باوە و واتش: "ئەر ئا قەولێ دریێنێ جابەجی نەکریانە، ئێمەیچ چەمەڕایی نمەکەرمێنە."
مستەفا قەرەسوو ئەندامو کۆنسەو ڕاوەبەری کەجەکەی پی جۆرە هورسەنگنایش پەی ئاژەکەی کەرد:
..
چی مانگێنە شەهادەتی فرە گرنگێ ڕووەشادێنە. ماوێوە چێوەڵتەر یۆ جە ئەڏایا سەنگینەکاما کە یاگێ گرنگەش بێ جە ئەوەکۆشایمانە ئەڏایا سەکینە(سەکینە ئارات) گیانش جەدەسدا و ڕۆحش شاد بۆنە. هەرپاسە یۆ جە ئەرەمەزنێرەکا پەژاکی ڕێزدار حاجی ئەحمەدی چی مانگێنە عەمرەو خوایش کەردە. ئاڏ کەسایەتیێ فرە بەقیمەت بێ. یاگێوە گرنگەش جە ئەوەکۆشای ئازادی گەلوو کوردی و هەم جە ئەوەکۆشای ئازادی جە وەرکەوتوو کوردەسانی و هەم جە ئەوەکۆشای ئازادی جە حەر چوار بەشوو کوردەسانینە بێ و دەورێ خاسش گێڵنا، هەمیشە بە ڕێزدارییۆ یاڏش مکەرمێوە.
هەرپاسە چی مانگێ نەورۆزینە بە ڕێزداری و منەتدارییۆ هەڤاڵێ سەرمەشقێ کاوەی هاوچەرخ مەزڵوم دۆغان، زەکیە ئاڵکان، ڕەهشان دەمیرل، ڕۆناهی و بێریڤانە یاڏ وسمێ کە دەورێ فرە گرنگشا جە گەشە کەردەو نەورۆزینە تا بە ئارۆ بێ. ئەر ئارۆ نەورۆز ئینا چی یاگێنە و پی ئاستە یاوان، بە ئەوەکۆشای، و هەڵوێس و ڕێبازو فرە گرنگو ئاڏشا بییەن.
هەرپاسە جە حەفتەی قارەمایەتینە، جە ٢٨و ئاداری شەهادەتو هەڤاڵ مەعسوم کۆرکمازی ڕووەشدێنە. یاگێ و شۆنەو هەڤاڵ مەعسووم کۆرکمازی چی ئەوەکۆشاینە خاس دیارەنە. بە هەڵوێس و ڕێبازش دەورێ فرە گرنگش جە پێکئاردەو هێزو پارێزناو گەلی و پەرەپنەدای گێڵنانش. ئێمە بەردەوام پێسەو گەلی و ڕێکوستەی بەڕێزدارییۆ یاڏ مکەرمێوە و جە ئەوەکۆشایمانە بە زینەی مەنۆوە.
هەرپاسە دلێ گەشمەرڏا و سەرەتاو ئەوەکۆشایمانە، جە ٢٨و ئادارو ١٩٨٠نە، یەرێ هەڤاڵێما جە شکستونو مێردینی بەنامەکا محەمەد کورت، ئەحمەد کورت، و سەلمان دۆغرو گەشمەرڏێ بیێنێ. ئی هەڤاڵێ جە یوەمین گەریلا گرنگەکا ئەوەکۆشایمانە بێنێ. بەڕاسی هەڤاڵێ بەقیمەتێ بێنێ. بەڕێزدارییۆ یاڏشا مکەرمێوە. کاتێ کە گەشمەرڏێ بیێ ئێمە جە زینانەنە بێنمێ.
هەرپاسە چی مانگێنە بەڕێزدارییۆ یاڏو گەشمەرڏە عەبدولڕەحمان تەمۆقی مکەرمێوە. کەسێوە فرە بەقیمەت بێ؛ بڕواداری دینی بێ. بەڵام جە ساڵەکا دمایشەنە بی بە کەسێوە ئاپۆیی و هەڤاڵو پەکەکەی. چونکە گرڏو بەها ئەرێنی و خاسەکێ ئاینەکەیش جە پارتەکەیمانە وینێ. ویناش کە پارتەکەما بەها ئەخلاقی و حەقەتینەکێش و بەها کۆمەڵایەتیەکێ بە زینەی مدرنۆ، ئار بەڕاسی بی بە کەسێوە ئاپۆیی.
تەنانەت چا تەمەنەنە، دماو ئانەی بەشداری ڕێکوزتەی بی، شارو حەڵەبینە خەباتو گەلی بەرێ ڕاوە. ڕەنگە کەمتر بشناسریۆ، بەڵام بە شێوێ شەخسی جەلایەنو ڕابەر ئاپۆیۆ ئەرکو ڕاوەبەردەو کۆمیتێوەش پنە سپاریا بێ و جە حەڵەبەنە خەباتو گەلی بەرێ ڕاوە.
پەکەکە ئینا سەرو ڕێبازو گەشمەرڏا ئازادییۆ
چی مانگێنە بێگومان دووێ ڕووداوێ گرنگێ هەنێ. یوەم: 'دماو وڕناو کۆمارو مەهابادی جە وەرکەوتوو کوردەسانینە، ڕابەرێش جە قەنارە دریێ و گەشمەرڏێ کریێ. قازی محەمەد و هەمڕێکێش جەقەنارە دریێ. با بۆنۆ بە رێزدارییۆ یاڏشا مکەرمێوە. جە ئەوەکۆشای ئازادی گەلوو کوردینە یاگێوە گرنگەشا هەنە. جە ئەرەپڕاو کوردی و زینەکەردەیۆ داوا ڕەواکا گەلوو کوردی پەی ئازادی دەورێ گرنگشا بێ. بەشێوە گۆرێشا چی ئەوەکۆشاینە هەنە. ئێمەچ بە ئەوەکۆشای وێما جە حەقیقەتەنە یاڏشا مکەرمێوە.
پەکەکە گرێدراو گرڏو گەشمەرڏا ئازادین کە جە ویەردەنە پەی کوردسانی و خەبات و ئەوەکۆشایشا کەردەن. یادەوەری و ئەوەکۆشایشا جە ئەوەکۆشای پەکەکەینە بە زینەیی بەرز ڕاگێرمێنە. سەرەتا پاسە بێ و ئارۆیچ بەهەمان شێوە، سەوایچ بە هەمان شێوە بەردەوام بۆنە.
بێگومان گەشمەرڏێ تەرێچ هەنێ کە پەنەوازا بەڕێزدارییۆ یاڏشا بکەرمێوە. ئینەیچ گێڵۆوە پەی ٣٠و ئاداری ١٩٧٢کە ماهێر چایان و هەڤاڵەکێش جەنگێوەنە جە قزڵ دەرەنە گەشمەرڏێ کریێ. ماهێر چایان ڕابەرێوە فرە گرنگ بێ جە جمییەرەو شۆڕشگێڵی تورکیاینە. ئەر ئارۆ جە تورکیانە نەریتو چەپی و ڕۆحو شۆڕشگێڵنی و سۆزێ هەن، ئانە بێگومان فکر و هەوڵەکێ ماهێر چایانینێ دەروێ فرە گرنگشا دلێنە بییەن جە دروسکەردەینە، پارێزنێش یونێش بە ئیسەی.
ڕابەر ئاپو جە لایەنگرا ماهێر چایانیا. جە حەقیقەتەنە کاتێ ماهێر چایان و هەڤاڵەکێش جە قزڵ دەرەنە کۆمکوژێ کریێ، ڕابەر ئاپۆ جە زانکۆو زانستە سیاسییەکا، ئا زانستگایەی کە ماهێر چایان چنەش وانان، سەرمەشقایەتی بایکۆتیش گێرت ئەستۆ. چا کاتەنە گەنج بێ و ونکارو قۆناغو یوەمو زانکۆینە بێ. ئەندامو هیچ ڕێکوزیێوە نەبێ. لایەنگرو شۆڕشگێڵی و لایەنگرێوە ماهێر چایانی بێ و سەرمەشقایەتی بایکۆتەکا جە ئەستۆ گێرێ. بەمەڵامەتو ئی سەرمەشقایەتیە ماوێوە جە زینانەنە مدرناشا. هەرپاسە جە کاتو جەقەنارەداو دەنیزی، یوسف و حسێن، ڕابەر ئاپۆچ پەی ماوەو ٧مانگا جە زینانە مەنێوە.
ئەوەکۆشای و وێڕاگری ماهێر چایانیچ کاریگەریش سەرو ئەوەکۆشای ئێمە بییەن. ئیسەیچ جە ئەوەکۆشای ئێمەنە بە زینەی مەنەنۆ. پۆکەی بە ڕێزداریی و حورمەتۆ یاڏشا بەرز ڕاگیرو.
ئیدامەش هەن.....
